ۇنسىزدەر ءماجىلىسى
ءبىر زاماندارى عالىمدار مەن اقىندار «ۇنسىزدەر ءماجىلىسى» اتتى بىرلەستىك قۇرادى. مۇشەلەر سانى وتىز ادامنان تۇراتىن جانە وتىزدان اسىرمايتىن. مۇشەلىكتىڭ شارتى كوپ ويلانۋ جانە از سويلەۋ، حيكمەت سويلەۋ بولاتىن. سول زاماننىڭ ءماشھۇر اقىن، عۇلاماسى موللا جامي (پارسى اقىنى، فيلولوگ.) وسى ماجىلىسكە قۇشتار ەكەن. كۇندەردىڭ بىرىندە «ۇنسىزدەر ءماجىلىسىنىڭ» ءبىر مۇشەسى قايتىس بولعانىن ەستىپ، ونىڭ ورنىنا ۇمىتكەر بولۋ ءۇشىن، بىرلەستىك ورنالاسقان عيماراتقا كەلەدى. ەسىكتەن كۇتىپ العان ادامعا ەشتەڭە دەمەستەن، ءوزىنىڭ ءاتى-جونى جازىلعان قاعازدى بەرىپ جىبەرەدى. مۇشەلەر سول ساتتە جينالىستا وتىرعان بولاتىن. ءماجىلىس وكىلدەرى ۇسىنىستى كورىپ، ىشتەي قىنجىلادى. ويتكەنى موللا جامي مۇشەلىككە وتە لايىقتى ادام بولاتىن، ءبىراق قايتىس بولعان مۇشەنىڭ ورنىنا ادام قابىلداپ قويعان ەدى. ءماجىلىس ءتوراعاسى ستاكاندى بەتىنە دەيىن سۋعا تولتىرىپ، موللا جاميگە جىبەرەدى. موللا جامي جاۋاپتى تۇسىنگەن بولاتىن. تاعى ءبىر تامشى قۇيىلسا، ستاكان تاسيتىن ەدى. حازرەتى موللا جامي اۋلاداعى راۋشان گ ۇلىنىڭ ءبىر جاپىراعىن الىپ سۋدىڭ بەتىنە قويادى. گۇل جاپىراعى سۋدىڭ بەتىندە قالعىپ، ال سۋ تاسىماعان ەدى. مۇنى ىشكە جىبەرەدى. ماجىلىستەگىلەر بۇل نازىك جاۋاپتىڭ ءمانىن تۇسىنگەن بولاتىن. مۇشەلەر ءبىر اۋىزدان بۇل دانىشپان عالىمدى مۇشەلىككە الۋعا شەشىم قابىلدايدى. ءماجىلىس ءتوراعاسى مۇشەلەر تىزىمىنە موللا ءجاميدىڭ ەسىمىن تىركەپ، 30 سانىنىڭ ارتىنا ءبىر "0" قوسىپ، 300 دەپ جازادى. وسى ارقىلى موللا ءجاميدىڭ ارقاسىندا مۇشەلەر سانى 10 ەسە كوبەيگەندىگىن كورسەتپەك بولادى. قۇجاتتىڭ سوڭعى نۇسقاسى موللا ءجاميدىڭ قولىنا بەرىلگەندە ول مۇنى بىردەن تۇسىنەدى. ءبىراق ادام سانىنىڭ تىم ارتىق بولۋى، كوڭىلىنە قونبايدى. وڭ جاقتاعى "0" سانىنىڭ ءبىرىن ءوشىرىپ، 30 سانىنىڭ الدىنا قويدى. ياعني 030 دەپ جازدى. كىشىپەيىلدى موللا جامي وسىلايشا ءوزىن نولگە تەڭەپ، سۋدى تاسىتپاعانىمەن قوسا ول ءماجىلىستىڭ قۇرىلىمىن وزگەرتۋ نيەتى جوق ەكەندىگىن ايتقىسى كەلگەن ەدى. مۇنى كورگەن وزگە مۇشەلەردىڭ قۇرمەت پەن ءىلتيپاتتارى تاعى دا ارتا تۇسەدى.
You Might Also Like
-
مۇقان ءۇيىنىڭ اۋلاسىنا كەلگەندە، بالالارى سىرتتا ويناپ ءجۇر ەكەن. ون جاسار ءاليى كورشى بالا تيمۋرمەن بىرگە قاسىنا جۇگىرىپ جەتتى.
