اقبوكەن جىلاعان ءتۇن
(دەرەكتى اڭگىمە)
بەتپاقتا كەلە جاتتى اقساق كيىك،
ساندالىپ قاڭعىراقتاپ باسىن ءيىپ.
پانا ىزدەپ شىبىن جانعا سۇيرەتىلىپ،
مەرگەننىڭ كەۋدەسىنە وعى ءتيىپ.تامادى قارا جەرگە اققان قانى،
قينالىپ ەنتىگەدى شىبىن جانى.
بويالىپ اق دەنەسى قىزىل قانعا،
كەلەدى ءالى كەتىپ جىعىلعالى.ساكەن سەيفۋللين
تەڭىز كولىنىڭ الابىندا بيىل قىس جىلداعىدان قاتتىراق. بىرنەشە كۇن قاتارىنان سوققان ىزعىرىق جەلدىڭ سوڭى اقتۇتەك بورانعا اينالدى. كولدىڭ ىزعارى سۋىقتى ەكى ەسەلەپ جىبەردى. ءبىر ءۇيىر كيىك سۋىقتى ەلەڭ قىلار ەمەس. كوسەم تەكەنى ەس قىلىپ، الاڭسىز جايىلىپ ءجۇر. كەنەت جىم-جىرت تىنىشتىقتى قاتتى گۇرىلدەگەن كولىكتىڭ داۋىسى بۇزىپ جىبەردى. كوسەم تەكە ۇرپيىسە قالعان ءۇيىردىڭ سىرتىنا شىعىپ، ءبىر سۇمدىقتىڭ بولاتىنىن الدىن-الا سەزگەندەي، قالشيىپ تۇرىپ قالدى. ءازازىل ەكى اياقتىلاردىڭ وزدەرىنە ور قازىپ، قىرعىن جاساعىسى كەلگەنىن جۇرەگى قۇرعىر اۋەلدەن ءبىلدى.
گۇر-گۇر ەتكەن قوس «دجيپ» كەڭ دالادا زۋىلداپ ءتونىپ كەلەدى. كوسەم تەكە لەزدە العا ىتقىپ شىعىپ، اپپاق قار جامىلعان دالاعا جۇلدىزداي اقتى. ءۇيىر دە بەت-بەتىمەن جان ساۋعالاپ، ويران-اسىر بەزە قاشتى. سول-اق ەكەن، كولىكتەردىڭ اينەگىنەن بىتىرانىڭ وعى قارشا بورادى. بەس-التى كيىك وماقاسا قۇلادى. قالعاندارى قاپەلىمدە نە بولعانىن تۇسىنبەي، جانۇشىرا قاشا بەرگەن. جەر-دۇنيە استى-ۇستىنە ءتۇسىپ، توڭكەرىلىپ كەتكەندەي، الگىندەگى تىنىشتىقتىڭ جۇرناعى دا قالماعان.
كوسەم تەكە ەنتىگىن باسىپ، ارتىنا بۇرىلىپ قاراپ ەدى، وق تيگەن انالىقتىڭ جانىندا قالعان كىشكەنتاي لاعىن كوردى. بىر-ەكى رەت ورعىپ-ورعىپ بارىپ، كورعانسىز لاقتى قۇتقارعىسى دا كەلدى. ءبىراق ءوزىنىڭ شاراسىزدىعىنا مويىنسۇنىپ، الدىڭعى اياقتارىمەن ومبى قاردى تەپكىلەۋمەن بولدى. سول ساتتە جان تاپسىرا الماي، قينالىپ جاتقان ەنەسىنىڭ قاسىنان كەتە الماعان لاقتىڭ ەكى كوزىنەن جاس پارلاپ تۇردى.
***
«وحوتزووپرومنىڭ» ينسپەكتورلارى 15 كۇندىك اۋىسىممەن جۇمىس ىستەيدى. ەرلان نۇرعالييەۆ پەن پەتر نيسىك ءۇشىن كەزەكشىلىكتىڭ سوڭعى كۇنى ادەتتەگىدەي باستالدى. كوپ جۇرمەيتىندەرى كوڭىلگە مەدەۋ. جۇمىستىڭ سوڭعى كۇنى جانار-جاعارماي از بەرىلەدى. ولار ءتۇس اۋا ساعات 16.00-دەن كەيىن شولۋ جاساۋعا شىقتى.
ادەتتەگى تىرلىك. اينالا اپپاق. اۋادا قار ۇشقىنداپ تۇر. بۇل كەشكە تامان بوران كۇشەيەتىنىنىڭ بەلگىسى. ەرلان قولىنا ءدۇربىسىن الىپ، اينالانى شولىپ تۇرعان. ءبىر ساتتە اپپاق قاردى بۇرقىراتىپ زۋلاپ بارا جاتقان ەكى «ءدجيپتى» كوزى شالدى. ءار جەردەن اندىزداي قاشىپ، جان ساۋعالاعان كيىكتەردىڭ قاراسى كورىنەدى. «ءاي، مىنالار براكونەرلەر عوي! وڭباعان جاۋىزدار! ءبىزدىڭ جانار-جاعارمايىمىزدىڭ ازاياتىن ۋاقىتىن ءبىلىپ، سول كۇنى اڭعا شىعىپتى. قاپ، بالەم، تۇرا تۇرىڭدار! سازايلارىڭدى بەرەرمىز!»، — دەدى ول ىشتەي تىستەنىپ وزىنە-وزى ءۇن قاتىپ.
كوپ ويلانباستان راسيامەن ەكىنشى كولىكتەگى توپتىڭ جەتەكشىسى جەنيا سەرەگينگە حابار بەردى. «جەنيا، كوروچە، مى يح وبنارۋجيلي! مى پوەحالي زا نيمي. ۆى ەزجايتە زا نامي!»، — دەپ ءىستىڭ ءمانىن ءتۇسىندىرىپ، جەدەل اۆتوكولىككە ءمىندى. تىزگىندە پەتر. وعان جىلدامدىقتى ۇدەتە ءتۇس دەگەن بەلگى بەردى. بۇل كەزدە جەنيالار مىنگەن «حاي ليۋكس» كولىگى باسقا باعىتتا جۇرگەن ەدى. حاباردى ەستىسىمەن قايتىپ كەلىپ، قۋعىنشى ارىپتەستەرىنە كومەككە جەتەمىن دەگەنشە كوپ ۋاقىت ءوتتى. ونىڭ ۇستىنە الدىڭعى دوڭعالاقتىڭ ءبىر بولشەگى ىستەن شىعىپ، كولىك قارعا باتىپ قالدى.
بۇل كەزدە ەرلان مەن پەتر اق جانە كۇمىس ءتۇستى دجيپتەگىلەردى جەدەل قۋىپ جەتكەن ەدى. پەتر ارىپتەسىنىڭ يشاراسىن ءتۇسىنىپ، كولىكتى سولعا بۇرىپ، مىلتىق اتۋعا مۇمكىندىك تۋعىزدى. تارس-تۇرس! اسپانعا بىر-ەكى وق اتىلدى. الايدا براكونەرلەر مىلتىق داۋىسىنان سەسكەنگەن جوق. كەرىسىنشە، ارتقى كولىكتىڭ تەرەزەسىنەن ءبىر جاعىنان قوس ۇڭعىلى، ال ەكىنشى جاعىنان بەس وقپانى بار مىلتىقتىڭ باسى كورىندى. ونىمەن قوسا، ارماتۋرانىڭ كەسىندىلەرىن ارتقا لاقتىرا باستادى. كيىك اۋلاۋعا جاقسىلاپ دايىندالعانى كورىنىپ تۇر. ارادا ءبىرشاما ۋاقىت وتكەندە، ارتىنداعى «دجيپ» ءبىرىنشىسىن العا جىبەرىپ، كىلت توقتادى.
كولىكتىڭ ەكى ەسىگىنەن قارۋ ۇستاعان ەكى جىگىت پەن جۇرگىزۋشى شىقتى. ۇشەۋى دە ەڭگەزەردەي ەكەن. سپورتپەن اينالىسقاندارى بايقالادى. بەت-جۇزدەرىندە يماننىڭ تيتتەي دە نىشانى جوق. «بىزگە سەندەر نە ىستەي الاسىڭدار؟» — دەگەندەي اياقتارىن ءار جەردەن تالتاڭداي باسىپ، جەتىپ كەلدى.
— ۆى چتو، وبورزەلي! — دەپ ايقاي سالدى ىشىندەگى بىرەۋى.
ءبىراق كولىگىنەن سەكىرىپ تۇسكەن ەرلان ولاردان تيتتەي دە قورىققان جوق. دوڭ ايبات كورسەتىپ كىسىمسىگەن جىگىتتى جەرگە الىپ ۇردى. پەتر دە جۇرگىزۋشىگە تاپ بەردى. ەكى ادام ەرلانعا جابىلدى. قىپ-قىزىل توبەلەس باستالدى. پەتر جۇرگىزۋشىنى جەرگە جىققانىمەن، ۇشەۋدىڭ ءبىرى ونى مىلتىقتىڭ دۇبىمەن ۇرىپ قۇلاتتى. ول بەتىنەن تيگەن اۋىر سوققىدان ەسىنەن تاندى. جاستايىنان وتە قارۋلى، رۋحتى بولىپ وسكەن ەرلاننىڭ كۇشى دە، مىسى دا باسىم ەدى. ءا دەگەندە بەت قاراتپادى. ۇشەۋىمەن جالعىز ءوزى ءبىر ساعاتتاي ارپالىستى. ءۇش رەت وڭباي قۇلاسا دا، بار كۇش-جىگەرىن جيىپ، قايتا تۇرەگەلە بەردى. ءار قۇلاعان جەرىندەگى اپپاق قارعا توگىلگەن قاننان قار جامىلعان جەر قىپ-قىزىل تۇسكە بويالدى. سوڭعى ساتتە قاراقۇسىنان قاتتى تيگەن مىلتىقتىڭ دۇمىنەن باسى اينالىپ، ەتپەتىنەن قۇلادى. ونىڭ شارۋاسىنىڭ بىتكەنىنە كوز جەتكىزگەن براكونەرلەر قۋعىنشى كولىكتىڭ كىلتىن الىپ، GPSء-تى بىت-شىت قىلىپ ءۇزىپ، ءوز كولىكتەرىنە ءمىنىپ، ءىزىم-عايىم جوعالدى.
ارادا قانشا ۋاقىت وتكەنى بەيمالىم. اۋەلى ەسىن جيعان پەتر ەرلاننىڭ قانسىراعان كۇيى ەتپەتىنەن جاتقانىن كوردى. ادام قانى ءۇش جەردە قىپ-قىزىل بولىپ، ءۇيىلىپ-ۇيىلىپ قالىپتى. بار ال-دارمەنىن جيىپ، ورنىنان تۇردى. قاتتى سوققىدان مىج-مىج بولعان ارىپتەسىنىڭ باس سۇيەكتەرىن ورنىنا جاپسىرىپ، باس كيىمىن كيگىزىپ، كولىكتىڭ دوڭعالاعىنا سۇيەدى. ودان ءارى نە ىستەرىن بىلمەي قينالىپ تۇرعاندا قالتاسىنداعى راسياسى ەسىنە ءتۇستى. ەكى اياقتى ايۋاندار قالتاسىنداعى قۇرىلعىنى بايقاماپتى. جالما-جان ىسكە قوسىپ: «جەنيا! جەنيا! قۇتقارىڭدار!» — دەپ ايقايلاي بەردى. ءبىراق GPSء-ى ۇزىلگەن راسيادان قايران جوق ەدى.
سول ساتتە سايىن دالاداعى قاندى ارپالىسقا كۋا بولعان كۇننىڭ دە قاباعى قاتايىپ، ۇياسىنا باتتى. بۇل كەزدە الاي-دۇلەي سوققان بوران كۇشەيە ءتۇستى. قاتتى قانسىراعان ەرلان ءولىم اۋزىندا جاتىر. براكونەرلەر قانعا بوياپ، يەن دالادا قالدىرعان ينسپەكتورلاردى ارىپتەستەرى كەشكى ساعات 20.30-دا تاۋىپ الدى.
***
— ەروحا، باۋىرىم-اۋ! ءتىرى ەكەنسىڭ عوي! اللاعا شۇكىر! كوزىڭدى اششى! بىردەڭە دەپ ءتىل قاتشى!
بۇل قۇتقارۋشىلارمەن بىرگە كەلگەن ەرلاننىڭ ءىنىسى نۇرلاننىڭ جان داۋىسى ەدى.
اعاسىنىڭ مۇشكىل ءحالىن كورىپ، شىرىلداعان جىگىت جاراتقانعا جالبارىنا بەردى. قايعىلى وقيعا بولعان جەر مەن جانبوبەك اۋىلىنا دەيىنگى ازاپتى جول. ەرلان ءومىر مەن ءولىمنىڭ اراسىندا جاتىر.
— ەروحا، ءسال شىداشى! سەن مىقتىسىڭ عوي! مەن قاسىڭدامىن! ەكەۋمىز بىرگە بارلىق قيىنشىلىقتاردى جەڭەمىز! — دەپ جىگەرلەندىردى ءىنىسى ەسى كىرەسىلى-شىعاسىلى جاتقان اعاسىن.
كولىكتىڭ ءجۇرىسى دە ونبەي قويدى. سونداي ساتتەردىڭ بىرىندە ول: «جىگىتتەر توقتاڭدارشى! اعام انا جاققا كەتىپ قالدى عوي دەيمىن!»، — دەپ كولىكتى توقتاتىپ، جانۇشىرىپ اعاسىنىڭ جۇرەگىن تىڭدايدى. ءبىرشاما ۋاقىتتان كەيىن اعاسىنىڭ جۇرەگى ءدۇرس-دۇرس سوعا باستاعانىن سەزدى. باۋىرى ەكى كوزىنەن اققان جاسىن ءسۇرتىپ: «و، اللا ساعان مىڭ دا ءبىر شۇكىر! اينالايىندار-اۋ، بىزگە تىكۇشاق جىبەرىڭدەرشى! ساناۆياسيا كەرەك! اعامدى قۇتقارىڭدارشى!»، — دەپ «وحوتزووپرومنىڭ» باسشىلارىنا جالىنىشتى داۋسىن قاتتىراق ەستىرتتى. ارعى جاقتاعى داۋىس: «تىكۇشاق تاڭەرتەڭ ءبىراق ۇشادى»، — دەگەن قىسقا جاۋاپ قايىردى. دىڭ-دىڭ-دىڭ...
ءومىر مەن ءولىمنىڭ اراسىندا ارپالىسقان ەرلاندى قۇتقارۋعا وتاندىق مەديسينا دارمەنسىزدىك تانىتتى. بارشىن اۋىلىندا دا، قورعالجىننىڭ اۋداندىق اۋرۋحاناسىندا دا جانساقتاۋ ءبولىمى جوق ەكەن! جان باۋىرى ءۇشىن جانۇشىرعان جىگىت داۋىسى قارلىققانشا كومەك سۇراۋمەن بولدى. جەدەل جاردەمنەن: «مى زا پرەدەلى گورودا نە ۆىەزجاەم!» — دەگەن سالقىن جاۋاپ ەستىگەندە سۇلق ءتۇسىپ وتىرىپ قالدى. سوندا ونىڭ نەسى جەدەل جاردەم؟ بۇل كەزدە ءاربىر مينۋت قىمبات بولاتىن. كوزى جاسقا تولعان نۇرلان مەن استاناداعى جۇبايى قۇرالايدىڭ ايقاي-شۋىنان كەيىن: «جەدەل جاردەم جولعا شىقتى!» — دەگەن حابار جەتتى. مالينوۆكا اۋىلىنان اسقاندا ماي بەكەتىندە جەدەل جاردەم كولىگى دە جەتتى. ءۇمىت وتى ويانعان ساتتە نۇرلان: «اللاعا شۇكىر! ءسال شىداشى! ءقازىر جانساقتاۋ بولىمىنە دە جەتەمىز. ساعان كومەكتەسەدى»، — دەپ اعاسىنىڭ ەكى قولىن قىسا بەردى.
«ءولىم اۋزىندا جاتقان ادامدى قۇتقارا الماعان مەديسينانى قالاي دامىعان دەپ اتايمىز؟ 10 ساعاتتان استام قانسىراعان ادامنىڭ ومىرىنە نەگە اراشا تۇسە المادى؟ «وحوتزووپرومنىڭ» باسشىلارى نەگە ءوز قىزمەتكەرىن قۇتقارۋعا نەمقۇرايدىلىق تانىتتى؟ قاتارداعى ينسپەكتورلاردىڭ زاڭمەن قورعالماعانى بىلاي تۇرسىن، تىم قۇرىعاندا ءومىرىن قۇتقارىپ قالۋعا نەگە ۇمتىلمادى؟ اعامنىڭ كولىگىنە براكونەرلەر شابۋىل جاساعاندا قۇزىرلى مەكەمەدەگىلەر نەگە جەدەل ارەكەت ەتپەدى؟ الدە، بارلىعى الدىن-الا اۋىز جالاسىپ، بىر-بىرىمەن كەلىسىپ الدى ما ەكەن؟».
استاناعا جەتكەنشە نۇرلاننىڭ باسىنان وسىنداي جاۋابى جۇمباق، مەشەۋ ساۋالدار بىرىنەن كەيىن ءبىرى تىزبەكتەلىپ ءوتىپ جاتتى.
الايدا جولدا كوپ قان جوعالتقان ەرلان ويانبادى. قانسىراعان كۇيى ءبىر تاۋلىك وتكەندە فانيدەن باقيعا اتتاندى.
***
كيىكتەردى قورعايمىن دەپ مەرت بولعان ەرلاننىڭ ەرلىگىن ەل-جۇرتى عانا ەمەس، كۇللى الەم ەستىدى. بەيبىت كۇننىڭ باتىرىنىڭ قازاسى بارشىن اۋىلىنىڭ عانا ەمەس، بار قازاقتىڭ قابىرعاسىن قايىستىردى. قارا شاڭىراقتاعى اكە-شەشەسى اڭىراپ قالدى. ەل-جۇرتى ەرلاندى «حالىق قاھارمانى» اتاعىنا لايىق كوردى. ەرلاننىڭ ءۇشىنشى نەمەرەسىنىڭ تۋعانىن كورە الماعانىنا نالىدى. نۇرعالييەۆتەر اۋلەتىنىڭ ۇمبەتى، اتاسى مەرت بولعان سوڭ اتۇستار ۇرپاعىن قۇداي بەرگەندەي بولىپ، اتا ارمانىن جالعارداي، ەرلاننىڭ تۋعان كۇنىندە، 30 قاڭتار كۇنى ىڭگالاپ دۇنيەگە كەلدى.
***
باكەن اپا ۇلىنىڭ سۋرەتىن قولىنان تاستاماي، اسىل بەينەسىنە قاراۋمەن قانشاما تاڭدى كوزبەن اتىردى. بالاسىنىڭ ءسابي كۇنىندەگى ءتاتتى قىلىقتارى، ىستەگەن ىستەرى كوز الدىنان كەتپەي قويدى.
ۇلى كىشكەنتاي كەزىنەن جان-جانۋارلاردى جانىنداي جاقسى كورەتىن. جەتى جاسار كەزى. جاقسى كورەتىن ءبىر مىسىعى بار. سوڭىنان بالاشا ەرىپ جۇرەتىن. كۇندىز مىسىعىن تاماقتاندىرۋمەن، ويناتۋمەن اۋرە بولادى. ەكەۋى بىر-بىرىنەن كۇنى-تۇنى ءبىر ەلى اجىرامايدى. ءتۇن بالاسىندا ۇيدەگى بالالار جەرگە قاتار-قاتار جاتىپ ۇيىقتايدى. دالادان كىرگەن مىسىعى يەسىن يىسىنەن تانىپ، تاۋىپ الاتىن دا جانىنا جاتادى. ەرلان ويانىپ كەتىپ، مىسىعىن قاتتى قۇشاقتاپ الىپ، باسىنان سيپاپ جاتىپ، ۇيقىعا كەتەدى. بالانىڭ وزىنە دەگەن سۇيىسپەنشىلىگىنەن باسى اينالعان ءۇي جانۋارى قوينىنا تۇمسىعىن تىعىپ الىپ ۇيىقتايدى.
يتكە دە جانى قۇمار ەدى. كىشكەنتاي توبەتى اققويان ءبىر ەلى جانىنان قالمايدى. مەكتەپكە بارار جولدا قالتاسىنا شاقپاق قانتتى تولتىرىپ الىپ، جەتكەنشە بەرەدى. ساباقتان قايتقانشا ءيتى مەكتەپتىڭ الدىندا كۇتىپ جاتادى. اققويان بىردە ۇيگە كەلگەن بوتەن كىسىگە ءۇرىپ، كىرگىزبەي قويادى. تاس لاقتىرادى. تاياقپەن ۇرادى. ءبىراق ول ۇيگە كىرە الماي، كەرى قايتادى.
مەكتەپتەن ورالعان بالا ەسىكتىڭ الدىندا جاتقان توبەتىن كوردى. مۇڭعا تولعان ەكى كوزىنەن ءبىر جاعدايدىڭ بولعانىن بىردەن سەزدى. سومكەسىن جەرگە قويا سالا:
— اققويانىما كىم ءتيىستى؟ ماعان قاراپ جىلاپ جاتىر! — دەپ كوتەرىپ الىپ ۇيگە كىرگىزدى. ءيتىن قايتا-قايتا موينىنان قۇشاقتاپ، بەتىنەن ءسۇيىپ ءجۇر.
— اپا، مەن ەندى ءيتىمدى دالاعا شىعارمايمىن. ۇيدە جاتادى! — دەدى ول جالىنىشتى ۇنمەن اناسىنا.
— ويباي-اۋ، ونى قايتەسىڭ ۇيگە كىرگىزىپ؟ دالىزگە اپار! — دەپ ۇرىسقان باكەن اپا ءيتىنىڭ كوڭىلىن تابۋعا جانىن سالعان بالانىڭ قىلىعىنا ءبىر جاعىنان ريزالىقپەن قارادى. بالا ءتۇنى بويى ۇيىقتاماي، توسەگىنىڭ استىنا جاتقىزعان اقققويانىنىڭ كوزىنە قاراپ، جۇباتۋمەن بولدى. بايعۇس يت الدىنا قانداي تاماق قويسا دا زاۋقى سوقپادى.
— انە قاراڭدارشى، تاماق تا ىشپەيدى، ماعان قاراپ جىلاپ جاتىر! — دەپ قويادى ۇيدەگىلەرگە داۋىسىن قاتتىراق شىعارىپ.
— سەن ونىڭ جىلاعانىن قايدان ءبىلدىڭ؟ — دەگەن اناسىنىڭ سۇراعىنا: «انەكي، كوزىنەن جاس اعىپ جاتىر!» دەپ ودان سايىن يتىنە بايەك بولىپ، كوزىندەگى جاسىن ءسۇرتىپ قويادى.
***
ارادا كوپ كۇندەر ءوتتى.
الدىڭعى «دجيپپەن» قاشىپ كەتكەن براكونەرلەر ءوز ەرىكتەرىمەن پوليسياعا بەرىلدى. ەكى ينسپەكتوردى ءولىمشى ەتىپ ساباپ، بىرەۋىن ولتىرگەن ەكىنشى «دجيپتەگى» براكونەرلەرگە ىزدەۋ جاريالاندى. كوپ ۇزاماي قۇقىق قورعاۋشىلار ولاردى دا ۇستادى. ارنايى جەدەل تەرگەۋ توبى قۇرىلىپ، سوتقا دەيىنگى تەرگەۋ جۇرگىزىلدى. تەرگەۋ ۇزاققا سوزىلسا دا قاندىقول كۇدىكتىلەر سوتتالعان جوق. ولاردىڭ اراسىندا بۇرىنعى قۇقىق قورعاۋ ورگاندارىنىڭ قىزمەتكەرلەرى بار ەدى. «ءمۇيىزدى مافيا» دەگەن الىپ قىلمىستىق سينديكاتقا پوليسيانىڭ ءوزى قولداۋ كورسەتتى. ءادىل جازالايدى دەگەن سوتتىڭ ءوزى ادام ءولتىردى دەگەن كۇدىككە ىلىنگەن براكونەرلەردىڭ قارۋى مەن كولىكتەرىن كامپەسكەلەۋگە دە شەشىم شىعارمادى. جازاسىزدىعىنان جالعاندى جالپاعىنان باسقان جاۋىزدار كيەلى اڭدى قىرۋدى جالعاستىردى. جۇزدەگەن، مىڭداعان كيىكتەردى اتىپ، ءمۇيىزى مەن تۇياعىن كەسىپ الىپ، جانۋارلاردىڭ كيەسىنەن قورىقپاي تىرىدەي لاقتىردى. ارقاداعى اقبوكەندەردىڭ باسىنا ورناعان زوبالاڭ توقتامادى.
كوپ ۇزاماي قاراعاندى وبلىسىنىڭ نۇرا اۋدانىنىڭ اۋماعىنان ءمۇيىزى كەسىلىپ، دالادا دوڭكيىپ ءولىپ جاتقان 115 قوڭىر اڭنىڭ دەنەسى تابىلدى. سايىن دالانى ولگەن كيىكتىڭ قانى مەن دەنەسىنەن تاراعان قارالى ءيىس جايلادى.
ارام اقشاعا قۇنىعىپ، كوزدەرى قانتالاعان قاندىقول جاۋىزدار ادام سوتىنان قۇتىلعانىمەن، اللانىڭ سوتىنان قۇتىلماسىن ويلار ەمەس. اۋىر كۇناسى ءۇشىن ءوزى دە، ۇرپاعى دا ءومىر بويى قورلىقپەن وتەتىنىن قاپەرىنە دە المادى. ەل ىشىندەگى اڭىزدا قاسيەتتى اڭدى ولتىرگەندەر ادام اتانىڭ قارعىسىنا ۇشىرايتىنىن ايتادى.
ەرتە زاماندا ءومىر سۇرگەن ءبىر اڭشى اڭ اۋلاپ ءجۇرىپ، كيىكتىڭ ەشكىسىن اتىپ الادى. سوندا سانىنان وق تيگەن جارالى انالىق كيىككە ادامشا ءتىل ءبىتىپ:
— قۇداي ءۇشىن مەنى ولتىرمەشى! مەنىڭ كىشكەنتاي ەگىز لاعىم بار. ولار مەنسىز ءومىر سۇرە المايدى. قوس لاعىم جەتىم قالماسىن! ەگەر سەن تىلەگىمدى ورىنداساڭ، ساعان باتامدى بەرەمىن، سوندا سەنىڭ جولىڭ اشىلىپ، بار مۇرات-ماقساتتارىڭ ورىندالادى. سەن ءومىر بويى باقىتتى بولاسىڭ، — دەپ جالبارىنىپتى. ءبىراق قاتىگەز اڭشى كيىكتى تىڭداماپتى. جىلدار وتە كەلە الگى اياۋشىلىق سەزىمى جوق قاتىگەز اڭشى ءومىر بويى جولى بولماي، قورلىقپەن ومىردەن ءوتىپتى.
You Might Also Like
-
ەجەلدەن قازاق ءتورت تۇلىك مالدىڭ جاعدايىمەن كوشىپ-قونىپ، قىستاۋ مەن جايلاۋدىڭ اراسىندا ءتۇتىن تۇتەتىپ ءومىر ءسۇردى ەمەس پە؟
-
ءبىر زاماندارى عالىمدار مەن اقىندار «ۇنسىزدەر ءماجىلىسى» اتتى بىرلەستىك قۇرادى. مۇشەلەر سانى وتىز ادامنان تۇراتىن جانە وتىزدان اسىرمايتىن. مۇشەلىكتىڭ شارتى كوپ ويلانۋ جانە از سويلەۋ، حيكم...
