InfoHub Logo

مەكتەپ بىتىرگەن جىلى ۇلكەن اعاسى بۇعان ءوزى دە ۇناتىپ قالاپ جۇرگەن ادەبيەتتىڭ وقۋىنا بارعانىن قولداپ، كەڭەس بەرە وتىرىپ، "وقيمىن دەگەن ادامنىڭ بارىنە زاڭ ورتاق قوي" دەگەن ەدى. اعاسى ايتسا، ايتقانداي-اق، سول جولى ءوزى قالاعان وقۋىنا تۇسە الدى. سوڭعى كۋرستا جۇرگەندە، تاريح ماماندىعىنا دەگەن قىزىعۋشىلىعى وياندى جانە بولاشاقتا وسى ماماندىققا تاپسىرىپ كورۋگە دەگەن ماقسات قويدى.

مۇعالىمدىك جۇمىسقا ورنالاسىپ، ونىڭ العاشقى جىلىن وتكىزدى. سونان سوڭ ويعا العان ماقساتىنا ساي، قۇجاتتارىن دايىنداي باستادى دا، ءبىراق ىشكى ويى ودان گورى قۇقىق ماماندىعىنا تاپسىرىپ كورسەم دەگەن ويعا تىرەلە بەردى. بۇل جولى اپاسىنا ەشتەڭە دەي قويمادى، ايتسام، كەلىسىمىن بەرە قويماس دەپ ويلاعانى.

قۇجاتتارىن وتكىزگەن كۇننىڭ ەرتەڭىنە وقۋ ورنىنىڭ اۋلاسىنداعى جيىندى كوزى شالدى. جيىندا وقۋ ورنىنىڭ باسشىسى سويلەپ تۇر ەدى. باسشىنىڭ اۋزىنان وسى ۋاقىتقا دەيىن باسپا ءسوز بەتىندە ايتىلىپ، ءبىراق قوعامعا ءالى اسا تانىس بوپ كەتە قويماعان تەست، تەست ءادىسى دەگەن سوزدەر ەستىلىپ جاتتى. باسشىنىڭ ايتۋىنشا، ەندىگى جەردە وقۋعا قابىلدانۋ ءۇشىن سىناق تاپسىرۋدىڭ جۇيەسىندە وزگەرىس بولادى. ەمتيحان تەست ادىسىمەن الىنادى. بەس بىردەي ءپان ءبىر جەرگە جيناقتالعان. ەشتەڭە الىپ كىرۋدىڭ كەرەگى جوق. جاي قارىنداش پەن وشىرگىش جانە سۇراق كىتاپشاسى مەن جاۋاپ پاراعى بولادى.

تەستىنىڭ ناتيجەسىنە قاراپ ءوزىنىڭ جيناعان بالى بويىنشا الدا تۇرعانىن كوردى. تەستىلەۋدىڭ ناتيجەسىنە قاراپ-اق ءوزىنىڭ وقۋعا قابىلدانعانىن سەزدى. ويلاعانىنداي-اق، كەلەسى كۇندەردە وقۋعا قابىلدانعان ستۋدەنتتەردىڭ تىزىمىندە تۇر ەدى.

ءبىر ايدان سوڭ بۇل ءبىرىنشى كۋرستان جوعارى كۋرسقا سۇراندى. "سەن كۇندىزگى بولىمگە ءتۇسىپ تۇرسىڭ عوي، - دەدى بۇعان وسى جەردىڭ جاۋاپتى، لاۋازىمدى قىزمەتكەرى. - ول سىرتتاي بولىمدە مۇمكىن. وندا دا ەكىنشى كۋرستىڭ وزىنە مۇمكىن دەگەن ءسوزدى عانا ايتا الام. بۇل ماسەلە تەك رەكتوردىڭ رۇقساتىمەن شەشىلەدى".

كەلەسى كۇنى رەكتوردىڭ قابىلداۋىندا بولدى. رەكتور مۇنىڭ ءوتىنىشىن تىڭداپ الدى دا: "مەنىڭ اتىما ارىزىڭدى جاز. مەن ارىزىڭا ءتيىستى كۋرسقا دەپ قانا قول قويىپ بەرەمىن. ماسەلەنى ءارى قاراي دەكان شەشەدى"، - دەدى. شىعىپ بارا جاتقانىندا، رەكتور قابىلداۋ وتكىزىپ وتىرعان ساتتە، جانىندا كومەكشىسى بولىپ تۇرعان ازامات ىزىنەن داۋىستاي، ىلەسە شىقتى. "قاعازدارىڭدى ماعان الىپ كەل، رەكتور سەنىڭ جۇمىسىڭدى ماعان تاپسىردى"، - دەدى. سول ازامات دەكانعا ءوزى الىپ كەلىپ: "مىنا جىگىتكە رەكتور ءوزى سىرتتاي ءبولىمنىڭ كەلەسى كۋرسىنا كوشۋگە رۇقسات بەردى"، - دەپ تاپسىرىپ شىعىپ كەتكەن ەدى. دەكان:

- ەكىنشى كۋرستىڭ وزىنە ءوتۋ ءۇشىن ءبىرىنشى كۋرستى تۇگەلدەي تاپسىرىپ شىعۋىڭ كەرەك. ون كۇن ۋاقىت بەرەم. سەنىڭ بۇرىنعى وقىعانىڭ باسقا، بۇل باسقا. سەنىڭ بۇرىنعى وقىعان ساباعىڭ مۇنىڭ ىشىندە جوق. قوعامدىق ءپانىڭ دە باسقا. قوعامدىق پاننەن مەن بەرگەم. مەنىڭ ساباعىما الاڭداماي-اق قوي. ساعان ءوز ماماندىعىڭا بايلانىستى ساباقتار دا از جۇك بولعالى تۇرعان جوق، - دەدى.

تىزىمدە ءومىرى ءاتى-جونىن ەستي قويماعان بەيتانىس وقىتۋشىلاردىڭ ەسىمدەرى تۇر ەدى. بۇلار بۇرىن جوعارى وقۋ ورىندارىنان زاڭ ماماندىعىن الىپ شىققان، الدى زاڭ ىلىمىنەن عىلىمي جۇمىستارىن قورعاۋعا ازىرلەنىپ جۇرگەن، جاڭادان قۇرىلىپ قالىپتاسا باستاعان جاس كافەدرانىڭ وقىتۋشىلار قۇرامىنداعى وقىتۋشى ماماندار ەدى.

ءبىر اي دەگەندە بارىپ قانا ءبىرىنشى كۋرستىڭ ساباقتارىن تاپسىرىپ دەكانعا الىپ كەلدى.

ەكىنشى كۋرسقا قوسىلعاندا الدىمەن دەنەلى، يىقتى كەلگەن جىگىت اعاسىن جولىقتىردى. وسى توپتا وقيتىن بۇل ازامات قۇقىق قورعاۋ ورگانىنىڭ تاجىريبەلى قىزمەتكەرى ەكەن. مەملەكەتتىك تەرگەۋ كوميتەتىنىڭ تەرگەۋ قىزمەتىندە ىستەيتىن، مايور شەنىندەگى ازامات بولىپ شىقتى. ارتىنشا-اق پودپولكوۆنيك شەنىنە كوتەرىلگەن تەرگەۋ بولىمشەسىنىڭ باستىعى. ونىڭ جانىنداعى جىگىت اۋداندىق ىشكى ىستەر ءبولىمىنىڭ قىزمەتكەرى، اعا لەيتەنانت جىگىت ەكەن. بۇل جەردە وسى ازاماتتاردىڭ وسى سالاداعى باسقا دا ارىپتەستەرى وقۋشى ەدى. ودان كەيىنگى جىلدارى وقۋ باعدارلاماسىنا سايكەس، بۇلاردىڭ كۋرسىنىڭ بارلىعىن دا تۇگەلىمەن قۇقىق قورعاۋ ورگاندارىنان - سوت، پروكۋراتۋرا، ادىلەت، ىشكى ىستەر ورگاندارىنان تاجىريبەدەن ءوتىپ كەلۋگە جولدادى.

ءتورت جىلدان سوڭ قالالىق سوت ءتوراعاسىنىڭ الدىندا سوڭعى ەمتيحانىن تاپسىرىپ وتىردى. جاۋابى "وتە جاقسى" دەگەن باعاعا باعالاندى.

سوناۋ جىلى اعاسى "ءبىلىم الامىن دەگەن ادامنىڭ بارىنە زاڭ ورتاق قوي" دەگەن ەدى. ودان سوڭ زامان جاڭاردى. كەيىنگى قوعام تالاپتى ۇل-قىزعا تەست ءادىسىن ۇسىندى جانە ونى ۋاقىت وتكەن سايىن جەتىلدىرە تۇسۋدە. كەيىنگى زامان ءبىلىمدى ۇل-قىزدارعا دا، دارىندى ۇل-قىزدارعا دا كەڭىنەن جول اشتى. وعان ولاردىڭ الدىڭعى اعا-اپالارىنىڭ قولى جەتە قويماعان مۇمكىندىكتەرگە قارشادايىن-اق جەتىپ جاتقاندىعى دالەل. بۇعان دەربەستىكتىڭ شاراپاتى ءتيىپ جاتقاندىعى دا كۇمانسىز.

---