InfoHub Logo

قازاقستانعا كەلگەن رەسەيلىك ستريمەرلەردىڭ تىكەلەي ەفيردە قازاقستاندىق قىزداردى قورلاعان سوزدەرى جەلىدە قىزۋ تالقىلانىپ، قوعامنىڭ نارازىلىعىن تۋدىردى. بۇل جاعدايعا قاتىستى سپورتشى ءارى اكتەر ەركەبۇلان توقتار دا ءۇن قاتتى.

بۇل تۋرالى Infohub.kz اقپارات اگەنتتىگى حابارلايدى.

الماتىدا رەسەيلىك ستريمەرلەر انار ابدۋللايەۆ پەن رەنات پاشايەۆ (رەناتكو) «ۇساق بۇزاقىلىق» بابىمەن 15 تاۋلىككە قاماۋعا الىنعانى بەلگىلى بولدى. الايدا، كوپشىلىك ستريمەرلەردىڭ رەسمي كەشىرىم سۇراۋىن تالاپ ەتۋدە.

ەركەبۇلان توقتاردىڭ ەسكەرتۋى

قازاقستاندىق ارالاس جەكپە-جەك شەبەرى ەركەبۇلان توقتار ءوزىنىڭ Instagram پاراقشاسىندا ۆيدەو ۇندەۋ جاريالادى. ول الدىمەن قازاق تىلىندە، سودان كەيىن ورىس تىلىندە ستريمەرلەرگە تىكەلەي جۇگىنىپ، ولاردىڭ ارەكەتىنە قاتىستى ءوز پىكىرىن ءبىلدىردى.

«جىگىتتەر، مۇنداي جاعداي مەنىڭ ەلىمدە، مەنىڭ جەرىمدە تاعى قايتالانسا، سەندەردى قول جۇگىمەن اتتاندىرامىن. بولشەكتەپ جىبەرەمىن. ءسوز بەرەمىن»، – دەدى سپورتشى.

بۇل مالىمدەمە جەلى قولدانۋشىلارى تاراپىنان ءارتۇرلى پىكىرلەرگە يە بولدى. ءبىرى سپورتشىنىڭ ۇستانىمىن قولداسا، ەندى ءبىرى ونىڭ ءسوزىن تىم قاتال دەپ تاپتى.