InfoHub Logo

تىزە بۋىنىنىڭ ارتروسكوپياسى — تىزە بۋىنىنا جاسالاتىن از جاراقاتتايتىن وتا. سوڭعى 15 جىل ىشىندە تىزە بۋىنىنىڭ ارتروسكوپياسى تىزە بۋىنى زاقىمدارىن ەمدەيتىن ەڭ قولايلى ادىسكە اينالدى.

اتالعان وتا كەزىندە زاقىمدانعان بۋىندى ەمدەۋ ءۇشىن ارتروسكوپيالىق ارالاسۋ جۇرگىزىلەدى. بۇل ءادىس بۋىن ىشىنە وپتيكالىق بەينەجۇيەنى ەنگىزۋگە جانە ونى تولىعىمەن قاراپ شىعۋعا مۇمكىندىك بەرەدى. بۇل كەزدە ءدال ناقتاما قويۋعا، مەنيسكىنىڭ (تىزە بۋىنىنداعى شەمىرشەك سىنانىڭ) زاقىمىن كورۋگە، اۋىرسىنۋدىڭ سەبەبىن انىقتاۋعا مۇمكىندىك تۋادى.

ءادىستىڭ ارتىقشىلىقتارى:

تىزە بۋىنى ارتروسكوپياسى بۋىننىڭ بارلىق بولىكتەرىن دەرلىك قاراپ شىعۋعا، سونداي-اق بۋىننىڭ اناتوميالىق ءبىرتۇتاستىعىن بۇزباي ونىڭ فۋنكسيونالدىق جاعدايىن باعالاۋعا مۇمكىندىك بەرەدى.

وڭالتۋ كەزەڭى ۇزاق ەمەس، از ۋاقىت ىشىندە اياققا سالماق تۇسىرۋگە بولادى (1-3 كۇن ىشىندە قوسىمشا تىرەكسىز ءجۇرۋ). ەڭبەككە قابىلەتسىزدىك 4-6 اپتادان 2-3 اپتاعا قىسقارادى، 6 اپتادان كەيىن سپورتپەن شۇعىلدانۋعا بولادى.

وتادان 1-3 تاۋلىك وتكەن سوڭ ناۋقاس اۋرۋحانادان (اشىق ءادىس جاسالسا، 14-25 كۇندە) شىعارىلادى.

تىزە بۋىنى ارتروسكوپياسى بويىنشا جالپى كورسەتىمدەر:

- مەنيسكىلەردىڭ زاقىمدانۋى؛

- تىزە بۋىنىنىڭ كرەست ءتارىزدى بايلامدارىنىڭ زاقىمدانۋى؛

- سينوۆيالدى قابىقتىڭ قابىنۋى؛

- تىزە قابىنىڭ ۇيرەنشىكتى شىعىپ كەتۋى؛

- ريەۆماتويدتى ارتريت؛

- بۋىن شەمىرشەگىنىڭ زاقىمدانۋى جانە اۋىرۋى؛

- مايلى دەنەنىڭ زاقىمدانۋى جانە اۋىرۋى (گوفف سىرقاتى)؛

- تىزە بۋىنىنىڭ دەفورماسيالاۋشى ارتروزى؛

- بۋىن اۋرۋىنىڭ زاقىمدانۋى نەمەسە اۋىرۋى كەزىندەگى تۇسىنىكسىز كلينيكا؛

- وتادان كەيىنگى تۇسىنىكسىز شاعىمدار؛

- تىزە بۋىنىنا جاسالعان وتا؛

- تىزە بۋىنى شەمىرشەگىن قالپىنا كەلتىرۋ.

تىزە بۋىنى ارتروسكوپياسىنان كەيىن ناۋقاستى قالپىنا كەلتىرۋ:

بۇل وتادان كەيىن وڭالتۋ كەزەڭى تەز جانە جەڭىل وتەدى. ءداستۇرلى اشىق ادىسپەن سالىستىرعاندا بۇل ادىستەن كەيىنگى جاراقات ايتارلىقتاي از. وتادان كەيىن كەسىلگەن جەرگە اسەپتيكالىق تاڭعىش تاڭىلادى دا ناۋقاس وتادان كەيىن جاتقىزىلاتىن پالاتاعا ورنالاستىرىلادى. وتادان كەيىنگى اۋىرسىنۋ، ادەتتە، ونشا قاتتى بولمايدى جانە تەز جويىلادى. ارتروسكوپتان تۇسكەن جاراقات ەكى-ۇش كۇندە جازىلىپ، تاڭعىش الىنىپ تاستالادى. بۋىننىڭ قالىپقا كەلۋى ورتا ەسەپپەن ءبىر اپتادان باستاپ ءبىر ايعا دەيىن سوزىلادى. اۋرۋحانادان شىعار الدىندا ناۋقاسقا ودان ءارى قالپىنا كەلۋ كەزەڭىندەگى ىس-ارەكەتى جونىندە ۇسىنىستار بەرىلەدى. ەڭ الدىمەن، وتا جاسالعان اياققا سالماق تۇسىرمەۋ كەرەك. تىزە بۋىنىن قوزعالتپاي ۇستاپ تۇراتىن ورتەزدى قولدانۋ مەرزىمى، بالداقپەن ءجۇرۋ تۋرالى ۇسىنىستار ناۋقاستىڭ جاعدايىنا قاراي بەرىلەدى. سونىمەن قاتار ەمدىك جاتتىعۋلار تاعايىندالۋى مۇمكىن.

تىزە بۋىنى ارتروسكوپياسى جاسالعان ناۋقاس ءۇشىن قالپىنا كەلۋ مەرزىمىن دۇرىس ۇيىمداستىرۋ ماڭىزدى. ويتكەنى، ەگەر ارتىق قوزعالىس جاسالسا، بۋىن سۇيىقتىعى اعۋى سەكىلدى ءبىرقاتار قيىندىقتار تۋىنداۋى مۇمكىن. سوندىقتان دارىگەردىڭ ۇسىنىستارىن بۇلجىتپاي ورىنداعان ءلازىم.

م. م. نۇرتازين، تراۆماتولوگ-ورتوپەد دارىگەر

---