InfoHub Logo

Ásemniń ókpesi qara qazandaı. Aýylda turatyn ájesine kókesi «áne aparam, mine aparam» degeli talaı boldy. Nege aıtqanyn oryndamaıdy? Ýáde bermegende, búıtip mazasyzdanbas edi. Álginde dalaǵa shaqyrǵan qurbylary Dıana men Dınaǵa da ergen joq. Jaıshylyqta oınaýdan áste jalyqpaıtyn qyzynyń bul tosyn qylyǵyna sheshesi de ań-tań.

Ol tórgi bólmedegi terezeden kóshege kóz jiberdi. Úshinshi qabattaǵy bulardyń páterinen aýla ishi tegis kórinedi. Aýlada qazir qaınaǵan tirshilik. Balalar átkenshekke otyryp, júgirip, sekirip, birin-biri qýyp máz. Belesebet úırenip júr-aý shamasy, anaý bir qyz qalt-qult etip teýip bardy da, qulap kaldy.

Ásemge bul kórinis te áser etpedi. Ájesin qatty saǵynǵany sonshalyq, qazir aýylǵa júrip ketkisi bar. Biraq qalaı? Tátti qıalyn aıaq tyqyry bólip jiberdi. Sheshesi eken.

— Qyzym-aý, bir jeriń aýyryp turǵan joq pa? Dalaǵa shyqpadyń ba?

— Shyqqym kelmeıdi.

— İshiń pyspaı ma?

— Joq...

— Qabaǵyń kelispeı tur.

— Jaı...

— Men dúkenge baryp kele qoıaıyn. Alda-jalda dalaǵa shyqqyń kelse, bilesiń ǵoı esikti qalaı jabýdy?.. Kóp aınalmaspyn.

Ásem úıde qaldy. Kókesi jumysta. Qas qaraıyp, qarańǵylyq túskende bir-aq keledi. Al ózinen úlken aǵasy Erkin lagerde demalýda. Sheshesinń «dúkenge baryp kele qoıaıyn» degeni jaı sóz.

Biledi ǵoı mamasyn. Kórshi Maıra táteniń sózimen aıtqanda, sheshesi «qydyrympaz». Endeshe eki-úsh saǵatsyz orala qoımas úıge.

Ásem esikti jaýyp, tysqa shyqty. Eshqaıda moıyn burmastan tup-týra úı irgesindegi aıaldamaǵa keldi. Mandaıshasynda «5» degen jazýy bar troleıbýs te kele qalǵany. Otyryp avtovokzalǵa jetti.

Avtovokzal. Ary-beri qaıshylasqan jurt. Sabylǵan jolaýshylar. Sómke kóterip, qolarba súıregen adamdar. Arasynda biren-saran balalar da bar. Ásem es bilgeli áke-sheshesine erip talaı ret aýylǵa sapar shekken.

Sonda Qaraǵashqa júretin avtobýstyń anaý shetki platformadan attanatynyn kórgen. Dittegen jerdi jańylmaı tapty. Úlken qyzyl «Ikarýs» avtobýs júrgeli tur. Jolaýshylar túgelimen otyryp bolǵan syńaıly.

Qolynda qaǵaz-qalamy bar aldyńǵy esikten túsken bir táte:     

— Qaıda barasyń, balaqaı? — dedi jyly ushyrap.

— Aýylǵa, ájeme...

— Ájeń qaıda turady?

— Alysta.

— Alysta bolǵanda, aýyldyń aty bar ma?

— Qaraǵash.

— Á! Júre ǵoı, qyzym... Ol jaqqa bir saǵattan keıin avtobýs qatynaıdy.

Beıtanys táte Ásemdi avtovokzaldaǵy bólmesine alyp keldi. Aty-jónin, neshe jasta ekendigin surady. Ásem qaıda, qaı qabatta, tipti qaı podezde turatynyn da taqyldap aıtyp berdi. Sodan soń beıtanys táte bir jerge telefon shalyp sóılesti. Kóp uzamaı bólmege eki mılısıoner kirdi. Ásem tiksinip qaldy. Sebebi, týra osy formadaǵy qyzyl jaǵaly kisiler, ylǵı araq iship, mas bolyp júretin, kórshi podezdegi bir aǵaıdyń qolyn artyna qaıyryp, mashınaǵa otyrǵyzyp áketkenin kórgen bolatyn.

— Kishkentaı jolaýshy qaıda? — dedi mılısıonerdiń bireýi.

Ásemniń qulaǵy eleń etti.

— E, mynda otyr eken ǵoı...

— Men sizderdi tanymaımyn, — dedi Ásem qorqyńqyrap. — Ájeme bara jatyrmyn.

— Ásem, aqyldy balasyń ǵoı. Bara ǵoı aǵalaryńmen. Seni ájeńe jetkizip salady, — dedi beıtanys táte. Senbeıin dese, ótinip tur. «Aldaı qoımas».

Bul kezde aýyldan kelgen Ásemniń ájesi nemeresin úı-ishine túgelimen izdettirip, jan bitkendi qýyryp jatqan. Eki mılısıonerge erip kelgen Ásem ańyryp tur. Úreı men saǵynysh qabattasqan balanyń kózinen móldir monshaqtar úzilip-úzilip tústi.

---