حالىق پەن حالىقتى، ادام مەن ادامدى تەڭەستىرەتىن - ءبىلىم
ءارىپ تانىپ، وقۋ ۇيرەنىپ جۇرگەن كىشكەنتاي كۇندەرىمنىڭ بىرىندە مەكتەپتىڭ كىرە بەرىسىندە ءىلىنىپ تۇرعان مۇحتار اۋەزوۆ اتامىزدىڭ "حالىق پەن حالىقتى، ادام مەن ادامدى تەڭەستىرەتىن نارسە - ءبىلىم" دەگەن ءسوزىن وقىدىم. سول كۇننەن بەرى ساباققا كىرىپ-شىققان سايىن الگى جەرگە كوز جۇگىرتىپ، ارتىنشا داۋىستاپ قايتالايتىنمىن. ءبىراق، سول قىسقا عانا ءبىر اۋىز ءسوزدىڭ ماعىناسىن قانشاما جىلدار وتكەندە عانا تولىق تۇسىنە الدىم. سويتسە، دانا بابامىز ءبىلىمنىڭ بارشا قۇدىرەتىن سول ءبىر ىقشام قاناتتى سوزىنە سىيدىرىپتى-اۋ!
ادامدى ادام ەتكەن الدىمەن - ەڭبەك بولسا، ودان سوڭ - ءبىلىم ەكەنى داۋسىز. ال بۇگىنگى جاھاندانۋ زامانىندا ءبىلىمنىڭ قوعامداعى ءرولى تىپتەن ماڭىزدى. قازىرگى تاڭدا ءبىزدىڭ ماقساتىمىز نە، باعىتىمىز قانداي؟ باستى ماقساتىمىز: ماڭگىلىك ەل بولۋ، دامىعان، الەم الپاۋىتتارىمەن تەرەزەسى تەڭ، ەشبىر كوشتەن قالىسپايتىن باسەكەگە قابىلەتتى مەملەكەت رەتىندە قالىپتاسۋ. وسى ماقساتتارعا جەتۋدىڭ جالعىز كەپىلى - ءبىلىمدى ۇرپاق، سانالى حالىق.
ادامنىڭ باسىندا ءبىلىم، كوكىرەگىندە جارىق شامى بولماسا ول ءوزى جۇرگەن قاراڭعىدا قولىنداعى بارىنان ايرىلادى. ءبىلىمسىز جۇمسالعان كۇش-جىگەر دە، ەڭبەك تە ءونىمسىز. ال حالقى ءبىلىمدى ەلدىڭ كۇللى الەمگە كوزى اشىق بولادى. ءبىلىمدى ەلدىڭ بايلىعى دا، بەرەكەسى دە سارقىلمايدى. دامىعان ەلدەر دەگەنىمىز يندۋستريالدى جانە عىلىمي-تەحنيكالىق توڭكەرىس كەزەڭىن باسىنان وتكەرگەن، ەكونوميكادا، مادەنيەتتە جانە ساياسي-الەۋمەتتىك قۇرىلىمدا ەداۋىر جوعارى دەڭگەيگە كوتەرىلگەن ەلدەر ەكەن. بۇل تىزىمنەن كورىنۋ ءۇشىن ءاربىر سالا بىلىكتى دە ءبىلىمدى مامانداردىڭ قىزمەت ەتۋىن تالاپ ەتەدى دەسەك قاتە بولماس.
كوردىڭىز بە، حالىقتى حالىقپەن تەڭەستىرەتىن نارسە ونىڭ بايلىعى، جەر كولەمى نەمەسە تاعى باسقا فاكتىلەر ەمەس. حالىقپەن حالىقتى، وركەنيەت پەن وركەنيەتتى سالىستىرۋدىڭ نەگىزگى بىرلىگى - ءبىلىم. ءبىلىمى وزعان ەل باسقا جاعىنان دا ىلگەرىلەي بەرەتىنى ءسوزسىز. ءدال سول سەبەپتەن دە مەملەكەتىمىز ءبىلىم ماسەلەسىنە كەلگەندە بارىن سالۋدا.
مىسال رەتىندە ءوزىم وقىپ اياقتاعان جامبىل وبلىسى، سارىسۋ اۋدانى، جاڭاتاس قالاسىنداعى قارا شاڭىراق ءبىلىم ورداسى - مۇحتار اۋەزوۆ اتىنداعى مەكتەپ-گيمنازياسىن ايتا الامىن. ساپالى ءبىلىم ءۇشىن ايانباي ەڭبەك ەتەتىن مەكتەپ "تاربيەسىز بەرىلگەن ءبىلىم - ادامزاتتىڭ قاس جاۋى" دەگەن اتا ءسوزىمىزدى دە ەستەن شىعارعان ەمەس. وقۋشىلاردى ءبىلىمدى جانە مادەنيەتتى ينديۆيد ەتىپ قالىپتاستىرۋدا ناتيجەلى جۇمىس اتقارىپ جاتقان م. اۋەزوۆ اتىنداعى مەكتەپ-گيمنازياسى اۋدان ءتىپتى وبلىس كولەمىندە كوش باستاپ تۇرعان ابىرويلى ءبىلىم ورداسى. "ايەل باستاعان كوش وڭباس" دەگەن ەسكى ستەرەوتيپ قازاقتا ءبىرازعا دەيىن بولدى. الايدا، بۇگىنگى كۇنى ول ءسوزدىڭ ەش ءمانى جوق ەكەنىن كوپتەگەن نازىك جاندى قوعام قايراتكەرلەرى دالەلدەدى. جانە سونىڭ ايقىن ءبىر دالەلى: اتالعان مەكتەپتىڭ ديرەكتورى قامباربايەۆا روزا سارسەبەك قىزى. ءوزىنىڭ بىلىمىمەن، ۇلكەن تاجىريبەسىمەن قوسا تالاپشىلدىعىمەن ەرەكشەلەنەتىن روزا سارسەبەك قىزى قانشاما شاكىرتتەردىڭ بىلىمگە دەگەن قۇشتارلىعىن ارتتىرىپ، ولاردىڭ ءبىلىمدى، ساۋاتتى ءارى جان-جاقتى بولىپ قالىپتاسۋى ءۇشىن ەڭبەك ەتۋدە. جاستار تاربيەسىنە دەن قويىپ، ساۋاتتى ۇرپاق قالىپتاستىرۋدا ءاربىر ادام شىن بەرىلە جۇمىس جاساسا بولاشاقتىڭ باعدارى سول ەمەس پە؟
ويتكەنى جاس ۇرپاقتىڭ ءبىلىمى ءۇشىن توگىلگەن تەر - حالىقتىڭ بولاشاعى ءۇشىن توگىلگەن تەر. قالاي بولعاندا دا ادام مەن ادامدى، حالىقپەن تەڭەستىرەتىن نارسە - ءبىلىم ەمەس پە؟!
مەيربەك بايان مۇراتبەك قىزى
ءال-فارابي اتىنداعى قازاق ۇلتتىق ۋنيۆەرسيتەتى
جۋرناليستيكا فاكۋلتەتىنىڭ 1-كۋرس ستۋدەنتى
You Might Also Like
-
ءبىزدىڭ قازىرگى قوعامداعى جاستار تاۋەلسىزدىكتى قالاي تۇسىنەدى؟ ءقادىرىن جەتە بىلە مە؟ دەگەن سۇراقتار سانامدا كوپ. وسىلاي ويلانا وتىرىپ مەن ءوزىمنىڭ ەلىم تاۋەلسىز قازاقستان جايلى تول...
