2019 jyly 4 myń sheteldik qandasymyz Qazaqstanda bilim alady
2019 jyly 4 myń sheteldik qandasymyzdyń mektep jasyndaǵy balalary Qazaqstanda bilim alady. Bul týraly Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov málim etti.
«Bizde Nazarbaev Ýnıversıtetimen qatar, onyń mektepteri bar. Qazaqstan boıynsha 20 Nazarbaev zıatkerlik mektepteri (NZM) jumys isteıdi. Olardyń bilim berý júıesi úzdik, ıaǵnı halyqaralyq standartqa saı ekeni de belgili. Qazirgi tańda NZM-men kelisimge kelip jatyrmyz, onyń negizinde kelesi jyly 4 myń qandasymyz, ıaǵnı oqýshylar Qazaqstanǵa kelip NZM-de oqıdy. Osy joba aıasynda barlyq elderdegi baýyrlarymyzdy qamtıtyn bolamyz, ondaǵy maqsat - bilim berýden bólek, olardy ózimizdiń qazaq balalarymen tanystyryp, jaqyn aralastyrý. Osyǵan uqsas bizde jyl saıyn 150 shetel qazaqtarynyń balalary Aqmola oblysyndaǵy «Baldáýren» jazǵy lagerinde demalady», - dedi Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov.
Sonymen qatar, Z.Turysbekov bilim berý jobasy aıasynda qandastarymyzǵa elimizdiń kórikti jáne tarıhı jerlerin kórsetip, otanǵa degen súıispenshilikterin arttyrý baǵytyndaǵy sharalardyń uıymdastyrylatynyn da aıtyp ótti.
Aıta ketsek, búgin Astanada 10 elden kelgen otandastarymyzdyń qatysýymen jıyn ótip, onyń barysynda «Alystaǵy aǵaıyn» tarıhı derekti fılminiń tusaýy kesildi.
You Might Also Like
