InfoHub Logo

Abylaı han zamanynda orys jurtynan otyz kisi elshilikke kelip, qys túsip ketken soń qazaq ishinde qystap qalyp, Malaı-Jádiger Qoılybaı baı bir qys júz aq qara bas qoı soıyp kútip, qystan ashyqtyrmaı, taryqtyrmaı shyǵarǵan eken, ulyǵy:

— Qazaq jurtynyń bir-birine syıynyń aldy ne bolady? — degende:

— Qazaq rásiminde «jetim» bolady, — degen soń, Qoılybaıǵa bir qyz syı qylǵan eken jáne ıt terisine jazyp, altyndaǵan ýaǵdanama bergen eken.

Sol qyzdan eki bala týyp, Maltabar, Qosjeter degen osy kúnde ósip-ónip, óz aldyna aýyl bolypty. Terisaqqan boıynda, Tasbeketten tómenirek Tákı qajynyń aýyldary.

Sol Qoılybaıdan — Tileýqabyl. Tileýqabyldan: Ádil, Edil, Elemes, Jamanqara, Sheshenqara. Bulardyń qyzdary «qýyrshaq uzatqanyna» tý bıe soıyp, toı qylǵan eken. Boz bıeni biryńǵaı saýdyryp:

— Etimiz aq bolsyn, — dep sútine shomylǵan eken. Sondaı kesirden sol dáýlettiń aıaǵy myj-tyj bolyp, sol qyzdar kempir bolǵan kúninde keris tireı surap júrgende, jaqsylyqtaǵy yrys-dáýletke kesir jumys qylǵanyn estip, bilgender:

— Saǵan ne qylsa, obal joq! — dep, taıaqpen túrtip ketetuǵyn bolypty.

Bulanbaıdyń báıbishe qatynynyń balalary Baızaq, Januzaqqa uzatylyp edi deıdi.

Ákem aty — Shaǵyraı, atym — Baldaı,
Bulanbaıdyń jylqysy qara jar[daı],
Shıqutyny boıymda dambalym bar,
Áliń kelse, tistep shesh, Qaraqaltaı! —

deıtuǵyn Bulanbaı Qalqamannan shyqqan, dúnıeniń aqyry — osylaı.

---