InfoHub Logo

قولىم بوستا ستۋدەنت كەزدە ارناعان قويىن داپتەرىمدى اشىپ وقىدىم…ىشىندە تالاي–تالاي ەستەلىكتەر جازىلىپتى. وتكەن كۇندەردىڭ قىزىقتى ساتتەرى كوز الدىڭا ءتىزىلىپ ەسكە تۇسەدى. پاراقتاپ وتىرىپ، ىشىنەن ەرەكشە ءبىر جازىلعان ەستەلىككە كوزىم ءتۇستى. ءيا، ناعىز ەستەلىك دەگەن وسى بولار! مەكتەپ بىتىرگەنىمىزگە 2 جىل تولعاندا ۇستازىمنىڭ ماعان ارناپ جازعان ەستەلىگى ەكەن. ال، مەكتەپتى بىتىرگەنىمىزگە 14 جىل ءوتىپ، ارامىز الشاقتاسا دا ۇستازىممەن ءالى كۇنگە دەيىن حابارلاسىپ، كەزدەسىپ تۇرامىز.

مەن ءۇشىن شىن جۇرەكتەن جازىلعان سول ءبىر ىزگى تىلەكتەردىڭ ارقاسىندا وقۋىمدى قىزىل ديپلوممەن اياقتاپ، ماماندىق يەسى بولىپ، ءبىلىمنىڭ بيىك شىڭىنا ورمەلەپ، ومىردەگى اسقار تاۋداي ارماندارىمدى ورىنداۋعا تىرىسىپ كەلەمىن.

سول ۇستازىم - ماحانبەتوۆا گۇلايىم قازىرگى تاڭدا پانفيلوۆ مەكتەبىنىڭ ديرەكتورى، قازاق ءتىلى مەن ادەبيەتى ءپانىنىڭ ءمۇعالىمى. 5-سىنىپتا جەتەكشىلىككە العاش كەلگەن كۇننەن باستاپ، وتە قاراپايىم، اقىلدىلىعىمەن، جۇرىس-تۇرىسىمەن مەنى وزىنە بىردەن باۋراپ العان ەدى. قازاق تىلىنەن وليمپياداعا سەن باراسىڭ دەگەن كۇنىنەن باستاپ ارامىز جاقىنداي ءتۇستى. ۇستازعا دەگەن سۇيىسپەنشىلىگىم ارتا ءتۇسىپ، اينىماس دوستارعا اينالدىق.

4-سىنىپقا دەيىن اناما ەلىكتەپ، باستاۋىش سىنىپ ءمۇعالىمى بولامىن دەۋشى ەدىم. 5-سىنىپقا وتكەننەن سوڭ، ۇستاز ماحابباتى جەڭىپ قازاق ءتىلى مەن ادەبيەتىن تاڭدادىم.

مىنە، «ارماندار ورىندالادى - ماقساتتار ايقىن بولسا» - دەگەن راس ەكەن. قازىرگى تاڭدا ۇستازىممەن ارىپتەس بولىپ، حابارلاسىپ وتىرامىن. ومىردەگى ەكىنشى اناما، سىر بولىسەر سىرلاس دوسىما اينالىپ ۇلگەرگەن دەسەم، ارتىق ايتپاعانىم.

«ۇستاز بەن شاكىرت اراسىندا ۇمىتىلماس دوستىق بولادى. كىم دە كىم ۇستازىمەن ۇمىتىلماس دوستىقتا بولسا، ول جان ۇلكەن باقىتقا يە بولادى»- دەپ جازىپپىن مەكتەپتە وقىپ جۇرگەنىمدە.

ۇلاعاتتى ۇستازىما ارناپ كۇندەلىگىمدى شيمايلاپ، ءار كەزدەردە جازىلعان شۋماق ولەڭدەرىمدى دە تىزگىم كەلىپ وتىر.

ەڭ اياۋلى ۇستازىم مەنىڭ،
بولدىڭ ماعان قيماس دوس ءوزىڭ.
جۇرەكتەگى بار تىلەگىن،
ارنايدى سىزگە ءوز شاكىرتىڭ.

وقىتتىڭىز جەتى جىل ءبىزدى،
ۇيرەتتىڭىز بار ءبىلىمدى.
جاقسى كورىپ قالىپپىن عوي،
ءوز انامداي ۇستازىم ءسىزدى.

ۇستازىم مەنىڭ ۇستازىم،
كەلەدى وزىڭە ۇقساعىم.
سىزدەي ۇستاز بولا السام،
ورىندالار ارمانىم دەپ شىن نيەتتەنگەن ەكەنمىن  بالالىق، جاستىق شاعىمدا…

* * *

ۇستازىم- ەكىنشى انام ايالاعان!
شاكىرتىنەن ءبىلىمىن اياماعان.
ءاربىر ايتقان اقىلىڭ جۇرەگىمدە،
كەرەك كەزدە بولادى سايا ماعان!!!

* * *

جان ۇستازىم جاقسى كورەم ءوزىڭدى،
ساعىنىشىم تۇسىمە جانە ەنگىزدى.
كەزدەسىپ ءبىر قاۋىشىپپىز ەكەۋمىز،
شىن اسىعا كۇتەر ەدىم سول كۇندى.

* * *                     

جان ۇستازىم تۇسىمە ءجيى كىرەسىز،
ءتۇس ءقادىرىن ساعىنساڭىز بىلەرسىز.
شەكسىز مەندە سىزگە دەگەن ساعىنىش،
سوندا دا ءسىز جاۋاپ قاتپاي جۇرەسىز.

* * *

ساعىنىپ سەنى ۇستازىم،
ەسىمە ءار كەز الامىن.
ەستىگىم كەپ داۋسىڭدى،
قوڭىراۋ ءار كەز شالامىن.

ساعىنا بەرەم ءوزىڭدى،
ول ءۇشىن ايىپ ەتپەڭىز.
جولداعان ۇزىك بۇل سىردى،
شاكىرتىڭىز دەپ ءبىلىڭىز.

* * *

ەكىنشى انام بولا ءبىلدىڭ ومىردە،
سىرلارىم جوق سىزگە ايتپاعان كوڭىلدە.
دوستىعىمىز ماڭگى بولسىن تىلەرىم،
ريزا بولام ماعان كوڭىل بولگەندە.

* * *

ءبىلىم بەرگەن شارشاماي بىزگە،
اقىلمەنەن  سالاتىن جونگە.
20 جىل بىرگە دوس بولدىق مىنە،
مىڭ العىس ايتام ۇستازىم سىزگە.

ماقتارال اۋدانى، اسىقاتا كەنتى
"ءنازىر تورەقۇلوۆ اتىنداعى №121 جوم" كمم-نىڭ
قازاق ءتىلى مەن ادەبيەتا ءپانى ءمۇعالىمى تۋلتايەۆا پەرۋزا

---