InfoHub Logo

Kún nuryna bólengen aq basty Alataýdyń bókterinde, túrikmen dostar, sizderdi qýana qarsy alamyz.

Ańsatyp, uzaq kúttirgen osy kezdesýdiń qýanyshy qoınymyzǵa syımaıdy. Qaıyrly saǵatta qaýyshtyq, kóksegen kúnge jettik. Túrikmen, qazaq ejelden dos, tósekte basy, tóskeıde maly qosylǵan aǵaıyn.

Sizdiń halyqtyń ásem ánderi bizdiń ulan-baıtaq saharamyzda shyrqaldy. Túrikmen klasıkteri men qazirgi zaman jazýshylarynyń súıikti shyǵarmalaryn bizdiń qazaqtar búkil álemge ataqtary áıgili — Abaı, Jambyl, Muhtar shyǵarmalarymen birdeı qasterlep oqıdy.

Jazdyń jaıma-shýaq kúninde, maı aıynyń naǵyz bir túrikmen kilemindeı qulpyrǵan ádemi shaǵynda kezdesýimiz ómiri esimizde qalady, bizdiń berik saltqa aınalǵan dostyǵymyzdyń budan bylaı da keńeıe, nyǵaıa berýine sebin tıgizedi.

Biz endi sizdermen emin-erkin suhbattasamyz, ózimizdiń súıikti isimiz — sovet ádebıetin órkendetý jóninde keń pikirlesemiz. Respýblıkamyzdyń qaı jerine, qaı túkpirine baram deseńizder de sizderge jol ashyq, tórimiz daıyn, ár úıdiń syıly qonaǵy bolasyzdar. Týysqan túrikmen halqynyń ádebıetin, kórkemónerin janyndaı súıetin, qadirleıtin halqymyz sizderge qushaǵyn jaıyp, saǵyna kútip otyr.

Sizder qadam basqan jerlerge gúl, dostyq pen mahabbat baǵy sheshek atsyn!

Káne, dostar, baýyrlar, meımandos qazaq jerine erkin qadam basyńyzdar, tórimizden oryn alyńyzdar! Bizdiń astanamyz Almatynyń ystyq qushaǵyna kirińizder! Syı - qurmetimizge bólenińizder!

Elimizdegi komýnızm qurylysyna eresen zor úles qosyp, sovet halyqtarynyń semásynda terezesi teń ómir súrip otyrǵan týysqan túrikmen halqynyń bir top jazýshylary bizge qonaqqa keldi.

Qosh keldińizder, qymbatty baýyrlar! — deımiz biz olarǵa.

Týysqan túrikmen halqynyń sharýashylyq jáne mádenıet qurylysynda orasan zor tabystaryna biz qýanamyz. Ásirese túrikmen jazýshylarynyń — bizdiń dostarymyzdyń tvorchestvolyq jetistikteri bizge etene jaqyn.

Daryndy túrikmen halqy óz ishinen bir top daryndy halyq shaıyrlaryn, aqyndar men jazýshylardy ósirdi. Túrikmen sovet ádebıeti barsha sovet halyqtarynyń qadir -qurmetine ıe boldy.

On segizinshi ǵasyrda ómir súrgen, ózinen keıingi urpaqtardan shyqqan talaı aqyndarǵa ıgi áserin tıgizgen túrikmenniń fılosof-aqyny Mahtým-Kýlıdiń ulanǵaıyr ádebı murasyn biz jaqsy bilemiz, baǵalaımyz. Túrikmenniń endigi bir úlken aqyny — Kemıne óziniń dosy Molla Nepespen áńgimelesip otyrǵanda túrikmen poezıasynyń atasy — Mahtým-Kýlı týrasynda bylaı degen eken: «Halyq bútin bir óńirge altyn jyr egip ósirdi, Mahtým-Kýlı kelip sóz egininiń astyǵyn jınady. Sonda sen ekeýmizge ne qaldy? Egini orylǵan ańyzdy aralap, kezdeısoq qalyp qoıǵan masaqtardy teremiz-daǵy».

Mahtým-Kýlı Qazaqstan eńbekshileri arasynda naǵyz ataqty aqyn. Onyń shyǵarmalary qazaq tilinde eki dúrkin basylyp shyqty. Biz túrikmenniń Zelılı, Seıdı syndy aqyndarynyń shyǵarmalaryn, áleýmettik syqaqtyń asqan sheberi, túrikmen ádebıetiniń aıtýly klassıgi Kemıneniń shyǵarmalaryn súıip oqımyz.

Qazaqstan jazýshylary ózderiniń tamasha qalamdastary — Berdi Kerbabaev, Bekı Seıtaqov, Qara Seıitlıev,

Gýseın Muhtarov, Aman Kekılov jáne basqa kórkemsóz sheberlerin qadir tutady, olardyń kóp ultty sovet ádebıetiniń qazynasyna qosqan romandaryn, povesterin, poemalary men pesalaryn súıip oqıdy.

Berdi Kerbabaevtyń «Sheshýshi qadam» romany men «Aq altyn eliniń, Aısultany» povesi, Saryhanovtyń áńgimeleri, talantty túrikmen aqyndarynyń óleńderi men poemalary áldeqashan qazaq halqynyń rýhanı ıgiligine aınalǵandy. Gýseın Muhtarovtyń «Allanyń, semásy» pesasy qazaq teatrlarynyń repertýarynan túbegeıli oryn aldy. Osy kúngi túrikmen aqyndarynyń óleńderi men poemalarynyń jınaǵy jáne túrikmen áńgimeleriniń bir tomdyǵy taıaýda baspadan shyǵady.

Partıa bizdi jańa belesterge, bıik shyńdarǵa shaqyrady. On da bizdi sony jańalyqtar, zor tabystar kútedi. Búkil sovet jazýshylarynyń eń basty, ortaq mindeti — halyqqa, partıaǵa adal qyzmet etý.

Túrikmen ádebıetiniń bizdiń respýblıkada ótetin aptalyǵy kezinde ádebıetterimizdiń damýyndaǵy ózekti máseleler týrasynda, ózara tájirıbe alysý jaıynda keń túrde pikir alysamyz ǵoı dep oılaımyn. Respýblıkalarda ótkizilip júrgen, budan bylaı da ótkizile beretin ádebı onkúndikter men aptalyqtardyń maqsat-múddesi respýblıkalyq jazýshylar uıymdarynyń arasyndaǵy dostyq qarym-qatynasty barynsha molaıtý, shyǵarmalardy talqylaý arqyly ózara tanysý-bilisý, ádebıetiniń barlyq jaqsy jetistikterin keńinen nasıhattaý. Ózara qarym-qatynasty damytý, nyǵaıtý, únemi qoıan-qoltyq aralasý — bizdiń sosıalısik realızm ádebıetiniń ıdeıalyq - tvorchestvolyq turǵyda jedel damýynyń mańyzdy bir sharty.

Ideıalyq birlik, tvorchestvolyq baǵdar - baǵyt yntymaǵy búkil týysqan ádebıetterimizdiń, ásirese túrikmen men qazaq ádebıetiniń kúnbe-kúngi dostyǵynyń, úzilmes baılanysynyń negizi bolyp tabylady.

Túrikmen ádebıetiniń Qazaqstandaǵy aptalyǵy halyqtar dostyǵynyń naǵyz merekesine aınalatynyna, bizdiń respýblıka mádenı ómirindegi úlken oqıǵa bolatynyna kámil senemiz. Bul aptalyq túrikmen jáne qazaq halyqtary ádebıetteriniń komýnıstik týysqandyǵyn onan saıyn bekitedi, nyǵaıtady.

Áziz dostarymyzdy, qadirli baýyrlarymyzdy yntyq júrekten quttyqtaımyz!

SSSR halyqtarynyń buljymas dostyǵy jasaı bersin!

Bizdiń ádebıetimizdiń qamqorshy dosy, komýnızmniń barlyq jeńisteriniń dem berýshisi, uıymdastyrýshysy Sovet Odaǵy Komýnıstik partıasy jasasyn!

1963

---