ۇقىپتى ۇسەن
اتا-اجەسىنىڭ باۋىرىندا وسكەن ۇسەن ۇقىپتى بالا. قاي قاشان كورسەڭىز، كيىمى تاپ-تازا، مۇنتازداي بولىپ جۇرگەنى. ۇستىنە قىلشىق جۋىتپايدى. ونىڭ مۇنداي ءمۇتتاقىم ادەتى اتاسىنان جۇققان.
— ادامنىڭ ءسوزى دە، ءىس-قيمىلى دا، كيگەن كيىمى دە وزىنە قونىمدى ءھام جيناقى بولعانى ءلازىم! تازالىق پەن شيراقتىق كىسى كوركى، — دەيتىن اتاسى ىلعي.
ۇسەننىڭ اتاسى ول سوزدەردى ايتىپ قانا قويمايدى، ءوزى دە ايتقان ۋاجىنەن الشاق كەتپەگەن، بەس ۋاقىت نامازىن قازا قىلمايتىن تاقۋا، ءھام ادال كىسى.
ءاۋ باستا ۇسەن تازا، جيناقى دەگەن سوزدەردىڭ ماعىناسىن تۇسىنگەنىمەن، «كورىك» ءسوزىن اسا ۇعىڭقىرامايتىن. الدىڭعى جىلى مەكتەپ قابىرعاسىن اتتاعاندا، كىتاپتان وقىپ ءبىلدى. تۇسىنە بىلگەن جانعا كىتاپ باعا جەتپەس قازىنا عوي!
...كەشقۇرىم. كەڭ داڭعىل بويىنداعى اۆتوبۋس ايالداماسىندا كولىك توسقان ادامدار كوپ. مەكتەپتەن شىققان ۇسەن تىمپىڭ-تىمپىڭ ەتىپ كەلدى دە، ەرەسەك ادامداردان اۋلاقتاۋ وڭاشا بارىپ تۇردى.
— كۇز ايى بولعانىمەن، ىستىق قايتار ەمەس، — دەدى قىسقا جەڭ جەيدە كيگەن، بۇيرا باس اعا قاسىندا تۇرعان سەرىگىنە مويىن بۇرىپ.
— راس ايتاسىڭ. جارىقتىق اۋا-رايى كۇزگە ۇقسامايدى. جاڭبىر جاۋماعالى دا ءبىرتالاي ۋاقىت. — ۇزىن بويلى، جالاڭ باس اعا دا ىستىقتاعان سياقتى. كاستومىن شەشىپ، قارىنا ءىلدى.
— «اسپان اينالىپ، جەرگە ءتۇسىپ تۇر»، دەۋشى ەدى كاريالار. سول راس، — دەدى بۇيرا باس اعا قالتا تەلەفونىنا ءۇڭىلىپ. — ءماسساعان! كۇتكەنىمىزگە جارتى ساعات! قايدا، بار بولعىر كولىك؟!
— № 55 مارشرۋتتىڭ ىزاسى ابدەن ءوتتى. ىلعي وسى! زارىقتىرىپ قوياتىنى-اي!
— تاماعىم قىشىپ بارادى. ءتاۋىر شىلىمىڭنان شەگەيىك، ءجۇر بىلايىراق، — دەدى ۇزىن بويلى اعا دوسىنا.
ەكى اعا تەمەكىلەرىن تۇتاتىپ، اڭگىمەلەرىن ايتىپ تۇرعاندا كوپ كۇتتىرگەن № 55 اۆتوبۋس انادايدان كورىنگەن. ۇلكەن اعالار تارتىپ تۇرعان تەمەكىلەرىن وشىرمەستەن لاقتىرا سالدى. تاعاتسىزدانىپ تۇرعان كىسىلەر سالون تولى جولاۋشىلارعا قاراماستان، ءبىرىن-بىرى يتەرىپ، سىعىلىسىپ، توپىرلاپ ەنىپ جاتىر. ۇسەن كەلەسى جولى مىنەيىن دەپ اسا ۇمتىلا قويمادى. ورنىنان تاپجىلعان جوق. كەنەت كىشكەنتاي بالانىڭ نازارى جەرگە لاقتىرىلعان تەمەكى تۇقىلىنا تۇسە كەتتى. تولىق سونبەگەن ءشوپ اراسىنداعى تۇقىل بىقسىپ جاتىر. الدا-جالدا ەشكىم بايقاماسا، قۋراعان ءشوپ تۇتانىپ ورتكە ۇلاسۋى مۇمكىن-اۋ! قايتسە بولادى؟!
ۇسەن جاقىنداپ باردى دا، اياعىمەن مىجىپ، تاپتاپ ەڭكەيىپ جەردەن كوتەردى. ونى-مۇنى قوقىس تاستايتىن تۇبەك ىزدەپ ەدى، كوزىنە تۇسە قويمادى.
كىسىلەردىڭ كوپتىگىنەن ەسىكتەرى جابىلماعان اۆتوبۋس ءالى ورنىنان قوزعالعان جوق. جۇرگىزۋشى اعا ەسىككە قىسىلىپ، باسپالداقتا تۇرعان جولاۋشىلاردىڭ جەرگە ءتۇسۋىن ءوتىنىپ، قايتا-قايتا دىبىس كۇشەيتكىش قۇرىلعى ارقىلى حابارلاعانىن ەلەپ-ەسكەرىپ جاتقان جان جوق. ۇيالدى ما ەكەن، الگىندەگى تەمەكى تۇقىلىن لاقتىرعان ەكى كىسى جانە بىرەر جولاۋشى كەلەسى اۆتوبۋسقا وتىرماقشى بولىپ جەرگە ءتۇستى.
— شىلىمدى شالا-پۇلا شەگىپ ەدىك، اكەلشى تاعى، — دەدى بۇيرا باس اعا.
وسى كەزدە ولاردىڭ قاستارىنا تاقاپ بارعان ۇسەن:
— مىناۋ سىزدەردىكى مە؟ مەن ءشوپ اراسىنان جاڭا تاۋىپ الدىم، — دەدى.
— مىنا بالا قايتەدى، ەي؟! كىم، نەنى لاقتىرماي جاتىر؟! جانە ءبىز سەنەن شىلىم تۇقىلىن سۇرادىق پا؟ بار، جايىڭا تۇر، — دەدى ۇزىن بويلى اعا كىشكەنتاي ۇلعا اشۋلانا قاراپ.
— نەگە لاقتىردىڭىز؟! مەن ءبارىن كورىپ تۇردىم. سويتۋگە بولا ما ەكەن؟!.
تاقىلداپ، شىنىن ايتقان بالانىڭ ساۋالىنا ۇلكەندەر جاۋاپ قايتارعان جوق. سول ساتتە كوشە بۇرىلىسىنان № 55 مارشرۋت كورىندى.
ۇلكەندەرمەن بىرگە ۇسەن دە اۆتوبۋس سالونىنا ۇمتىلدى.
You Might Also Like
-
ءابۋتالاپ كاريانىڭ قالاعا قونىس اۋدارعانىنا كوپ بولا قويعان جوق. اۋىلداعىداي ەمەس، مۇنداعى تىرلىك ارسى-گۇرسى، قىم-قۋىت پا دەيسىڭ. كوپ قاباتتى ءۇيدىڭ تۇرعىندارى تاڭەرتەمەن جۇمىستارىنا كەتەدى. كەشكە قا...
-
وڭاشا بولمەدە ەرتەڭگى ساباققا دايىندالىپ وتىرعان قارا بالا كەنەت سەلك ەتتى. تىرس-تىرس ەتكەن بۇل نە؟ زارەسىنىڭ ۇشقانىن قاراشى! ءا-ا، جايىمەن تەرەزەگە ۇرىلعان جاڭبىر تامشىلارى عوي. قاراشا ايىنىڭ قارا ...
