ۇلى ادامداردىڭ قالىپتاسقان ادەتتەرى
ەگەر كوپتەگەن اتاقتى ادامداردىڭ ءومىربايانىنا ۇڭىلەتىن بولساق، وندا كۇندەرىنىڭ كوپ بولىگىندە ءىش پىستىرارلىق، ءبىرسارىندى جۇمىستاردى اتقارعاندىعىن كورۋگە بولادى. قاي-قايسىسىن الىپ قاراساق تا كۇننەن كۇنگە قايتالانا بەرەتىن ادەتتەرىنىڭ بولعانىن بايقايمىز. بۇل قانداي ادەتتەر، بۇل ادەتتەر ولاردىڭ جۇمىس ونىمدىلىگىنە قالاي اسەر ەتكەن، بۇل تۋرالى عىلىم نە دەيدى؟ وسى جونىندە ماقالادان وقۋىڭىزعا بولادى.
ەرتە ويانۋ
مەن ۇنەمى ەرتە ويانىپ، كوفە جاساپ، جارىقتىڭ قالاي پايدا بولاتىنىن باقىلايمىن.
توني مورريسون
كوپتەگەن تابىستى ادامداردىڭ ەرتە تۇراتىن ادەتى بار دەگەنگە تاڭعالا قويماسسىز. مىسالى، بەندجامين فرانكلين، كۇنىن تاڭعى 5-تەن باستاعان. «Apple» كومپانياسىنىڭ باس ديرەكتورى تيم كۋك كۇن سايىن تاڭعى 3:45-تە ويانادى، ال ودان ءسال كەشىرەك 4:00-دە «Pepsi» CEO يندرا نۋي كۇنىن باستايدى. ريچارد برەنسون كۇندە تاڭعى 5-تە وياناتىنى جايلى:
بيزنەستە وتكەن 50 جىلدىق ومىردەن تۇيگەنىم، ەگەر ەرتە ويانسام، كۇندىك يە بولار جەتىستىگىم كوبىرەك بولادى، دەمەك ومىردە دە جەتىستىگىم كوبىرەك بولماق.
وقۋعا كەڭەس بەرەمىز: ريچارد برەنسوننىڭ بويىڭدى رۋحتاندىراتىن 11 دانالىق ءسوزى
«Vogue»–تىڭ اتاقتى رەداكتورى اننا ۆينتۋر كۇندە تاڭەرتەڭ 5:45-تە تەننيس وينايدى. ەرنەست حەمينگۋەي تاڭەرتەڭ جازۋدى ۇسىنادى:
...تاڭ اتقان سوڭ مۇمكىندىگىنشە اسىققان ءجون. بۇل ۋاقىتتا ءسىزدى ەشكىم مازالامايتىن بولادى.
سالىستىرمالى تۇردەگى جالعىزدىق — ەرتە ويانۋدىڭ ەڭ جاقسى سيپاتتامالارىنىڭ ءبىرى. بۇل ءوزىمشىل بولۋدىڭ تاپتىرماس مۇمكىندىگى، وتباسى مۇشەلەرىنىڭ الدىندا كىنانى سەزىنبەستەن، ءوز قالاۋىڭشا كەز كەلگەن نارسەنى جاساي الۋ (تەك داۋىستى باسەڭدەتكەن تۇردە).
وقۋعا كەڭەس بەرەمىز: ەرتە تۇرۋعا قالاي داعدىلانۋعا بولادى؟
دەگەنمەن بۇل ءتاسىل بارلىعى ءۇشىن بىردەي جاراي بەرمەيدى. دجەفف بەزوس وياتقىشتى قاجەت ەتپەيدى. ول وتباسىمەن ۋاقىت وتكىزۋدى قالاعاندىقتان، كەزدەسۋلەردى تاڭەرتەڭگە بەلگىلەمەيدى. ءبىراق بۇل «قارسى» دەگەن ارگۋمەنت ەمەس. بۇل — سىزگە جانىڭىزعا جاقىنىن ءتۇرلى تاجىريبە ارقىلى بايقاپ كورىڭىز دەگەن ۇسىنىس قانا.
كۇنىڭىزدى موتيۆاسيا مەن رەفلەكسيادان باستاڭىز
ەرتە ويانۋدان وزگە دە تاڭەرتەڭ جاسايتىن كەيبىر پايدالى ادەتتەر بار. ءوز ءومىرىڭىز جايلى ويلاۋ ءۇشىن نەمەسە جاڭا كۇنىڭىزگە جىگەرلى، سانالى تۇردە قادام باسقانىڭىزعا كوز جەتكىزۋ ءۇشىن ءبىراز ۋاقىت ءبولىڭىز. مىسالى، ستيۆ دجوبس كۇندە تاڭەرتەڭ وزىنە مىنا سۇراقتاردى قويعان ەكەن:
ەگەر بۇگىنگى كۇن مەنىڭ ءومىرىمنىڭ سوڭعى كۇنى بولسا، بۇگىن ىستەيتىن ءىسىمدى ىستەر مە ەدىم؟
تاعى ءبىر نۇسقاسى — وپتيميزم مەن العىسقا زەيىن قويۋ. اكتريسا وپرا ۋينفري العىس كۇندەلىگىن جۇرگىزەدى، ال بەندجامين فرانكلين بولسا وزىنەن: «مەن بۇگىن قانداي جاقسىلىق جاساي الامىن؟» دەپ سۇراعان ەكەن. بۇل جاۋاپكەرشىلىك سەزىمىن وياتۋعا، ءارى كۇندەلىكتى كۇيبەڭ تىرلىكتە الدىنا ماقسات قويۋعا كومەكتەسەتىن جاقسى ءبىر تاسىلدەردىڭ ءبىرى.
وقۋعا كەڭەس بەرەمىز: بەندجامين فرانكليننىڭ ادامگەرشىلىك جۇيەسى
ەگەر كۇننىڭ اگرەسسيۆتى باستالۋىن قالاساڭىز، موتيۆاسيالىق سپيكەر توني روببينستەن ۇلگى الىڭىز. ول ءار تاڭىن سۋى سۋىق (13-گرادۋس) حاۋىزعا شومىلۋدان باستايدى ەكەن. ول مۇنى «ءبىر نارسەنى ىستەيمىن دەسەم، بىردەن، ەشقانداي قيىندىققا قاراماستان ىستەيتىنىمدى ەسىمە سالۋعا» كومەكتەسەتىنىنە بەك سەنەدى. مۇنداي تاجىريبە ءۇشىن مىندەتتى تۇردە جەكە حاۋىزدىڭ بولۋى شارت ەمەس. سۋىق دۋشتىڭ ءوزى دە جارايدى. زەرتتەۋلەر مۇنداي ءادىستى فيزيكالىق جانە مەنتالدىق دەنساۋلىق ءۇشىن وتە پايدالى ەكەن دەپ ايتادى.
كۇندە قايتالانىپ جاسالاتىن ىستەردى جۇيەگە سالۋ
رەتتىلىك پەن جۇيەلىلىك — تابىستى ادامداردىڭ باستى ەرەكشە قاسيەتى. باسقاشا ايتقاندا، ولار جالىقتىراتىن جۇمىستىڭ ناعىز شەبەرلەرى، بۇل قانشالىقتى پارادوكسالدى ەستىلگەنىمەن، بۇل ولارعا ءوز ءومىرىن بىرەگەي ەتۋگە مۇمكىندىك بەردى.
جازۋشى ستيۆەن كينگ قالىپتاسقان كۇندەلىكتى پروسەدۋرالاردى شابىتى جوق كەزدىڭ وزىندە، ميىن جۇمىس ىستەۋگە ءماجبۇر ەتەتىن سيگنال رەتىندە پايدالانادى. ول ءبىر ستاقان سۋ نەمەسە شاي ىشەدى دە، ساعات 8:00–دەن 8:30–عا دەيىن جۇمىسىن ىستەيدى.
ادەتتەگىدەي دارۋمەنىمدى قابىلدايمىن، ۇنەمى ءبىر مۋزىكا ويناپ تۇرادى، مەن ءباز-باياعى ورنىمدا، قاعاز دا ءاردايىم سول جەردە ... وسىنداي بىرتەكتەس، كۇندەلىكتى ىس-ارەكەتتەردىڭ جيىنتىعىنىڭ ماقساتى بىرەۋ-اق — ول ميعا ءقازىر ءبىر دۇنيەنى ويلاپ، شىعاراتىنىن حابارلاۋ.
مۇنداي كۇندەلىكتى قايتالاناتىن ىس-ارەكەتتەر كينگكە كۇنىنە 6 بەتتەن جازۋعا مۇمكىندىك بەرەدى.
سونداي-اق، جۇيەلى تۇردە كۇندەلىكتى قايتالاناتىن جۇمىستار سىزگە ماڭىزدى نارسەلەر ءۇشىن ۋاقىت قالاتىنىنا كەپىلدىك بەرە الادى. «Facebook» –تىڭ اتقارۋشى ديرەكتورى شەريل ساندبەرگ ءوز بالالارىمەن تاماقتانۋ ءۇشىن كۇندەلىكتى ساعات 5:30-دا جۇمىستان قايتادى ەكەن. ال جالعىز باستى انا توني مورريسون، كۇن سايىن جۇمىسقا بارار الدىندا ءوزىنىڭ ءبىرىنشى رومانىنىڭ بىرنەشە بەتىن جازۋعا ۇلگەرۋ ءۇشىن تاڭعى ساعات 4-تە ويانادى ەكەن.
الايدا، كەيدە كەرىسىنشە بولىپ جاتادى. مارك تۆەن ءوزى ءۇشىن قولايلى ءتاسىلدى قولدانۋدى ءجون كورىپ، وسىنداي ستراتەگيالاردان بويىن اۋلاق ۇستاعان ەكەن. بۇل وعان كوڭىل-كۇيىنە بايلانىستى كۇن ءتارتىبىن جوسپارلاۋعا مۇمكىندىك بەردى. ول شابىتقا بايلانىستى جۇمىس ىستەگەن. كەيدە ول تاۋلىكتەپ جازا السا، كەيدە ءتىپتى قاعازعا قولىنىڭ ۇشىن تيگىزبەگەن.
زەيىندى شوعىرلاندىرۋ
دجەفف بەزوس — ءبىر ماسەلەلىكتىڭ جاقتاۋشىسى. ياعني، بارلىق نازاردى اۋدارۋ ءۇشىن ءبىر نارسەگە زەيىندى شوعىرلاندىرۋ دەگەندى بىلدىرەدى.
ماعان كوپ ماسەلەلىك ۇنامايدى. ەگەر مەن ەلەكتروندى پوشتانى وقىپ وتىرسام، باسقانى ەمەس — تەك قانا ەلەكتروندى پوشتانى عانا وقىعىم كەلەدى.
دجەفف بەزوس
وقۋعا كەڭەس بەرەمىز: الەمنىڭ ەڭ باي ادامى اتانعان دجەفف بەزوس دەگەن كىم؟
ءبىراق يلون ماكس بۇل ەرەجەگە باعىنا بەرمەيدى. ول ەلەكتروندىق پوشتاعا كەلگەن حاتتاردى وقي وتىرىپ، ءبىر ۋاقىتتا ءوزىنىڭ 5 بالاسىمەن ويناي الاتىنىن ايتادى.
وقۋعا كەڭەس بەرەمىز: يلون ماسك دەگەن كىم جانە الەمنىڭ وزگەرۋىنە قانداي ىقپالى بار؟
دەمالاتىن ۋاقىت
قايتا كۇش جيناۋ، ويدى جيناقتاۋ ءۇشىن ۋاقىت ءبولۋ — ونىمدىلىك ءۇشىن وتە قاجەتتى فاكتور. زەرتتەۋلەر كورسەتكەندەي، ۇزىلىستەر مىندەتتى تۇردە قاجەت، ال ءۇزىلىس بولماعان جاعدايدا ونىمدىلىكتىڭ دە ازايارى انىق.
وقۋعا كەڭەس بەرەمىز: سترەسس ساباعى
ءتيىمدى ءۇزىلىس جاساۋدىڭ كوپتەگەن جولدارى بار:
1. سەرۋەندەۋ. چارلز ديككەنس، ليۋدۆيگ ۆان بەتحوۆەن، چارلز دارۆين جانە زيگمۋند فرەيد — بۇلاردىڭ ءبارى كوپ سەرۋەندەگەندى جاقسى كورگەن. ءارى مۇنىسى بەكەر ەمەس. ستەنفورد ۋنيۆەرسيتەتىنىڭ عالىمدارى سەرۋەن كرەاتيۆتى ىنتالاندىراتىنىن راستادى.
2. شىعارماشىلىق حوببيگە دە كوڭىل ءبولىڭىز. البەرت ەينشتەين كۇردەلى تاپسىرمالاردى ويلاستىرۋ كەزىندە سكريپكادا نەمەسە فورتەپيانودا ويناۋعا ءۇزىلىس جاساپ وتىرعان. وسىلايشا ول ءوز تەوريالارىن دامىتۋ ءۇشىن شابىت ىزدەگەن.
وقۋعا كەڭەس بەرەمىز: البەرت ەينشتەيننەن ومىرلىك 31 ساباق
3. مىزعىپ الۋ. زەرتتەۋلەر كورسەتكەندەي، كوفە ىشۋدەن گورى قىسقا ۋاقىتقا مىزعىپ الۋ ادامدى جاقسى سەرگىتە الادى. كوپتەگەن بەلگىلى قايراتكەرلەر ءدال وسىلاي ىستەگەن. مارگارەت تەچەر، البەرت ەينشتەين، دجون ف. كەننەدي جانە دجون د. كەننەدي، روكفەللەر — بۇلاردىڭ بارلىعى كۇندىزگى ۇيقى ءۇشىن قىسقا ءۇزىلىس جاساپ تۇرعان. سالۆادور دالي مەن ەدگار اللان پو مۇنداي تاجىريبە شىعارماشىلىق ويلاۋعا ىقپال ەتەتىنىنە سەنىمدى بولعان. لەوناردو دا ۆينچي مەن توماس ەديسون بارلىق ادامدار سياقتى تۇندە ۇيىقتاماي، كۇندىز، قىسقا ۋاقىت قانا مىزعىپ العان ەكەن.
وقۋعا كەڭەس بەرەمىز:
توماس ەديسون: 19 عاسىردىڭ تالانتتى بيزنەسمەنى
انانىڭ شەبەرلىگى
4. وقۋ. زەرتتەۋلەر كۇندەلىكتى وقۋ سترەسستى تومەندەتىپ، ەمپاتيانى كۇشەيتەدى جانە ميدى تونۋستا ۇستايتىنىن كورسەتەدى. كوپتەگەن تابىستى ادامدار — كوپ وقيتىن جاندار. تەودور رۋزۆەلت كۇنىنە ءبىر كىتاپتان وقىعان. ال قولى بوس بولماعان كەزدە، 2-3 كۇندە كىتاپتى وقىپ بىتىرەدى ەكەن. ۋوررەن باففەتءتىڭ ايتۋى بويىنشا، ول كۇنىنە بەس-التى ساعات گازەت، ەسەپتەر مەن ءومىربايانداردى وقيتىن كورىنەدى.
وقۋعا كەڭەس بەرەمىز:
ۋوررەن باففەتتىڭ 5/25 ەرەجەسى ەڭ ماڭىزدى ىستەرگە كوڭىل بولۋگە كومەكتەسەدى
ۋوررەن باففەتت: تابىستى ينۆەستور
جۇمىس ءۇشىن قولايلى ورتا جاساڭىز
ءسىز جۇمىستى قالاي اتقاراتىنىڭىز عانا ەمەس، سونىمەن قاتار جۇمىستى قايدا ورىندايتىنىڭىز ماڭىزدى. جۇمىس ورنىنىز سىزگە بىردەن جۇمىسقا دەگەن نيەتىڭىزدى ارتتىراتىنداي ەرەكشە بولۋى كەرەك.
جازۋشى ءارى اقىن ماييا ەندجەلوۋ مۇنى شارىقتاۋ شەگىنە جەتكىزدى — ول ەڭبەكتەرىن جازۋ ءۇشىن قوناق ءۇي ءنومىرىن جالعا الدى. ول ونى «جالعىز ءارى كەرەمەت» دەپ سيپاتتاپ، ونىڭ وتباسىلىق ءومىرى مەن جۇمىسىن ارالاستىرماۋعا مۇمكىندىك بەرگەنىن اتاپ ءوتتى.
سوندىقتان دۇرىس جۇمىس جايى ۇعىمى وتە كەڭ. مىسالى، ستيۆەن كينگ ءۇشىن، ءبارى وزىنە ءتيىستى ورنىندا تۇرعان، ۇقىپتى بولمەدە جۇمىس ىستەۋدى قالاسا، باسقالارعا تارتىپسىزدىك ۇنايدى ەكەن (زەرتتەۋلەرگە سەنسەك، بۇل شىعارماشىلىقتى ىنتالاندىرادى). البەرت ەينشتەين، ستيۆ دجوبس جانە مارك تۆەن وسىنداي امالدى قولداندى. بۇل تۋرالى ەينشتەين بىلاي دەگەن:
ەگەر ۇيىلگەن ۇستەل — بۇل ۇيىلگەن اقىلدىڭ بەلگىسى بولسا، وندا بوس ۇستەل نەنى بىلدىرەدى؟
ۇيقىعا جەتكىلىكتى ۋاقىت ءبولىڭىز
بارلىعىمىز دا ۇيقىعا مۇقتاجبىز، ءارى ونىڭ جەتىسپەۋشىلىگىن ءجيى سەزىنەمىز. تابىستى ادامدار وسى فيزيولوگيالىق قاجەتتىلىككە قاتىستى وتە ءارتۇرلى كوزقاراستا.
ارياننا حاففينگتون دەنساۋلىعى ارىقتاۋدان كەيىن ناشارلاعاندىقتان، ول دەنساۋلىققا ارنالعان جاڭا مەديا-ستارتاپ قۇردى. دجەفف بەزوس كۇنىنە كەمىندە 8 ساعات ۇيىقتاۋعا تىرىسادى، ول «ەنەرگيا قۋاتىن سەزىنۋ» ءۇشىن ۇيقىنىڭ ءدال وسىنداي مولشەرى قاجەت ەكەنىنە سەنىمدى.
الايدا، عالىمدار 7-8 ساعات ۇيقىنى پايلادى دەگەنىمەن، كوپتەگەن اتاقتى ادامدار از ۇيىقتايتىن قابىلەتىن العا تارتادى. مارگارەت تەچەر 4 ساعات، موسارت — 5، ال ماسك، 2 بىردەي كومپانيانى ىسكە قوسۋ كەزىندە اپتاسىنا 80-90 ساعاتتان جۇمىس ىستەگەندىكتەن، 6 ساعاتتىق ۇيقىعا اۋىسۋىنا تۋرا كەلگەن. ول ءتىپتى ءۇي مەن جۇمىس اراسىنداعى جولعا كەتەتىن ۋاقىتتى ۇنەمدەۋ ءۇشىن، «Tesla» فابريكاسىنا ءوز كورپە-توسەگىن اكەلىپ قويعان.
وقۋعا كەڭەس بەرەمىز: ەڭبەكقوردىڭ قۇپياسى: يلون ماسك قالاي جۇمىس ىستەيدى؟
سىزگە لايىقتى بولاتىن نارسەنى تابىڭىز
ءبىز سىزدەرگە كوپتەگەن ۇلى ادامداردىڭ كۇندەلىكتى جاسايتىن ادەتتەرىنەن مىسال كەلتىردىك. ايتا كەتەرلىگى، ولاردىڭ كوپشىلىگى زاماناۋي عىلىمي زەرتتەۋلەرمەن راستالعان. بايقالا بەرمەيتىن، كۇندەلىكتى قايتالاناتىن ارەكەتتەر ءسىزدىڭ ءوز-وزىڭىزدى دامىتۋىڭىز ءۇشىن وتە ماڭىزدى. وسى كىشكەنتاي قادامداردان ءسىزدىڭ ءومىرىڭىز قالىپتاسادى. مۇنداي قاراپايىم، ءبىراق وتە ءتيىمدى قۇرالدى پايدالانباۋدىڭ ەشقانداي سەبەپتەرى جوق.
بارلىق ۇسىنىلعان ادەتتەر ءسىز ءۇشىن قولايلى ەمەس شىعار. الايدا، مۇنى ءبىلۋدىڭ جالعىز جولى — ەكسپەريمەنت. بارلىق جوعارىدا كەلتىرىلگەن نۇسقالاردى قولدانىپ كورىڭىز، ولاردىڭ بىرنەشەۋىن ءوز ومىرىڭىزگە ەنگىزىپ، بايقاڭىز.
ءتۇيىن
ەرتە ويانۋ — بۇل ەڭ الدىمەن جالعىز بولۋعا، ءارى ۋاقىتتى ءوزىن-وزى دامىتۋعا ارناۋعا تاپتىرماس مۇمكىندىك. كۇندى رەفلەكسيا مەن ءوز-وزىڭىزدى جىگەرلەندىرۋدەن باستاڭىز — بۇل جۇمىسقا دەگەن ىنتانىڭ دۇرىس قالىپتاسۋىنا كومەكتەسەدى. قورشاعان ورتانى دۇرىس قۇرۋ جانە قالىپتاسقان ادەتتەردى سالتىڭىزعا اينالدىرۋ — ونىمدىلىكتى ارتتىراتىن كۇيگە جىلدام ەنۋگە بىردەن-بىر سەبەپشى بولا الادى.
ءبىر تاپسىرماعا زەيىنىڭىزدى بارىنشا شوعىرلاندىرا ءبىلىڭىز، دەمالۋعا دا ۋاقىت تابۋدى ۇمىتپاڭىز. كۇشىڭىزدى قالپىنا كەلتىرۋدىڭ ەڭ جاقسى ءتاسىلى — قىزمەت ءتۇرىن وزگەرتۋ. قالىپتاسقان ادەتتەردىڭ سان الۋان ءتۇرىن بايقاپ كورىڭىز، وسىلايشا اراسىنان ءدال سىزگە سايكەس كەلەتىنىن تابىڭىز.
You Might Also Like
-
اقشۇقىر مەكتەپ-ليسەيىنىڭ باستاۋىش سىنىپ ءمۇعالىمى دجۋماگالييەۆا نازيرا سەيتكۋلوۆنا
