InfoHub Logo

ءاربىر پەندە دۇنيە ەسىگىن شىر ەتىپ اتتاعاننان باستاپ كورەر كۇنى مەن اتار تاڭىنا ۇكىلى ءۇمىت ارتىپ، شىڭعا شىعۋ جولىندا ايانباي تەر توگەدى. ال وسى ءبىر سارا جولعا تاستاي بەرىك قامالدىڭ ىرگەتاسىن سالىپ، وڭ مەن سولىڭدى تانىتىپ، ءبىلىم كوكجيەگىڭىدى كەڭەيتىپ، كوكىرەك كوزىڭدى اشاتىن-اياۋلى ۇستازىڭ! شاكىرتىنىڭ بويىنا اسىل قاسيەتتەردى قۇيىپ، يگىلىكتىڭ قاينار بۇلاعىمەن سۋسىنداتىپ، جاقسى مەن جاماننىڭ پارقىن اجىراتۋعا ۇيرەتىپ قانا قويماي، بيىك باستامالارىڭا سەبەپشى بولار جانداردىڭ قامشىنىڭ سابىنداي قىسقا عۇمىرىمىزدان الار ورنى ءبىر توبە. وزگەلەردەن تۇڭعيىق ويلارىمەن قاتار، اسقان مەيىرىمدىلىگىمەن ەرەكشەلەنەتىن ۇستازدارىمىز-بىزدەر اڭساعان ارمانىمىزعا جەتسەك، جىلى جۇرەگىمەن بارىنشا قۋانىپ، ىستىق لەبىزىن بىلدىرەدى. كۇندەي كۇلىمدەگەن جانارلارىنان ماقتانىش سەزىمى جارق ەتىپ، شاكىرتتەرىن سيقىرلى نۇرعا بولەيدى. مەكتەپ تابالدىرىعىن اتتاعان ساتتەن باستاپ ەركەلىگىمىزدى كوتەرىپ، ءبىلىم الۋعا دەگەن قۇلشىنىسىمىزدى قولپاشتاپ، قۇلاعان ساتتەرىمىزدە قولداپ، سىناقتارعا قارسى تۇرۋدى كورسەتە ءبىلدى. ەگەمەن ەلىمىزدىڭ تۇڭعىش پرەزيدەنتى:"ەركىن ەلدە وسكەن ۇرپاقتىڭ رۋحى ءاردايىم بيىك بولۋى ءتيىس. جاستارى جالىن جۇرەكتى، ءورشىل نامىستى، بيىك رۋحتى بولسا-ول ەلدىڭ ەڭسەسى دە بيىك بولادى"،- دەپ وزگە مەملەكەتتەردەن وق بويى وزىق بولۋ ءۇشىن سانالى ۇرپاقتى جاقسىلىققا كەنەلتىپ، ادامگەرشىلىك پەن ادالدىقتى استاستىراتىن ءوي-ورىسى كەڭ تالىمگەرلەرىمىزدى ەلىمىزدىڭ ەرتەڭى ءۇشىن ەڭبەك ەتۋگە شاقىردى. وسىدان بولار، حالقىمىزدا:"ادامنىڭ جاقسى بولماعى-جاقسى ۇستازدان" دەگەن اسىل ءسوزدىڭ بەلەڭ الۋى. شاكىرتتەرىن ءبىلىم كوگىنە جەتەكتەگەن كەڭ پەيىلدى، اق جۇرەكتى، تەرەڭ اقىل يەلەرى بىزگە سانداعان جىلدار بويى سەنىم ارتىپ، جىعىلساق-تىرەۋ، قۇلاساق-سۇيەۋ بولا بىلگەن، قاناتىمىزدى قاتايتىپ، زەڭگىر كوكتە سامعاۋعا تاربيەلەپ جاتقان جارقىن ءجۇزدى ۇستازدار بايدىبەك اۋدانى، ورىنباي تايمانوۆ اتىنداعى مەكتەپ مەكەمەسىندە جەمىستى قىزمەت اتقارۋدا. "شاكىرتىنە قاراپ، ۇستازىن تانى"، "ۇستازى جاقسىنىڭ-ۇستامى جاقسى" سىندى استارلى سوزدەردىڭ اقيقاتتىلىعىنا بارشامىزدىڭ كوزىمىز جەتتى. ءيا، كەمەڭگەرلىكتىڭ كەمەلىنە، مادەني قۇندىلىقتاردىڭ شىڭىنا تەك تالماي ەڭبەك ەتكەن جاندار عانا شىعا الادى. مەنىڭ ويىمشا، التىن ۇيامداعى ءاربىر ۇستاز-ەرتە كەزدە قولىنا نايزا ۇستاپ، قاسىق قانى قالعانشا بەرىسپەگەن رۋحى بيىك باتىرلارمەن ىسپەتتەس. سەبەبى، كەمەل كەلەشەككە ايقىن باعداردى كورسەتىپ، سارا جولدى سالىپ بەرۋ دە ەكىنىڭ-بىرىنىڭ قولىنان كەلە بەرمەيتىن ۇلى ءىس. ۇستازدارىمنىڭ ايتقان مانگە تولى عيبراتتى سوزدەرى جادىمدا ماڭگىلىككە ساقتالادى. التىن بەرسە دە الىنبايتىن، ادامعا ەرەكشە كورىك بەرىپ، ءجۇزىن نۇرلاندىراتىن نارسە-بىلىم ەكەنىن ۇعىنىپ، بۇل ءسوزدىڭ تۇبىنە تەرەڭىنەن بويلاي ءتۇستىم.

"ۇستاز بولۋ-جۇرەكتىڭ اقىلدىعى.

ۇستاز بولۋ-سەزىمنىڭ اقىندىعى.

ۇستاز بولۋ-مىنەزدىڭ كۇن شۋاعى،

ازبايتۇعىن ادامنىڭ التىندىعى"،- دەي كەلە، شاكىرتتەرىن ءوز پەرزەنتتەرىنەن كەم كورمەيتىن تالىمگەرلەرىمە كوكتەمنىڭ جادىراعان، جازدىڭ جايناعان كۇنىندەي قۇلپىرۋدى، ەڭبەكتەرىنە ساتتىلىك پەن بەرەكەنى تىلەگىم كەلەدى. قازاق ساحاراسىنا ەلەۋلى جەمىستەرىڭىز ءسىڭىپ، ءبىرتۋار تۇلعالاردى تاربيەلەپ، نۇرى وشپەيتىن ءىز قالدىرىڭىزدار!!!

---