InfoHub Logo

و باستا تۇلكىنىڭ قۇيرىعى جوق ەكەن. قاسقىر مەن تۇلكى اراز بولىپتى. قاسقىر قايدا بارسا دا تۇلكىنىڭ ءىزىن اڭدىپ، سوڭىنان قالمايدى، ۇستاپ الىپ تالاپ، جەي بەرىپتى. ءىزىن جاسىرا الماعان تۇلكى اۋىر ازاپ شەگىپتى.

ءبىر قاسقىر تاعى دا اڭدىپ، تۇلكىنىڭ ىزىنە ءتۇسىپتى. تۇلكى قاشىپ بارىپ، ىنىنە تىعىلادى. سول كەزدە قاسقىر دا جەتىپ، تۇلكى ءىنىنىڭ اۋزىن تىرمالاپ، قازا باستاپتى. وسىنداي ءقاۋىپتى الدىن الا ويلاعان تۇلكى ىنىنە ەكى اۋىز جاساعان ەكەن. الگى قاسقىر ءىننىڭ ءبىر اۋزىن قازىپ جاتقاندا، تۇلكى ەكىنشى اۋزىنان بايقاتپاي سىرتقا شىعىپ كەتىپتى.

سودان قالىڭ توعايعا كەلىپ سىڭەدى. سول جەردە جايىلىپ جۇرگەن قويانعا كەزدەسىپ قالىپتى. ول زاماندا قوياننىڭ قۇيرىعى شۇبالعان ۇزىن بولىپتى. زىمىراي جۇگىرۋىنە، جاۋىننان قاشىپ قۇتىلۋىنا كەدەرگى جاساپ، ادىمىن اشتىرمايدى ەكەن.

توعايدا بۇلاڭداپ جۇرگەن ۇزىن قۇيرىقتى قوياندى الگى ءوزى قاسقىردان قاشىپ كەلگەن تۇلكى ۇستاپ الىپتى. اۋىز سالا بەرگەندە، قويان زار ەڭىرەپتى:

– تۇلكىجان، سەن مەنى ولتىرمە، مىناۋ ادەمى قۇيرىعىمدى ساعان بەرەيىن. كوردىڭ بە، قانداي سۇلۋ. ساعان جاراسا كەتەدى، – دەپ، ارىزىن ايتىپتى.

بۇلاڭداعان قۇيرىققا تۇلكى دە قىزىعىپتى. «سىپىرتقى قۇساعان مىنا قۇيرىقپەن ارتىمدا قالعان ءىزىمدى سىپىرىپ، ءوشىرىپ، كەتە بەرۋىمە دە بولاتىن ءتۇرى بار. سوندا قاسقىر دا، باسقا قۋعىنشىلار دا ىزىمنەن اداسىپ قالماي ما؟» – دەپ ويلاپتى. وسى ماقساتپەن:

– ەندەشە، اكەل قۇيرىعىڭدى! – دەپ، قوياننىڭ شارتىنا كونىپتى. قويان بۇلاڭداعان ۇزىن قۇيرىعىن تۇلكىگە بەرىپتى. تۇلكى ءوزىنىڭ ويماقتاي قۇيرىعىن جۇلىپ تاستاپ، قوياننىڭ قۇيرىعىن قاداپ الىپتى. ءسويتىپ، بۇلاڭداپ كەتە بارادى. قويان الگى تۇلكىنىڭ تاستاپ كەتكەن الاقانداي قۇيرىعىن يەمدەنەدى. قويان مەن تۇلكى قۇيرىقتارىن وسىلاي ايىرباستاعان ەكەن.

---