تۋعان جەرگە تۋىڭ تىك
الماتى وبلىسى
جامبىل اۋدانى اقتەرەك اۋىلى
11-سىنىپ وقۋشىسى ەرجان قىزى نازەركە
وتان، تۋعان جەر، تۋعان اۋىل... بۇل تىركەس ادامزات ءۇشىن ەڭ ماڭىزدى دەپ ويلايمىن. ءيا تۋعان جەردىڭ ءقادىرىن شالعايدا جۇرگەندە بىلەسىڭ دەيدى. سولاي دا شىعار. مەن الاتاۋدىڭ بوكتەرىندەگى اقتەرەك اۋىلىندا تۋىپ ءوستىم. ەس بىلگەلى ءوز اۋىلىمنىڭ توپىراعىن باسىپ، تازا اۋاسىمەن تىنىستاپ، ءمولدىر سۋىمەن سۋسىنداپ كەلەمىن. بۇگىن سول اۋىلدىڭ تۇرمىس، تىرشىلىگى جايلى، وسى اۋىلدىڭ تۇلعالارى جايلى ءسوز قوزعايمىن.
ءتورت مىڭنان اسا حالقى بار اقتەرەك اۋىلى بۇگىندە الدىڭعى قاتارلى اۋىلداردىڭ ءبىرى. جىلدان-جىلعا كوركەيىپ كەلەدى. سەبەبى ءتۇرلى حالىققا قىزمەت ەتەتىن ورتالىقتار سالىنىپ، حالىقتىڭ قولدانىسىنا بەرىلىپ جاتىر. مىسالى، بالاباقشا، تويحانا، ءتۇرلى ساۋدا ورتالىقتارى، ساياباق دەگەن سياقتى ەلگە قاجەتتى نىسانداردىڭ بارلىعى بار. وسىنىڭ ءبارى وسى اۋىلدان شىققان ەل اعالارىنىڭ ارقاسىندا بوي كوتەردى. ال، "اقتەرەك" شارۋا قوجالىعى تۋرالى ايتار بولسام ءوز الدىنا ءبىر باسقا. ويتكەنى بۇل شارۋاشىلىقتا اۋىلدىڭ تەڭ جارتىسى قىزمەت ەتەدى، ءيا جاستار قالادان جۇمىس ىزدەمەيدى. كوكتەم مەن كۇزدە ەگىن ەگىلىپ، ونى جيناپ، باۋ-باقشامەن اينالىسىپ، سونىڭ جەمىسىن كورۋدە. سونىمەن قاتار قوجالىقتاعى بارلىق جۇمىسشىعا اتقارعان ەڭبەگى ءۇشىن شارۋا قوجالىقتىڭ يەسى ءشاينۇسىپوۆ تەمىرلان اعاي ەڭسەلى ۇيلەر سالىپ، اۋىل تۇرعىندارىن قۋانىشقا بولەۋدە. سوڭعى جىلدارى اۋىلدىڭ ءسانىن كوپتەگەن ادەمى، جاڭا ۇيلەر كىرگىزىپ تۇر.
مەنىڭ اۋىلىمنان اتاقتى تۇلعالار دا شىققان. اتاعى قازاق ەلىنە جايىلعان ايتىسكەر اقىن ەسداۋلەت قاندەكوۆ، ودان بۇرىن دۇنيەگە كەلگەن، ۇلت-ازاتتىق كوتەرىلىستە جەرىن قورعاعان قاراش باتىر. اقتەرەك ورتا مەكتەبىنىڭ كوركەيۋىنە ءبىراز جىل ەڭبەگى سىڭگەن، ديرەكتورلىق قىزمەت اتقارعان ءجۇمادىل ەسداۋلەتوۆ. وسىنداي تۇلعالار شىققان ءبىزدىڭ اۋىلدىڭ حالقى دا ءوز ەلىنە جاناشىر، بىر-بىرىنە مەيىرىمدى جاندار. ءبىزدىڭ ولكەنى "اقىندار مەن باتىرلار اۋىلى" دەپ تەگىن ايتپاسا كەرەك.
وسىنداي بەرەكەسى مەن بىرلىگى جاراسقان اۋىلدا دۇنيەگە كەلگەنىمە ماقتانامىن. "تۋعان جەرگە تۋىڭدى تىك" دەمەكشى مەن دە بولاشاقتا ەلىمە قىزمەت ەتىپ، ءبىر كىرپىشى بولىپ قالاناتىنىما سەنىمدىمىن. ايتىلماي، ەڭبەگى ەلەنبەي جۇرگەن تۇلعالارىمىز قانشاما... تۋعان ەلگە دەگەن قۇرمەت ءار قازاقتىڭ بالاسىنىڭ جۇرەگىندە بولۋى كەرەك دەپ ويلايمىن. مەن ەلىمدى الەمگە تانىتقىم كەلەدى. سول سەبەپتى دە جۋرناليست ماماندىعىن تاڭدادىم. ەلىمنەن شىققان تۇلعالار جايلى ءالى تالاي ماقالا جازاتىن بولامىن.
You Might Also Like
-
ابىلاي حان زامانىندا ورىس جۇرتىنان وتىز كىسى ەلشىلىككە كەلىپ، قىس ءتۇسىپ كەتكەن سوڭ قازاق ىشىندە قىستاپ قالىپ، مالاي-جادىگەر قويلىباي باي ءبىر قىس ءجۇز اق قارا باس قوي سويىپ كۇتىپ، قىستان اشىقتىرماي، ...
-
بىزگە كورشى ۇيدە امانگەلدى دەگەن بەس جاسار بالا بار ەدى. مايداندا قايتىس بولعان اكەسى قاريدان اۋماعان الا كوز، كەسەك، قارا بالا بولاتىن.
