InfoHub Logo

بىردە قازانعاپ وڭتۇستىك وڭىرىنەن استىق الىپ قايتپاقشى بولىپ، ساۋدا كەرۋەنىنە ىلەسىپ جولعا شىعادى. قاراقامىس اۋلىنىڭ تۇسىنان ءوتىپ بارا جاتىپ، بەلگىلى كۇيشى ۇسەن تورەمەن تانىسىپ، سالەم بەرە كەتپەك ويمەن ات باسىن بۇرادى.

ۇسەن تورە جول ءجۇرىپ كەتكەن ەكەن. قازانعاپ سۋسىن ءىشىپ تىنىققان سوڭ، ۇسەن تورەنىڭ دومبىراسىن كەلىنىنەن الدىرىپ، تارتا باستايدى. الدەن ۋاقىتتا سىرتتان ۇيگە كىرگەن ۇسەن تورە دومبىراسىن تارتىپ وتىرعان بەيتانىس ادامدى كورىپ:

— دومبىرامدى مەنىڭ رۇقساتىمسىز الىپ تارتۋعا باتىلى جەتكەن نەتكەن جانسىڭ؟ ال ەندى كورسەت ونەرىڭدى، ەگەر دۇرىس تارتا الماساڭ، وسى جەردە ايىبىڭدى تولەيسىڭ؟ — دەيدى.

قازانعاپ ءوزىن تانىستىرۋ ءۇشىن «كوكەيگە تۇسكەن كوكىلجان» اتتى جاڭا ءبىر كۇيىن شەرتەدى. كۇيشى دومبىراسى باسىنان ۋايىم-قايعى ارىلماعان كەدەي قاۋىمنىڭ اۋىر ءومىرى، جانىنا باتقان مۇقتاجدىعى جايىندا كۇڭىرەنە جونەلەدى. ساي-سۇيەكتى سىرقىراتقان كۇي سازى ۇسەن تورەنى قاتتى تولقىتادى. قازانعاپتىڭ دومبىراشىلىق شەبەرلىگىنە تاڭ-تاماشا قالعان ول ورنىنان ەرىكسىز ۇشىپ تۇرەگەلىپ:

— ياپىرىم-اي، ءتۇر-تۇلعاڭا قاراسام، الىستان كەلە جاتقان ادام ءتارىزدىسىڭ، شىراعىم. بۇل وڭىردە مەن كورمەگەن، دومبىراسىنىڭ ءۇنىن ەستىمەگەن كۇيشى جوق ەدى. سەنىڭ دومبىراڭنان توگىلگەن مىنا كۇي جان-جۇيەمدى بوساتتى عوي. ءومىردىڭ تالاي قيىندىعىن باسىڭنان وتكەرىپ، مۇقتاجدىقتى كوپ كورگەن جان ەكەنسىڭ. ۇلىقۇمنىڭ بويىندا قازانعاپ دەگەن كەدەي، جالعىز اتتى تاماشا دومبىراشى بار دەپ ەستۋشى ەدىم، سول سەن بولارسىڭ. قازانعاپ بولساڭ، جوعارى شىق، تورگە وز، — دەيدى.

— بولساق، بولارمىز، — دەپ قازانعاپ تورگە شىعا بەرگەن ەكەن.

بەلگىلى كۇيشى ۇسەن تورە مەن قازانعاپ وسىلايشا تانىسادى.

---