InfoHub Logo

Elimizde 219 kolej 624 mamandyq boıynsha 780 biliktilik lısenzıasynan aıyryldy.

Bilim berý salasyndaǵy sapany qamtamasyz etý komıtetiniń habarlaýynsha, memlekettik atestattaýǵa daıyndyq kezeńinde 219 kolej 624 mamandyq boıynsha 780 biliktilik lısenzıalaryn qaıtardy. Sondaı-aq Shyǵys Qazaqstan oblysynda jeke kolej jabyldy.

Aıta keteıik, jyl basynan beri elimizdegi 519 kolejde memlekettik atestattaý ótti. Taldaý nátıjesi boıynsha Almaty, Astana qalasy, Qostanaı, Mańǵystaý, Atyraý, Shyǵys Qazaqstan jáne Ulytaý, Abaı oblystarynyń tehnıkalyq jáne kásiptik bilim berý uıymdarynda jaqsy kórsetkishter baıqalady.

Degenmen, el boıynsha úsh júzden astam kolej atestattaýdan ótpedi. Olardyń deni Shymkent qalasy men Pavlodar, Qyzylorda oblystarynda. Batys Qazaqstan, Jambyl, Túrkistan, Aqmola jáne Aqtóbe oblystarynda kórsetkish tómen.

«Baqylaý sharalary bastalmas buryn aqparattyq-túsindirý jumystary júrgizilgen bolatyn. Memlekettik atestattaý tehnıkalyq jáne kásiptik bilim berý salasyndaǵy birqatar problemalardy anyqtap berdi. Qazir Astana qalasy, Almaty, Jetisý, Jambyl jáne Túrkistan oblystaryndaǵy toǵyz jeke kolejdiń qoldanystaǵy lısenzıasy men bilim berý qyzmetin júzege asyrýǵa arnalǵan lısenzıaǵa qosymshalardy qaıtarý jumysy júrgizilýde. Bul kolejder endi bilim berýdi toqtatady. Sondaı-aq lısenzıaǵa qosymshasy bolmasa da bilim bergen 10 kolej anyqtaldy», - deıdi komıtet tóraǵasy Ernur Daýenov.

Taldaý qorytyndysy boıynsha jumys josparlary, oqý josparynyń pánderi men modýlderi boıynsha oqý baǵdarlamalary, óndiristik oqytý men kásiptik tájirıbeden ótý, memlekettik jalpyǵa mindetti standarttyń talaptaryna sáıkes kelmeıtin bazalyq, kásiptik modýlderdi oqytý boıynsha buzýshylyqtar anyqtaldy.

Ýákiletti organdarǵa TjKB uıymdaryna oqý jumys baǵdarlamalary men josparlaryn ázirleýde ádistemelik kómek kórsetýge qatysty usynymdar berildi.

---