باعىڭ نۇرلانسىن، بالام!
ءابۋتالاپ كاريانىڭ قالاعا قونىس اۋدارعانىنا كوپ بولا قويعان جوق. اۋىلداعىداي ەمەس، مۇنداعى تىرلىك ارسى-گۇرسى، قىم-قۋىت پا دەيسىڭ. كوپ قاباتتى ءۇيدىڭ تۇرعىندارى تاڭەرتەمەن جۇمىستارىنا كەتەدى. كەشكە قاراي ورالىسىمەن ۇيدى-ۇيلەرىنە كىرىپ، ەسىكتەرىن تارس بەكىتىپ، قايتىپ كورىنە قويمايدى. كولەڭكە ۇزارىپ، ءىڭىر قاراڭعىلىعى قويۋلانعانشا ەسىك الدىنداعى اعاش ورىندىقتاردىڭ بىرىنە جايعاسىپ جان-جاعىنا قاراپ وتىرادى. بۇل جەردە دە نەمەرەلەرىن ويناتقان بىردى-ەكىلى كەمپىر-شالدان وزگە ەشكىم كوزگە شالىنبايدى.
ءبىرازدان بايقاپ ءجۇر، بۇلار تۇراتىن ەكىنشى قاباتتاعى قاراما-قارسى پاتەردەگى كىشكەنتاي ۇل كاريانىڭ قاسىنان ۇندەمەي وتە شىعادى. ءوزى پىسىق بالا سياقتى. تاپ-تۇيناقتاي كيىنىپ، قوڭىر سومكەسىن ارقالاپ تىمپىڭ-تىمپىڭ كەتىپ بارا جاتقانىمەن، ۇلكەن اداممەن سالەمدەسۋدى بىلمەيدى. كىپ-كىشكەنتاي بولىپ، ول دا اسىعىس.
كۇن بەسىنگە تاياعان مەزگىل. اسىعا ادىمداپ قاسىنان وتە بەرگەن ۇلدى كاريا توقتاتتى.
— ءاي، بالام كىشكەنە ايالداشى!
كىشكەنتاي ۇل كىدىردى.
— اتىڭ كىم؟
— اسحات.
— قاي سىنىپتا وقيسىڭ؟
— تورتىنشىدە.
— ساباعىڭ قالاي؟
— جاقسى.
— بەستىك باعالارىڭ كوپ پە؟
— يا، اتا! ءبىر ساباقتان ءتورتىم بار.
— اكە-شەشەڭ ۇلكەن كىسىمەن امانداس دەپ ايتپاي ما؟
— ايتادى.
— ەندەشە، نەگە امانداسپايسىڭ؟!
اسحات جاۋاپ قايتارمادى. باسىن تومەن تۇقىرتىپ تۇرىپ قالدى.
— ءجا، قىسىلما! وندا بىلاي ەتەيىك. سەن وسى جەردە تۇر، مەن ۇيدەن شىعىپ كەلە جاتايىن. مەنى كورگەندە اسسالاۋماعالەيكۋم دەپ داۋسىڭدى شىعارىڭقىراپ امانداس، جاراي ما؟
— جارايدى.
كاريا پودەزگە ەنىپ، ۇزاماي قايىرا شىقتى. ونى كورگەن اسحات:
— اسسالاۋماعالەيكۋم، اتا! — دەدى داۋىستاپ.
— ۋاعالەيكۋماسسالام! وركەنىڭ ءوسسىن شىراعىم! — دەدى كاريا.
ءابۋتالاپ اتا بۇل جاتتىعۋىن ەرىنبەي بەس رەت قايتالادى.
ارادا ءۇش كۇن ءوتتى. ءابۋتالاپ اقساقال ەسىك الدىندا وتىرعان. اكەسىنە ەرىپ ەسىك الدىنا شىققان اسحات كاريانى كورە سالا:
— اسسالاۋماعالەيكۋم، اتا! — دەدى جۇگىرىپ كەلىپ.
— اينالايىن، ۇلكەن جىگىت بول! — دەدى اتا ريزا پەيىلمەن.
— ءسىز تۋرالى ەستىگەم، - دەدى اسحاتتىڭ اكەسى. — سىرتىڭىزدان جاقسى بىلەمىز. ءوزىم دە تانىسايىن دەپ ءجۇر ەدىم.
— وقاسى جوق شىراعىم! تانىسىن، تانىماسىن جاسى كىشى ادامداردىڭ، ونىڭ ىشىندە بالالاردىڭ ۇلكەن كىسىگە سالەم بەرۋى — ادامگەرشىلىك! ىزەت — ءىلتيپات! وسىنى ەستەرىڭدە ۇستاڭدار! ال، اسحات قۇلىنشاق، قولىڭدى جاي، باتا بەرەيىن!
— اسحات پەن اكەسى قولدارىن جايدى.
— جورتقاندا، بالام جولىڭ بولسىن!
ءومىر جاسىڭ ۇزاق بولسىن!
قاتارىڭنان وزعان ورەن بول،
تەڭىزدەيىن تەرەڭ بول!
اقىلىڭ اسسىن،
ىقىلاسىڭ تاسسىن!
ساعىڭ سىنباسىن،
باعىڭ نۇرلانسىن!
اللاھۋاكبار!
ءاۋمين!
سودان باستاپ اسحات ۇلكەن كىسىلەردى كورسە سالەمدەسىپ جۇرەتىن بولدى.
You Might Also Like
-
ءابدىراسىلوۆ نۇرتاي ءال-فارابي اتىنداعى قازۇۋ-دىڭ 1-كۋرس ماگيسترانتى
-
اتا-اجەسىنىڭ باۋىرىندا وسكەن ۇسەن ۇقىپتى بالا. قاي قاشان كورسەڭىز، كيىمى تاپ-تازا، مۇنتازداي بولىپ جۇرگەنى. ۇستىنە قىلشىق جۋىتپايدى. ونىڭ مۇنداي ءمۇتتاقىم ادەتى اتاسىنان جۇققان.
