InfoHub Logo

         ەرتە زاماندا ءبىر اۋىلدىڭ اپتا سايىن ءبىر تايىنشاسى زىم-زيا جوعالا بەرىپتى. بۇل اۋىلدىڭ ادامدارى جابىلا ىزدەسە دە ەشبىر ءىز-تۇزىن بىلە الماپتى. ءتىپتى كورگەن-بىلگەن، سەزىك العان بىردە-بىر ادام بولماپتى.

         سول اۋىلدىڭ باسى قازانداي، سالدەسى داعاراداي جاقىپ دەگەن مولداسى بولىپتى. مولدا كۇن سايىن ۇزاق ناماز وقىپ، ونىڭ سوڭىنان كوزىن جۇمىپ الىپ، جارتى قۇلاش قارا الا تاسپيعىن تارتىپ وتىرىپ:

اينالايىن، تاسپيعىم سەنەن،

ەشكىم كۇمان قىلماس مەنەن.

اپتاسىندا ءبىر عانا،

ءلا-يلي-ھا-ال-ال-لا! – دەيدى ەكەن.

         ءوزىنىڭ ءبىلال اتتى ءبىر زەردەلى شاكىرتى مولدانىڭ الگى ءسوزىن ۇعىپ الىپ، ونى ءوز اكەسىنە بۇلجىتپاي ءبىر كۇنى ايتىپ بارىپتى. بالانىڭ اكەسى كۇدىكتەنىپ، ىشىنەن: «تەگىندە، مولدانىڭ مىناسىندا ءبىر گاپ بار ەكەن؟» دەپ، كوپ ويلانىپتى...

         ول جۇرتتان اۋىل كوشىپ كەتكەن سوڭ، اكەسى بەس-التى اداممەن كەلىپ، شەتتەگى مولدا ءۇيىنىڭ جۇرتىن قاراسا، ءدال مولدانىڭ ءوزى جاتاتىن جەر توسەگىنىڭ استىنان تەرەڭ ەتىپ قازىلعان ۇرا تابىلىپتى.

         الگى قامبانىڭ بەتىن اشسا، ودان بىرنەشە تايىنشانىڭ كوگەرگەن تەرىسى مەن ساۋدىراعان سۇيەگى شىعىپتى.        سوندا ءوز كوزدەرىنە وزدەرى سەنەرىن دە، سەنبەسىن دە بىلمەي، بىرىنە-بىرى اڭتارىلىپ قاراپ قالعان اۋىل اقساقالدارى:

         — اس-تاع-پي-رۋل-لا، ەندى نە دەسەك ەكەن؟!

         — باسىندا سالدە، اۋزىندا اللا!..

         — مول-لا-ڭا دا بولايىن، ونىڭ ءتاسپيعىنا دا بولايىن!

         — انە، سەنىڭ زەردەلى بالاڭ! – دەسىپتى.

         سالى سۋعا كەتكەن اقساقالدار اۋىلىنا كەلىپ:

         — بۇرىنعىلار «مولدانىڭ ايتقانىن ىستە، ىستەگەنىن ىستەمە» دەۋشى ەدى، سول راس ەكەن...

         — ەندى، مۇنان بىلاي بىزدەرگە ايتقانىن تىڭداۋعا، ىستەگەنىن كورۋگە جازباسىن. مۇنىڭ ەڭ ابزالى – ەندى «قۇتىرعاننان قۇتىلعان» – عوي!

         — مىناۋ، ۋاعىز ايتىپ ەلدى دە جارىلقاماسىن، مولدا بولىپ ءوزىن كوزگە دە كورسەتپەسىن! – دەسىپ، ۇرلاعان مالدارىن ءوندىرىپ الماق تۇگىلى، موللاسىنا «مال ۇرلاپسىڭ» دەپ ايتۋعا دا ۇيالىپتى.

---