ءبىر بايدىڭ تورتكوز، مويناق توبەتتەرى،
وزدەرى، يت بولسا دا، ادەپتى ەدى.
تۇندە ءۇرىپ، كۇندىز ۇرمەي، جاي جاتاتاتىن
بولادى ادەپتى ءيتتىڭ ادەتتەرى.
ءتۇس مەزگىل ەكى توبەت تويىپ جاتىپ،
كەمپىر ناز-وكپەلەرىن قويىپ جاتىپ،
اس ءۇيدىڭ الدىنداعى كۇن شۋاقتا
سويلەستى ءار نارسەنىڭ باسىن شاتىپ.
ءسوز قىلدى جاقسىلىقتى، جاماندىقتى،
جومارتتىق، مىرزالىق پەن ساراڭدىقتى.
دوستىقتىڭ، دۇشپاندىقتىڭ جايىن سويلەپ،
قولعا الدى تاتۋلىق پەن ارازدىقتى.
ءتىلمارسىپ سول ۋاقىتتا ايتتى مويناق:
«مەنسىز-اق قارا، تەرتكوز، ءوزىڭ ويلاپ.
دۇنيەدە ودان ارتىق نە نارسە بار -
تۇرعاننان تاتۋلىقپەن كۇلىپ-ويناپ؟!
دوس بولساڭ قۇشاقتاسىپ، جانعا بالاپ،
ءسوز ايتساڭ بىر-بىرىڭە «شىراق، قاراق»،
التى كۇن اشارشىلىق كورسەڭ داعى،
جەمەسەڭ ءبىرىڭ جوقتا ءبىرىڭ تاماق؛
دوستىڭ دوس جۇلدىرماسا جاۋعا تۇگىن،
ەش نارسە ايىرماسا ارا-جىگىن،
ءبىرىنىڭ قاباعىنا ءبىرى قاراپ،
بىلمەسە كۇننىڭ قالاي وتكەندىگىن! -
نە بار دەپ دۇنيەدە مۇنان ارتىق،
مەن قالىپ ءبىر قيالعا تۇرمىن بۇگىن.
جولدىاياق، اقساق قۇتپان، جامان سارقۇس،
سولار دا تاتۋ بوپ ءجۇر، بىزدەر تۇگىل».
سويلەدى ماڭىزدانىپ ەندى تورتكاز:
«موينەكە، مۇنىڭ ابدەن ايتارلىق ءسوز.
تۇرمايتىن ءبىر كۇن تاتۋ نەمىز بار دەپ،
مەن داعى ويلاۋشى ەدىم وسىنى ءار كەز.
نە كەلىپ، ءتىرى جۇرسەڭ، نە كەتپەيدى،
اراز بوپ، ەكەۋىمىزگە نە جەتپەيدى؟
تاماق توق، وركەنى ءوسسىن يەمىزدىڭ!
تىيۋسىز سوگىپ-سوقپاي، قۇرمەتتەيدى.
راسىن راس دەمەي، تانامىز با،
ءبىر تاۋلىك تاتۋلىق جوق ارامىزدا.
تۇرمايتىن رەنىشكە ءسال نارسەگە
ەكەۋىمىز تالاسامىز، بارامىز دا.
مۇنداي ءىس اراسىندا بولعان ەمەس،
كوز سالساق بۇرىنعى وتكەن بابامىزعا.
اتانىڭ جولىن قۋماي، لاققاندا،
تۋرا جول سونان ارتىق تابامىز با؟».
بۇل سوزگە كوڭىلدەنىپ، مويناق تاستى،
(ول ۇلكەن، ونان گورى تورتكەز جاس-تى)
«تورتكوزىم!»، «موينەكەم!» دەپ ءبىرىن ءبىرى،
دوس بولىپ، سەرت ايتىسىپ، قۇشاقتاستى.
ەكەۋى ءبىرىن ءبىرى ءسۇيدى، قۇشتى،
قىزىعى باسىلماعان دوستىق كۇشتى.
اس ۇيدەن لاقتىرىلعان ءبىر ومىرتقا
سولاردىڭ ناق جانىنا كەلىپ ءتۇستى.
كورگەن سوڭ مايلى سۇيەك، يت تۇرار ما،
قۇشاعىن جازىپ الا جۇگىرىستى.
دوستىقتى، ايتقان سەرتتى بىلاي قويىپ،
ەكەۋى بىر-بىرىنە سالدى ءتىستى.
دوستى دوس مۇنان ارتىق قالاي سىيلار
جۇندەرى بۇرقىراعان اسپانعا ۇشتى.
سۋ قۇيىپ ۇستەرىنە، جيىلعان جۇرت
ەكەۋىن زوردان عانا ايىرىستى.

* * *
يتتەرگە تالاسسا دا جاراسادى،
ايتپەسە يت ودەتىن اداسادى.
دوس بولعان ادامدارعا قاراپ تۇرساق،
بيىكپەن تەڭ دەپ بولماس الاسانى.
سۇيەكتەي اراسىنا نارسە تۇسسە،
يتتەردەن ولار ارتىق تالاسادى.

---