InfoHub Logo

ۇبت ماۋسىمنىڭ 20-سى مەن شىلدەنىڭ ءبىرى ارالىعىندا 15ء-شى رەت وتەدى. تەست تاپسىرمالارىنىڭ بىلتىرعى داۋ تۋدىرعان تۇستارى بيىل جەتىلدىرىلىپ، تۇزەتىلگەن.

ۇبت الدىنداعى تىنىشتىق

تۇلەكتەر مەكتەپ ءبىتىرۋ ەمتيحاندارىن تاپسىرىپ بولدى. ەندى ۋنيۆەرسيتەتكە ءتۇسۋ ءۇشىن ۇبت-دان مۇدىرمەي ءوتۋ كەرەك.

بىلتىر ۇلتتىق تەستىلەۋ فورماتى وزگەرتىلگەن بولاتىن. بيىل بارلىعى سول قالپىندا قالىپ، تەك "التىن بەلگى" يەگەرلەرىنە قويىلاتىن تالاپ قانا وزگەرىپتى.

الداعى سىناقتا نەگە ءمان بەرۋ كەرەك؟ قانداي ماماندىققا گرانت كوپ بولىنەدى؟ وسى ماسەلەلەردى بىرگە قاراستىرىپ كورەيىك.

تەستى اعىلشىن تىلىندە تاپسىرۋعا بولادى

بۇل – ءوز ەركىڭىزدەگى تاڭداۋ. بەلگىلى ءبىر سەبەپتەرگە بايلانىستى تەستىلەۋگە قاتىسا المايتىن بولساڭىز، كوميسسيا وزگە توپپەن تاپسىرۋعا رۇقسات بەرەدى.

شەكتى بالدان اسا الماعاندار ۇلتتىق ءبىرىڭعاي تەستىنى 2018 جىلدىڭ تامىزىندا قايتا تاپسىرا الادى. ءبىراق، گرانت الامىن دەپ ۇمىتتەنبەسىن.

ەكىنشى رەت تەستىلەۋدەن وتە الماي قالسا دا، تۇلەكتىڭ ۋنيۆەرسيتەتتەردە وقۋ مۇمكىندىگى ۋاقىتشا ساقتالادى. وندا وقۋ جىلىنىڭ جارتىسىن وقىپ، كەلەسى جىلدىڭ قاڭتارىندا قايتادان تەست تاپسىرۋى ءتيىستى.

ءتىپتى ءۇشىنشى سىناقتان دا وتە الماعان جاعدايدا كەلەسى جىلى كەشەندى تەستىنى قايتا تاپسىرا الادى.

مەكتەپتە بارلىق ەمتيحاندار اياقتالدى

تۇلەكتەر بىلتىردان باستاپ تومەندە كورسەتىلگەن فورمات بويىنشا 29 مامىر مەن 9 ماۋسىم ارالىعىندا مەكتەپ ءبىتىرۋ ەمتيحانىن تاپسىرىپ ءجۇر.

- انا ءتىلى جانە ادەبيەت پاندەرىنەن 250-300 سوزدەن تۇراتىن ەسسەنى جازۋعا 3 ساعات بەرىلەدى. ۇسىنىلعان ءۇش تاقىرىپتان وقۋشى بىرەۋىن تاڭدايدى.

- ورىس، وزبەك، ۇيعىر جانە تاجىك تىلىندە وقىتاتىن مەكتەپتەردىڭ تۇلەكتەرى قازاقشا، ال قازاق تىلىندە وقىعاندار ورىسشا تەست تاپسىرادى. 1 ساعات 20 مينۋتتا تىڭدالىمنىڭ 10 تەست تاپسىرماسىن (2 ءماتىن)؛ لەكسيكا-گرامماتيكادان 20 تەست تاپسىرمانى؛ وقىلىمنان 10 تەست تاپسىرمانى (2 ءماتىن) ورىندايدى.

- تەست فورماتى بەرىلگەن بەس جاۋاپتىڭ بىرەۋىن تاڭداۋعا ارنالعان تاپسىرمادان تۇرادى.

- قازاقستان تاريحىنىڭ سۇراقتارىنا اۋىزشا جاۋاپ بەرەدى. ءار بيلەتتە ءۇش سۇراقتان بولادى. ەكى تەوريالىق سۇراق قازاقستان تاريحىنىڭ بارلىق ساباعىنىڭ نەگىزگى بولىمدەرىنەن الىنادى، ءۇشىنشى سۇراق شىعارماشىلىق تۇرعىدا (كارتا، كەسكىندەر، پورترەتتەر، حرونولوگيالىق كەستەلەر پايدالانۋ ارقىلى تاپسىرما ت.ب.). جاۋاپ بەرۋگە دايىندالۋعا كەمىندە 20 مينۋت بەرىلەدى.

- الگەبرا جانە اناليز باستامالارىن بەس ساعات جازباشا جازادى. ول بەس تاپسىرمادان تۇرادى. تاپسىرمالار ماتەماتيكالىق فاكتىلەر، تۇسىنىكتەر جانە تاسىلدەردى مەڭگەرۋ دەڭگەيىن، ەسەپ پەن لوگيكالىق تاپسىرمالاردى شەشۋ قابىلەتىن، فۋنكسيونالدىق ساۋاتتىلىقتى تەكسەرۋگە ارنالعان؛

- تاڭداۋ ءپانى بويىنشا تەست 40 سۇراقتان تۇرادى. 1 ساعات 20 مينۋت ۋاقىت بەرىلەدى. 60 بالمەن باعالانادى. ونىڭ 20 سۇراعىندا ءبىر دۇرىس جاۋاپتان. ءبارىن تاپقانعا 20 بالل بەرىلەدى. كەلەسى 20 سۇراقتىڭ بىرنەشە دۇرىس جاۋابى بولادى. 40 بالمەن باعالانادى. قورىتىندى اتتەستاتتاۋدىڭ ماتەريالدارى (جاۋاپ پاراقتارى، سۇراق كىتاپشالارى ت.ب.) مەكتەپتە ءبىر وقۋ جىلى بويى ساقتالادى.

"ۇبت-دان كۇشتەپ باس تارتقىزۋعا ەشكىمنىڭ قۇقى جوق"

– بيىل ەلىمىز بويىنشا 146 695 وقۋشى مەكتەپ بىتىرەدى. ولاردىڭ 44 253ء-ى ۇبت تاپسىرۋعا قۇلىقتى ەمەس.

نەگە؟ سەبەبى، جوعارى وقۋ ورىندارىنا تۇسكىسى كەلگەندەرى عانا تەست تاپسىرادى. كەيبىرى شەتەلگە وقۋعا، ەندى ءبىرى كوللەدجگە تۇسكىسى كەلەدى. ۋنيۆەرسيتەتتە وقىعاننان گورى كاسىپكەرلىكپەن اينالىسقاندى قۇپ كورەتىندەر بار.

مەكتەپتىڭ ابىرويىن عانا ويلاعان باسشىلار تۇلەكتى ۇبت تاپسىرۋدان اينىتىپ، كوللەدجگە تۇسۋگە ۇگىتتەۋى مۇمكىن. ونداي جاعدايدا وقۋشى اتا-اناسىمەن بىرگە اكىمشىلىك بەكىتىلگەن تەست ورتالىقتارىنا بارىپ، ءوتىنىشىن قالدىرا الادى. ءبىراق، وعان ءقازىر كەشىكتى.

– تۇلەك ءوزىنىڭ بىلىمىنە سەنىمدى بولسا، تەستەن باس تارتۋ وعان دا ءتيىمسىز. 9 سىنىپتان كەيىنگى ەكى جىلى زايا كەتكەنمەن بىردەي. ال شەتەلدە ءبىلىم الامىن دەۋشىلەرگە تەستىلەۋدەن ءوتۋ مىندەتتى ەمەس، – دەيدى ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم بەرۋ باسقارما باسشىسى جاكەنوۆ تالعات.

ۇلتتىق ءبىرىڭعاي تەستكە سىناق بارىسىندا جالپى ورتا ءبىلىمى بارلار ءۇشىن ءۇش پاننەن 30 بالدان كەم، ءبىلىم، قۇقىق، ەكونوميكا، مەديسينا جانە فارماسيەۆتيكا ماماندىقتارى بويىنشا 35 بالدان كەم، ونىڭ ىشىندە بەيىندى پاننەن (تۇلەكتىڭ تاڭداعان ماماندىعىنا بايلانىستى تاپسىراتىن پاندەر) 17 بالدان كەم جيناعاندار جىبەرىلمەيدى.

ەستەرىڭىزگە سالا كەتسەك، ۇبت-كە قاتىسۋ ءۇشىن ءوتىنىش بيىل 10 ناۋرىزدان 10 مامىرعا دەيىن قابىلداندى.

تۇلەكتەر ەرتەڭ، 15 ماۋسىم كۇنى اتتەستاتتارىن قولدارىنا الادى

– سول كەزدە مەكتەپتەگى ەمتيحاننىڭ ناتيجەسى بەلگىلى بولادى. "التىن بەلگى" يەگەرلەرىن ءبىلىم جانە عىلىم مينيسترلىگى ەمەس، مەكتەپ ديرەكتورلارى وزدەرىنىڭ بۇيرىقتارىمەن بەكىتەدى.

ولار ۇبت تاپسىرۋعا بارعاندا "التىن بەلگى" يەگەرى ەكەنىن راستايتىن اتتەستاتى مەن ءتوس بەلگىسى قالتاسىندا بولادى. 11 جىل بويى ساباقتى تەك بەستىك باعاعا وقىپ، ۇلتتىق ءبىرىڭعاي تەستەن ءتورت الىپ قالعانى ءۇشىن ءتوس بەلگى بەرىلمەسە، تۇلەكتىڭ ەڭسەسى تۇسپەي مە؟ 3 جارىم ساعاتتىڭ ىشىندە 5 سىنىپتان بەرى قاراي ۇزدىك وقىعان ەڭبەگى انىق باعالانباي قالادى. ءتىپتى وبال. بىلتىردان باستاپ جۇيە وزگەرىپ، جاڭا فورمات جۇزەگە اسىپ جاتىر.

مينيسترلىك "التىن بەلگى" يەگەرلەرىنىڭ سانىنا، ولاردىڭ جوعارى وقۋ ورىندارىنداعى ۇلگەرىمدەرىنە تالداۋ جۇرگىزەتىن بولادى. سونداي-اق مەكتەپتەگى جۋرنالدان 11 جىل ىشىندە العان باعالارىن دا قارايدى. "التىن بەلگى" يەگەرى تومەن بالل الىپ، جوعارى وقۋ ورنىنا تۇسە الماي قالسا، وعان مەكتەپ ديرەكتورى جاۋاپتى بولادى. بىلتىر بەس مىڭعا جۋىق تۇلەك "التىن بەلگى" يەگەرى اتاندى. بيىل 7 مىڭعا جۋىق ۇمىتكەر بار، – دەيدى تالعات جاكەنوۆ.

بيىل "التىن بەلگى" يەگەرلەرىنە باسىمدىق بەرىلمەيدى

– بيىلعى وقۋى جىلىن "التىن بەلگىمەن" اياقتاعان تۇلەكتەر تەك ۇبت-دا جيناعان بالىنا قاراي گرانت يەگەرى اتانا الادى. ياعني، جاپپاي گرانتقا قول جەتكىزە المايدى. جاڭا زاڭدى جوعارى وقۋ ورىندارىنىڭ اكادەميكتەرى قولدادى. سونىمەن قاتار دەپۋتاتتاردان دا رۇقسات سۇراپ، بۇل وزگەرىستى قابىلدادىق. "التىن بەلگى" يەگەرى 120 بالل، قاتارداعى تۇلەك 125 بالل جيناسا، بەلگى يەسىنە ەمەس، ۇپايى جوعارى بالاعا باسىمدىق بەرىلەدى.

"التىن بەلگى" يەگەرى بولۋىنىڭ ءبىر عانا پايداسى بار. ۇبت ناتيجەسى بويىنشا بالل سانى بىردەي بولىپ، ءبىر ورىنعا بىرنەشە ۇمىتكەر تالاسقان جاعدايدا عانا "التىن بەلگى" يەگەرى ەسكەرىلەدى.

بىلتىر وقۋ گرانتتارىن بولگەندە، "ادىلەتسىزدىك بولدى" دەپ كوپ اتا-انا شاعىم تۇسىرگەن. ءبىلىم جانە عىلىم سالاسىنداعى باقىلاۋ كوميتەتى كەيبىر مەكتەپتەردىڭ قۇجاتتارىن تەكسەرگەن بولاتىن. "التىن بەلگىنى" نەگىزسىز تاراتقان دەرەكتەر كەزدەستى. ەندى ۇبت-دان جوعارى بالل جيناي الماعان، ءبىراق مەكتەپتى ۇزدىك بىتىرگەن تۇلەكتەر "التىن بەلگى" يەگەرى بولىپ قالا بەرەدى، – دەيدى تالعات جاكەنوۆ.

"التىن بەلگى" ءتوس بەلگىسىن ساتقانداردىڭ ارەكەتى – زاڭسىز

– الەۋمەتتىك جەلىلەردە ءتوس بەلگىنىڭ 500 مىڭعا باعالانىپ جاتقانى تۋرالى مينيسترلىككە اقپارات كەلىپ تۇسكەن جوق. ونداي جاعداي بولعان كۇننىڭ وزىندە بەلگىنىڭ ارنايى كۋالىگى بار. ول ناقتى ءبىر ادامعا عانا بەرىلەدى. كورسەتىلگەن ءاتى-جونىن قالاي اۋىستىرۋعا بولادى؟

^{بۇل حابارلاندىرۋ 25 قاڭتار كۇنى تۇنگى ساعات 12-دەن 45 كەتكەندە جۇكتەلگەن. وندا گەولوكاسيا الماتى وبلىسى الاتاۋ اۋدانى دەپ كورسەتىلىپ تۇر / sn.kz سايتىنان الىندى}

بالكىم، "التىن بەلگىنىڭ" پايداسىن كورگەن سوڭ ساتقالى جاتقان بولار. ونى ساۋدالاپ ساتاتىنداي "التىن بەلگىنىڭ" قۇرامى التىن ەمەس قوي.

ق ر "ءبىلىم تۋرالى" زاڭىندا "التىن بەلگى" تۋرالى ەرەجە بار. وندا: "التىن بەلگىنىڭ" ديامەترى 30 مم، مىس جانە مىرىش مەتالدارىنىڭ ارنايى قورىتپاسىنان دايىندالادى" دەلىنگەن. ساتىپ الۋشىعا ونىڭ ەشقانداي پايداسى جوق. سوندىقتان، ول مەدال كىمگە كەرەك؟ "التىن بەلگى" يەگەرىنىڭ ءتوس بەلگىسىن ساتۋعا، وزگە بالاعا سىيعا تارتۋعا قۇقى جوق.

ۇلتتىق ءبىرىڭعاي تەستىلەۋ سۇراقتارىنىڭ 50%-ى جاڭارتىلدى

2018 جىلى ءبىرىڭعاي ۇلتتىق تەست بازاسىندا 110 000 سۇراق بار. بىلتىر 40 000 سۇراق قانا بولاتىن. ونىڭ 3000 سۇراعى اعىلشىن تىلىندە.

جىل سايىن ۇلتتىق تەستىلەۋ ورتالىعى تاپسىرمالاردىڭ 35 پايىزىن جاڭارتادى. بيىل دا بازا جاڭا سۇراقتارمەن تولىقتىرىلدى. ولاردىڭ 11% ساۋاتتىلىققا باعىتتالسا، ال 37% تەست سۇراقتارىنىڭ ءبىر نەمەسە بىرنەشە جاۋاپتارى بار.

بيىلعى جىلدىڭ سۇراقتارى بىلتىر دايىندالعان

دايىنداۋ بارىسى 5 كەزەڭنەن تۇرادى. بىرىنشىسىندە تەست تاپسىرمالارىن دايىندايدى، ەكىنشى كەزەڭدە ساراپتاماعا جىبەرىپ، مۇعالىمدەر مەن ماماندار بىلتە شاممەن قاراعانداي تەكسەرەدى. ودان كەيىن ەكىنشى رەت ساراپتامادان وتەدى. ماماندار تاعى قارايدى.

دايىندالعان سۇراقتاردىڭ 10 پايىزىن كىتاپشاعا ەنگىزىپ، وقۋشىلاردىڭ جاۋاپ بەرۋ دەڭگەيىن بايقايدى. قاتە كەتكەن تۇستارى بولسا، قايتادان ءجىتى تەكسەرىلەدى. سودان كەيىن تەست سۇراقتارى قۇپيالاندىرىلادى. استاناداعى ماماندار جابىق كەڭسەگە كىرەر كەزدە، وقۋشىلاردىڭ ۇيالى تەلەفوندارىن جيناپ الادى. ينتەرنەتكە قوسىلمايتىن، تەك جەرگىلىكتى توراپتاعى (لوكالنايا سەت) كومپيۋتەرلەر ارقىلى تەست سۇراقتارى بازاعا ەنگىزىلەدى.

مىسالى، ءقازىر 2019 جىلعى ۇلتتىق ءبىرىڭعاي تەستىڭ نۇسقاسى ءبىرىنشى ساراپتامادان ءوتتى. 2018 جىلعى 4-13 ماۋسىم ارالىعىندا ۇلتتىق تەستىلەۋ ورتالىعىنىڭ بازاسىندا 57 ساراپشى جۇمىلدىرىلدى. ءبىرىنشى ساراپتامانىڭ ناتيجەسى بويىنشا انىقتالعان تەست تاپسىرمالارى 2018 جىلعى تامىز ايىندا وتەتىن ەكىنشى ساراپتاماعا ۇسىنىلادى.

تانىمال ارتىستەر تۋرالى سۇراقتار الىنىپ تاستالدى

وتكەن جىلى ۇلتتىق ءبىرىڭعاي تەستىڭ سىناق كىتاپشالارىندا بايان ماقسات قىزى، نۇرتاس ادامباي جانە تاعى باسقا تانىمال ادامدار تۋرالى سۇراقتار كەزدەسكەن بولاتىن. ەندى بارلىق سۇراقتار تەك وقۋ باعدارلاماسىن قامتيدى جانە ءبىلىم بەرۋ تالاپتارىنا ساي.

بيىل كەلەڭسىز ساۋالداردىڭ كەزدەسپەيتىنىنە ۇلتتىق تەستىلەۋ ورتالىعىنىڭ ديرەكتورى رامازان ءالىمقۇلوۆ سەندىرەدى.

2018 جىلى قاعاز تەستەر اينالىمعا كەش شىقتى

مۇنىڭ بارلىعى مەملەكەتتىك ساتىپ الۋعا بايلانىستى. تەندەردى ۇتىپ العاننان كەيىن باسپالار ەكى اي ىشىندە تەستەردى اينالىمعا شىعارادى. جىل سايىن وسىلاي جۇزەگە اسادى.

اتا-انالاردىڭ نەگە شۋلاعانىن تۇسىنبەدىك. بىلتىر شىعارىلعان كىتاپشالاردى كەز-كەلگەن ۋاقىتتا ساتىپ الۋعا بولادى. ناۋرىز ايىنا قاراي تەستەردىڭ جاڭا نۇسقاسى جاريالاندى. جەتىمدەر مەن مۇگەدەكتەرگە كىتاپشالار تەگىن تاراتىلعان.

سىناق تەستەرى بارلىق نۇسقالار بويىنشا "ەگەمەن قازاقستان" گازەتىندە جاريالاندى. سايتتا دا شىقتى. بۇل تۋرالى ۇلتتىق تەست ورتالىعىنىڭ ديرەكتورى رامازان ءالىمقۇلوۆ مالىمدەدى.

بيىل تۇلەكتەردىڭ 75 پايىزى ۇبت-نى قازاقشا تاپسىرادى

– تۇلەككە قاي تىلدە تاپسىرۋ ىڭعايلى بولسا، سوعان قاراي جۇيەنى دە بەيىمدەپ جاتىرمىز، – دەيدى رامازان ءالىمقۇلوۆ.

ۇبت تاپسىرۋعا ءوتىنىش بىلدىرگەن 102 مىڭ 442ء-نىڭ 77 223 تۇلەك قازاقشا تاپسىرادى. 200-دەي وقۋشى اعىلشىن تىلىندە تاپسىرۋعا تىلەك ءبىلدىردى. نەگىزىنەن نازاربايەۆ زياتكەرلىك مەكتەبىنىڭ تۇلەكتەرى.

شەت تىلىندەگى سۇراقتاردى مەكتەپتەگى اعىلشىن تىلىنەن ساباق بەرەتىن مۇعالىمدەر ازىرلەگەن. اعىلشىن تىلىندەگى سۇراقتاردىڭ قازاقشا جانە ورىسشا نۇسقادان ايىرماشىلىعى جوق. ولارعا سوزدىكتى پايدالانۋعا رۇقسات بەرىلەدى. قوسىمشا ورىس، قازاق تىلىندەگى كىتاپشاسىنا ۇقساس جيناقتار بەرىلەدى.

شەكتى بالدىڭ مولشەرى ماماندىققا قاراي ءار ءتۇرلى

جوو-نا ءتۇسۋ ءۇشىن باعانىڭ ەڭ تومەنگى شەگى وزگەرىسسىز – 50 بالل دەڭگەيىندە قالدىرىلدى. ءبىراق، ۇلتتىق ۋنيۆەرسيتەتتەرگە ءتۇسۋ بالىنىڭ ەڭ تومەنگى شەگى – 65 بالل.

ءبىلىم، اۋىلشارۋاشىلىعى، ۆەتەريناريا سالاسىنداعى ماماندىقتارعا 60 بالل جيناماعاندار تۇسە المايدى. ال وسى ماماندىقتاردى ۇلتتىق ۋينۆەرسيتەتتەردە وقىعىسى كەلسە، كەمىندە 65 بالل جيناۋى كەرەك. مەديسينالىق باعىتتارداعى ماماندىقتار دا تۋرا وسىنداي.

ماتەماتيكالىق ساۋاتتىلىق، وقۋ ساۋاتتىلىعى – وقىتۋ ءتىلى بويىنشا كەمىندە 5 بالل جانە ءار بەيىندىك پاننەن كەمىندە 5 بالل جيناۋ قاجەت.

بۇرىن ورىس مەكتەپتەرى قازاق ءتىلىن، قازاق مەكتەپتەرى ورىس ءتىلىن تاپسىرعانىمەن بالى ەسكەرىلمەيتىن. جاڭا فورمات بويىنشا، بارلىق پاندەردىڭ سۇراقتارىنىڭ جاۋاپتارى ەسەپتەلەدى. ءبىر سۇراقتىڭ جاۋابى بىرنەشەۋ بولۋى مۇمكىن. بۇل تۇستا ويلانباي، ءبىر عانا جاۋاپتى بەلگىلەيتىن بولسا، بالل سانى قىسقارادى. سوندا بارلىق سۇراق – 120. ءبىراق، 140 بالل جيناي الادى.

ءاربىر تالاپكەرگە ۇبت كۋالىگىمەن بىرگە ماماندىقتاردىڭ ءتىزىمى بەرىلەدى

– ونىڭ ىشىندە بيىل بولىنەتىن گرانت سانى مەن بىلتىرعى ءتىزىمى بار اقپاراتتىق پاراق تاراتىلادى. بۇل تۇلەككە ۇبت-دا جيناعان بالىنا ساي ماماندىقتى دۇرىس تاڭداۋعا مۇمكىندىك بەرەدى.

ەرەكشە قاجەتتىلىكتەرى بار بالالارعا جەكە كومەكشى، ىم-يشارات ءتىلىن بىلەتىن مامان ۇسىنىلادى. تالاپكەردىڭ ۇبت-نى ەكىنشى رەت تاپسىرۋ قۇقىعى ساقتالادى. وتكەن جىلدىڭ قورىتىندىسى كورسەتكەندەي، بۇل شارا قوسىمشا 30 مىڭ جاسقا جوعارى ءبىلىم الۋعا مۇمكىندىك بەردى، – دەيدى ءبىلىم جانە عىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى سۆەتلانا ىسماعۇلوۆا.

مەملەكەتتىك گرانتتىڭ 11 مىڭى تەحنيكالىق ماماندىقتارعا بەرىلەدى

– 2017 جىلى ۇبت-عا قاتىسقان 88 583 مەكتەپ ءبىتىرۋشىنىڭ 77 520ء-ى تەستىلەۋدەن ءوتتى. ونىڭ تەك 31 702ء-ى گرانت يەگەرى اتاندى. دەمەك، 45 818 تالاپكەر اقىلى تۇردە وقۋعا ءماجبۇر بولدى. ال 11 063 تۇلەك شەكتى بالدى جيناي المادى. بيىل گرانت سانى 21 892-گە كوبەيتىلىپ، جالپى سانى 53 594-كە جەتتى.

ەندى تۇلەك قانداي ماماندىققا تاپسىرسا دا، گرانتقا وقۋعا مۇمكىندىگى بار. ءتىزىمدى شولىپ شىعىپ، نازارلارىڭىزعا ەڭ كوبىن ۇسىنىپ وتىرمىز.

جالپى مەديسينا ماماندىعىنا 2152 گرانت ءبولىندى. تولىق وقىتۋ بويىنشا قازاقشا بولىمگە – 1614، ورىسشا بولىمگە – 538.

تەحنولوگيالىق ماشينا جانە جابدىقتاۋ (سالا بويىنشا) ماماندىعىنا 690 گرانت ءبولىندى. تولىق وقىتاتىن قازاق بولىمىنە – 480، ورىس بولىمگە – 160. قىسقاشا وقىتىلاتىن قازاق بولىمگە – 38، ورىس بولىمگە – 12. تولىق ءتىزىمدى ماقالانىڭ سوڭىندا كەلتىرگەن سىلتەمە ارقىلى بىلە الاسىزدار.

ۇبت وتەتىن 512 ءدارىسحانادا 4G ءموبيلدى بايلانىس جوق

ۇلتتىق ءبىرىڭعاي تەستى 1500 ءدارىسحانادا تاپسىرادى. كوبىندە 3G ءموبيلدى بايلانىس بار. ونىڭ 512-دە 4G ينتەرنەت مۇلدەم ۇستامايدى. ءاربىر ءدارىسحاناعا ينتەرنەت سوندىرگىش، مەتالل ىزدەگىش، ۆيەدو كامەرالار ورناتۋ – اكىمشىلىكتىڭ مىندەتى.

بالاسىنىڭ قالاي تەست تاپسىرىپ جاتقانىن سىرتتا كورىپ وتىراتىنداي اتا-انالارعا جاعداي جاسالۋ كەرەكتىگىن ءبىلىم جانە عىلىم ءمينيسترى ەرلان ساعادييەۆ ايتقان بولاتىن. پرەمەر-مينيستر باقىتجان ساعىنتايەۆ ءبىلىم جانە عىلىم مينيسترلىگىنە ءۇبت-تىڭ جوعارى دارەجەدە ءوتۋىن تاپسىردى. ىشكى ىستەر، دەنساۋلىق ساقتاۋ مينيسترلىگى، ۇلتتىق قاۋىپسىزدىك كوميتەتى ۇبت تاپسىرۋشىلاردىڭ قاۋىپسىزدىگىنە جاۋاپ بەرەتىنىن، ال اكىمشىلىككە سۇراق مازمۇنىن قاداعالاۋ تاپسىرىلاتىنىن ايتا كەتتى.

تەستىلەۋ وتەتىن جەردە مىندەتتى تۇردە ءدارى قوبديشاسى تۇرۋى كەرەك. مەنينگوكوك ىندەتىنە بايلانىستى اۋديتوريالار الدىن الا جەلدەتىلىپ، تازارتىلادى.

ءبىرىنشى تەستىلەۋدە 140 بالل جيناعانعا iPhone سىيعا تارتىلادى

14 جىلدىڭ ىشىندە تەستىلەۋگە 1،6 ملن قازاقستاندىق قاتىسقان ەكەن. بيىل ۇبت 167 ورتالىقتا وتەدى: جوو بازاسىندا – 48؛ كوللەدجدەر بازاسىندا – 3؛ مەكتەپتەر بازاسىندا – 116.

ءبىلىم جانە عىلىم مينيسترلىگىنىڭ ۇلتتىق تەستىلەۋ ورتالىعىنىڭ ديرەكتورى رامازان ءالىمقۇلوۆ ءۇبت-دىڭ 15 جىلدىعىنا وراي ءبىرىنشى كەزەگىندە ەڭ جوعارى بالل جيناعان تۇلەككە iPhone سىيلاۋعا ۋادە بەردى.

ۇبت قالاي وتەدى؟

تەستىلەۋ بەس پاننەن تۇرادى. تالاپكەر 3 ساعات 50 مينۋتتا (230 مينۋتتا) 2 بولىمدە ورنالاسقان 120 تاپسىرمانى ورىنداۋ قاجەت.

1 – مىندەتتى (3 ءپان): ماتەماتيكالىق ساۋاتتىلىق، وقۋ ساۋاتتىلىعى، قازاقستان تاريحى. ءارقايسىسى 20 تەست تاپسىرماسىنان تۇرادى.

2 – تاڭداۋ نەمەسە بەيىندى (2 ءپان). بۇل بولىمگە بىرنەشە پاندەر كىرەدى. ەمتيحان تاپسىرۋشى تاڭدايتىن ماماندىعىنا سايكەس بۇل پاندەردى تەرەڭ يگەرۋى قاجەت. مىسالى، ماتەماتيكا مەن فيزيكانى تاپسىرعان تالاپكەر 52 ماماندىقتىڭ ىشىنەن تاڭداي الادى. ءبىر بەيىندى ءپان بويىنشا تەستىنىڭ 30 سۇراعى بولادى. ونىڭ 20 سۇراعىنىڭ بىر-بىردەن عانا جاۋابى دۇرىس بولسا، قالعان 10 ساۋالدىڭ ءبىر نەمەسە بىرنەشە جاۋابى بولادى.

تەستەردىڭ مازمۇنى مەن قۇرىلىمىن ءبىلىم جانە عىلىم مينيسترلىگى مەن ۇلتتىق تەستىلەۋ ورتالىعىنىڭ سايتىنان قاراستىرۋعا بولادى.

ۇبت سەرتيفيكاتى تەستىلەۋ وتكەن جىلدىڭ 31 جەلتوقسانىنا دەيىن جارامدى.

ەگەر تەست تاپسىرۋشى العان ناتيجەسىمەن كەلىسپەسە...

ۇبت وتكىزۋ پۋنكتەرىندەگى اپپەلياسيالىق كوميسسياعا ءوتىنىش بىلدىرە الادى. ونى تەست ناتيجەسى شىققاننان كەيىن، كەلەسى كۇنى ساعات 13:00-گە دەيىن بەرە الادى جانە ول سول كۇن ىشىندە قاراستىرىلادى.

ءوتىنىشتى تەستىلەنۋشى ءوزى جازادى.وندا تاپسىراتىن ءپان اتاۋى، سۇراقتار ناقتى كورسەتىلۋى كەرەك. ءوتىنىش بەرۋشىنىڭ وزىمەن بىرگە جەكە كۋالىگى، كىرۋ قاعازى بولۋى قاجەت. بىلتىر ۇلتتىق تەستىلەۋ ورتالىعىنا 12 شاعىم تۇسكەن. ولاردىڭ كوپشىلىگى تەحنيكالىق جاعىنان كەتكەن قاتەگە بايلانىستى.

ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن نە تاپسىرۋ كەرەك؟

تالاپكەر جوعارى وقۋ ورنىنىڭ قابىلداۋ كوميسسياسىنا:

– بەلگىلەنگەن ۇلگىدەگى ءوتىنىشتى؛

– ءبىلىمى تۋرالى قۇجاتتى (ءتۇپنۇسقا)؛

– ۇبت سەرتيفيكاتىت؛

– 3x4 كولەمىندەگى ەكى فوتوسۋرەت؛

– 086-ۋ نىسانى بويىنشا مەديسينالىق انىقتامانى؛

– جەكە باسىن كۋالاندىرەتىن قۇجاتتىڭ كوشىرمەسىن تاپسىرادى.

گرانتتاردىڭ جالپى سانىنىڭ 70 پايىزى جالپى كونكۋرس تارتىبىمەن بەرىلەدى. ال قالعان 30 پايىزى تەك اۋىل جاستارى اراسىنان شىققان ازاماتتارعا تاراتىلادى.

1-10 تامىز ارالىعىندا ءبىلىم بەرۋ گرانتتارى بەلگىلى بولادى. ءبىلىم بەرۋ گرانتى يەگەرلەرىنىڭ ءتىزىمى وڭىرلىك بۇقارالىق اقپارات قۇرالدارىندا جاريالانادى.

پەداگوگيكالىق ماماندىقتاردى تاڭداعاندار جانە ارنايى ەمتيحاننان "وتكەن" تالاپكەرلەر بەيىندىك پاندەرىنە سايكەس ءتورت جوو تاڭدايدى جانە ءتورت ماماندىق بويىنشا قاتىسا الادى.

بالداردىڭ كورسەتكىشتەرى بىردەي بولعان جاعدايدا...

– "التىن بەلگى" بەلگىسىمەن ماراپاتتالعاندارعا؛

– جالپى بiلiم بەرەتiن پاندەر بويىنشا حالىقارالىق وليمپيادالار مەن عىلىمي جوبالار كونكۋرستارىنىڭ (عىلىمي جارىستاردىڭ) (بiرiنشi، ەكiنشi جانە ءۇشiنشi دارەجەلi ديپلومدارمەن ماراپاتتالعاندارعا)؛

– حالىقارالىق جانە رەسپۋبليكالىق كونكۋرستارىنىڭ جانە سپورتتىق جارىستاردىڭ (بiرiنشi، ەكiنشi جانە ءۇشiنشi دارەجەلi ديپلومدارمەن ماراپاتتالعان) سوڭعى ءۇش جىلداعى جەڭiمپازدارىنا؛

– وزدەرi تاڭداعان ماماندىق وليمپيادانىڭ، كونكۋرستىڭ نەمەسە سپورتتىق جارىستىڭ ءپانiنە سايكەس كەلگەن جاعدايدا، جالپى بiلiم بەرەتiن پاندەر بويىنشا اعىمداعى وقۋ جىلىندا پرەزيدەنتتىك، رەسپۋبليكالىق وليمپيادالار مەن عىلىمي جوبالار كونكۋرستارى (بiرiنشi، ەكiنشi جانە ءۇشiنشi دارەجەلi ديپلومدارمەن ماراپاتتالعان) جەڭiمپازدارىنا؛

– جەتiم بالالار مەن اتا-اناسىنىڭ قامقورلىعىنسىز قالعان بالالارعا؛

– كامەلەتكە تولعانعا دەيىن اتا-انالارىنان ايىرىلعان نەمەسە اتا-اناسىنىڭ قامقورلىعىنسىز قالعاندارعا؛

– I جانە II توپتارداعى مۇگەدەكتەر، بالا كەزىنەن مۇگەدەكتەر باسىمدىققا يە بولادى.

ۇبت الدىندا نە ىستەۋ كەرەك؟

كەشە رەسپۋبليكالىق "KAZBILIM" ورتالىعىنىڭ ديرەكتورى اياتجان احمەتجان Instagram جەلىسىندەگى پاراقشاسىندا جاس تۇلەكتەرگە ءسات ساپار تىلەپ، ۇبت الدىندا نە ىستەۋ كەرەكتىگىنە توقتالدى.

1 – كەز-كەلگەن قيتۇرقى اقپارات تەز تارايدى. سوندىقتان، جالعان اقپاراتقا ءمان بەرمەڭدەر! باستى ماقساتتارىڭ – ۇبت-نى ءساتتى تاپسىرۋ بولسىن!

2 – وزىڭمەن بىرگە جاسىرىن تۇردە اقپاراتتى (شپور) الىپ كىرەم دەپ ويلاماڭدار. ودان ەشقانداي پايدا جوق. ول – الاياقتىق.

3 – "وزىڭە سەن، ءوزىڭدى الىپ شىعار، قايراتىڭ مەن اقىلىڭ ەكى جاقتاپ"، – دەگەن اباي اتالارىڭا عانا سەنىڭدەر! ياعني، تەك وزىڭە سەن!

4 – قورىقپا، ابىرجىما! ودان وزىڭە كەلەر پايدا جوق. ءوزىڭدى-وزىڭ شارشاتپاۋعا تىرىس! اتا-اناڭمەن، دوستارىڭمەن باسقا تاقىرىپتا عانا سويلەس. ۇبت نەمەسە گرانت تۋرالى اڭگىمە ەندى كەرەك ەمەس.

5 – ۇبت-دا تاڭداۋ پاندەرىن بويايتىن ۇياشىقتاردى الماستىرىپ الما! وزىڭە اباي بول!

6 – ۇبت-دان بىر-ەكى كۇن بۇرىن ۇيىقتا. جاقسىلىپ تاماقتانىپ، دەم ال! تەك فورمۋلا، ۇساق تەورياعا عانا ءبىر ساعات ۋاقىت جۇمساپ كور. ال قالعان 23 ساعات جاقسىلاپ دەم ال. تەلەفونعا، الەۋمەتتىك جەلىگە قاراما، ۇستاما!

7 – تەستىلەۋدە ءبىرىنشى بارلىق بىلەتىن سۇراقتارىڭدى بىردەن بەلگىلەپ ال. قيىن پانگە نازار اۋدارام دەپ كوپ ۋاقىتىڭدى جۇمساپ، شارشاپ قالما! شارشاعان كەزدە وڭاي ءپان قيىن بولىپ كورىنۋى مۇمكىن.

8 – ۇبت كەزىندە سەرگەك وتىر. ءدارىسحانادا بولاتىن جايتتارعا ءمان بەرمە! الدىن الا اۋديتوريا بويىنشا توپتارعا كىرىپ، تەككە باس اۋىرتپا. بارشا تۇلەكتەرگە ساتتىلىك تىلەي وتىرىپ، ءوز بىلىمدەرىڭدى دالەلدەۋلەرىڭە تىلەكتەسپىز!

ءبىرىنشى سىنىپقا باراتىنداردىڭ ءبىرازى ءالى وزگە تىلدە سويلەپ ءجۇر

– 2018-2019 وقۋ جىلىندا 385-390 مىڭ بالا مەكتەپ تابالدىرىعىن اتتايدى دەپ جوسپارلانىپ وتىر. تىركەلگەنى – 384 252 بالا.

مەكتەپالدى سىنىپتاردا 169 250 بالا قازاق تىلىندە، 57 720 بالا ورىس تىلىندە، 6 497ء-ى باسقا تىلدە وقىپ جاتىر. مەكتەپكە دەيىنگى ءبىلىم بەرۋ ۇيىمدارىندا 150 785 بالا ءبىلىم الىپ وتىر. ولاردىڭ 88 174ء-ى قازاق تىلىندە، 61 502 بالا ورىس تىلىندە، 1109-ى وزگە تىلدە.

قانداي ماماندىققا گرانتتىڭ كوپ بولىنەتىنىن بىلگىڭىز كەلسە، سىلتەمەگە ءوتىڭىز.

بىلتىرعى جىلدىڭ قورىتىندىلارىمەن تانىسقىڭىز كەلسە، ۇلتتىق تەستىلەۋ ورتالىعىنىڭ مالىمەتتەر بازاسىنان بىلە الاسىزدار.

دەرەككوزى: informburo.kz

---