InfoHub Logo

Kúreń kúz. Kún jelkem. Ymyrt qoıýlanyp, qarańǵylyq túsken. Sekpil bet sary ul selk etti. Alda qarańdap áldekim kórindi. Bul kósheniń balalary basqa jaqtyń uldaryn jolyqtyrsa, álimjettik jasap, sebepsiz uryp ketedi degendi estıtin. Sol kerek ózine! Jaryq kóshemen júrmeı, tóteletip nesi bar?

«Al qamdal, batyrym!..»

Qarańdaǵan sulba tura qaldy.

— Balaqaı, tún ishinde qaıda barasyń? — dedi jyly ushyrap.

— Tentek bala ma dep zárem ushqany-aı!..

— Esimiń kim?

— Janáli.

— Qaı synypta oqısyń?

— Úshinshide...

— Jalǵyz nege júrsiń?

— Sómkemdi izdep...

— Qaıdaǵy sómke?

— Kádimgi... kúnde mektepke tasıtyn...

— Kitap-dápterlerińdi salyp júrgen be?

— Ony qaıdan bilesiz?

—  Óziń aıtyp tur emessiń be?!. Sonymen...

— Sol... sómkem joǵalyp... Álginde, sabaq qaraıyn desem joq... Úı ishin olaı aqtardym, bylaı aqtardym. Ákem qatal adam... Jerden shuqysań da tap, qur qol oralsań, taıaq jeısiń degen soń izdep shyqtym...

— Endi qaıda barasyń?

— Baǵana mektep janyndaǵy stadıonda fýtbol oınaǵanbyz. Sol jerde umytyp ketken shyǵarmyn.

— Boljamyń durys... İm-m... Qorqyp kelesiń be?

— Ia, aǵaı.

— Júr, ertip baraıyn.

— Rahmet! — dedi bala.

Beıtanys aǵa men Janáli mektep jaqqa bet aldy.

Baǵana basyndaǵy elektr shamdary stadıon alańyn jap-jaryq etip tur. Ekeýi ári qarady, beri qarady. Kózderine eshteńe túspedi. Birazdan soń beıtanys aǵa:

— Aınalaıyn, sen taǵy izde. Men osy jerde tosam, — dedi.

Janáli stadıondy qaıyra qarap shyqty. Aıtaqyr alańnyń shetindegi shóptiń arasyn da qaldyrmady. Sómke túgil, nyspy joq.

— Aǵa, — dedi ol. Ózi de sharshaǵan sıaqty. — Aıyp etpeńiz... Jolyńyzdan kaldyrdym... Sómkem tabylar emes...

— Endi qandaı amal bar?

— Bilmeımin...

— Úıińe qaıt, qoryqpaısyń ba?

— Qoryqpaımyn...

— Qoryqsań, jetkizip salaıyn.

— Ózim baram. Rahmet, aǵa!

Bylaı shyǵa boıyn úreı bıledi.

Shynymen, sómkesi joq pa? Kimge kerek boldy eken? Sómkeni qoıshy, satyp áperedi ǵoı. Bárinen buryn kúndeligi men dápterleri, mektep kitaphanasynan alǵan oqýlyq kitaptary da joǵaldy-aý!

Zytyp kele jatqan ul qarań-qurań etken zatty kórip, tura qaldy. O, toba! Álgi biraz júrip toqtaıdy, azdan soń taǵy jyljıdy. Kózi baqyraıyp, júregi dúrsildep ketti. «Ne bolsa da, jaqyndap kóreıin...» Qarasa, kók kúshigi óziniń.

Jazǵyturym japsarlas aýyldaǵy Ermek qurdasynan alty aılyq kúshikti surap ákelgen kókesi:

— Jer úıde turǵan soń, ıt es bolady! Keıin baılap qoıarmyz. Ázirshe bos júre bersin, — dedi.

Janáli kúshikpen dostasyp ketti. Kók kúshik qaıdan kelse de, júgirip balanyń aldynan shyǵady. Bala kúshikti moınynan qushaqtaıdy. Sóıtip ekeýi biraz turady. Kele sala ıtaıaǵyna as quıady. Sodan asyr-salyp uzaq oınaıdy, ekeýi. Qolyndaǵy dobyn, basyndaǵy qalpaǵyn, bolmasa aǵash-taıaqty ádeıi laqtyryp, alyp kel dep jumsaıdy. Kók kúshik balanyń jumsaýyna ábden úırendi. Elgezek. Taǵy tapsyrmań bar ma degendeı kózderi jáýdirep qaraıtyny bar. Bárin túsinedi, bárin biledi.

— Kúshigiń úlkeıdi, kóp erkeletpe, — degen kókesiniń sózin moıyndaǵysy kelmeıdi bala. Oǵan kók ıt áli kishkentaı sıaqty.

Myna qyzyqty qarańyz. Kók ıt súırelep júrgen balanyń sómkesi! Mundaı qýanbas. Esine tústi. Baǵana dop oınap júrgende ıtin kórgen. Oıynnan soń dostarymen sóılesip, sómkesin alýdy, Alypsoqty ertýdi umytyp úıge ketip otyrǵan. Kók ıt sómkeni kórip qalǵan ǵoı. Qarańǵy túskenshe balany tosyp, úıge qaıtqan beti osy boldy.

— Aqyldym meniń! Kómekshim meniń!

Janáli ıtin qushaqtady. Al ıti quıryǵyn bulǵańdatyp, erkeleı bastady.

---