InfoHub Logo

«ۇلتتىق» اتاۋى تەڭىزدەي تەرەڭ ماعىنانى قامتىعان قۇدىرەتتى ءسوز. ەلدىڭ ۇلتتىق بولمىسىنان، تىنىس-تىرشىلىگى مەن كوزقاراسىنان، سالت-داستۇرىنەن حابار بەرىپ تۇرعانداي. اياققا تۇساۋ سالماعان، بوداندىق قۇرىعىندا قالماعان ەلدە عانا «ۇلتتىق» ءسوزىنىڭ ءرولى ويناپ، قاسيەتى اسقاقتايدى. قازاق ەلىنىڭ ۇلتتىق دەيتىندەي وزىنە ءتان دۇنيەسى، ءوز قوعامى بار. سول بىرلەستىكتەن ۇلتتىق ارنانى دا كەزدەستىرەمىز.

ەلىمىزدىڭ تۇمارى، مەملەكەتتىك تىلدە حابار تاراتۋشى «Qazaqstan» ۇلتتىق تەلەارناسى - «قازاقستان رەسپۋبليكالىق  تەلەراديوكورپوراسياسى» اق قۇرامىنا كىرەدى. توقسانىنشى جىلدار بەلىندە ءوز قىزمەتىن الماتى ستۋدياسىندا باستاعان بۇل ارنانىڭ قازىرگى تاڭدا ءىسى ەلەۋلى، ورنى ايرىقشا. ون ءتورت ايماقتىق فيليالى بار «Qazaqstan» ارناسى تەك ءوز شەكارامىزدا قالماي كورشىلەس جۇڭگو، رەسەي، وزبەكستان، قىرعىزستان، موڭعوليا ەلدەرىن دە حالقىمىزدىڭ ۇلتتىق قۇندىلىقتارىمەن حاباردار ەتەدى.

ۇلتتىق ارنا ەفيرىندە ءارتۇرلى جاستاعى كورەرمەندەرگە ارنالعان جاڭالىقتار مەن ەرەكشە توك-شوۋ جانرلارى، ويىن-ساۋىق جانە تانىمدىق باعدارلامالار، قوعامدىق-ساياسي، ەكونوميكالىق حابارلار، سونداي-اق، مەملەكەتتىك ءتىلدى دامىتۋعا نەگىزدەلگەن جوبالار كەزدەسەدى. مەنىڭ بۇل ارنادان تىلگە تيەك ەتىپ سوزگە قوسقىم كەلگەنى ارنانىڭ رەيتينگىن جوعارىلاتىپ،   حالىقتىڭ كوزايىمىنا اينالعان  «ايتۋعا وڭاي» باعدارلاماسى. حالىقپەن كەرى بايلانىس قۇرىپ، قۋانىشىنا بىرگە قۋانىپ، قايعىسىن تەڭ بولە بىلگەن، رەيتينگتىڭ ق ۇلى بولماي شىن مۇقتاج جاندارعا كومەك بەرگەن ايتۋلى جوبا كوگىلدىر ەكراننان كەتسە دە حالىق جانىندا ماڭگى قالدى. مەنىڭ ويىمشا، ۇلتتىق تەلەارناداعى ۇلت كەلبەتىن كورسەتىپ، سىرتى التىننىڭ ءىشى مىس بولاتىنىن، سونى تۇزەگەندە، ۇلت ىرگەسى بەكىمەككە قارەكەت قىلعاندا عانا  الپاۋىت تۇتاس ۇلت بولىپ، ۇلتتىعىمىزدى الەمگە  تانىتاتىمىزدىڭ بىردەن ءبىر دالەلى بولعان باعدارلاما وسى بولدى. مەن باعدارلاما ارقىلى «QAZAQSTAN» ارناسىنىڭ حالىقتىق ارنا ەكەنىن سەزىندىم. ارينە، ۇلتتىق ارنادان ۇلت كەلبەتىنىڭ كورىنۋىنە وسى باعدارلامانىڭ جۇرگىزۋشىسى بولعان بەيسەن قۇرانبەكتىڭ ەڭبەگى اۋىز تولتىرا ايتارلىقتاي. ۇلتتىق ارنادا الەۋمەتتىك باعدارلاما «جان جىلۋى»، قوعامدىق-ساياسي باعدارلاما «اشىق الاڭ»، ستۋديالىق باعدارلاما «پاراسات مايدانى»، اقپاراتتىق- ساراپتامالىق  «جۋرناليستىك زەرتتەۋ» باعدارلامالارى دا ەرتوستىگىم ءبىر توبە دەگەندەي ورنى بولەك ۇلتقا قىزمەت ەتكەندەر.

ايتپاسا ءسوزدىڭ اتاسى ولەر، قازاقستانداعى كوپتەگەن ارنا ساپاعا ەمەس سانعا بوي الدىرعان. كەزىندە «قارەكەت» سىندى باعدارلامالار حالىقتىق ءسوزدى سويلەۋشى ەدى، ءقازىر اقيقاتتىق استارىن ايتام دەگەندەر ايتىلماۋى ءتيىس وتباسىنىڭ ارتتارىن ايتقان، ىرىدەن بەزىپ مايدالانعان باعدارلامالار. «ىرىگەن اۋىزدان شىرىگەن ءسوز شىعادى» دەگەندەي ەفير، ساحنا مادەنيەتىن ساقتاماي جامان سوزدەرمەن بوياپ، كوپتىڭ كوزىنشە توبەلەس اشاتىنداردىڭ ارقاسىندا رەيتينگ كوتەرىلىپ جاتقانىمەن ۇرپاقتىڭ ساناسى ۋلانىپ تومەندەپ جاتىر. وسىنداي باعدارلامالاردى كورەتىن حالىق سانى ارتقانىمەن ۇرپاق ۇيرەنەرلىكتەي قازاقى قۇندىلىق قۇرىپ جاتىر. سوندىقتان ۇلتتىق ارنانىڭ باعىتىن، ۇلتقا بەرەر دۇنيەسىن ءوزىم  قۇپ كورەمىن. الداعى ۋاقىتتا زاماندى ادام وزگەرتتى دەپ، وزگەرىسكە بەت بۇرىپ، ۇلت كەلبەتىن كولەگەيلەمەسە ەكەن دەيمىن. مەندەگى ءۇن، ازعانتاي تىلەك وسى.

---