InfoHub Logo

Ustanym - túsine bilgenge, adamnyń bet - beınesi men ómirlik muraty emes pe!? Adamdardy ustanymyna qarap, onyń qanshalyqty bilikti ári parasatty ekenin paıymdaýǵa bolady. Keı kezderi kerisinshe, sonshalyqty qarabaıyr ekeni de baıqalynyp qalady. Men óz ustanymym týralyy oı órbitsem: «Eshkimniń ala jibin attamaý», «Syrǵa berik, dosqa adal jaqsylyqqa jaqyn bolyp, adamdarǵa bolysý» murattaryn kózdedim. Adam bolyp dúnıe esigin ashqan soń, adam bop qalý boryshymyz emes pe?! Qalaı oılaısyz, kelisesiz be?! M. Hakimjanova jyrlaǵandaı: «San ǵasyrdyń aıǵaǵy ózgermeıtin, Sen adamnyń dosysyń máńgi ólmeıtin...» Bir kúrsindiretini, búgingi dúbirli dúrbeleń álemde kisilik azaıyp bara jatqandaı kórinedi. Mektepte, kóshede, tipti qoǵamdyq oryndarda daraqylanyp kúlgen, dańǵazashyl qurbylarymdy kórgende, ózim jerge kire jazdaımyn. Meıli, kúlkili jaıt bolǵan da shyǵar, sonshama dabyra etýdiń ne qajettiligi bar deseńizshi!.. Ol ol ma? Úlkendi syılamaq túgili, qaǵyp qulata jazdaıtyndar kóbeıgenin eshkim joqqa shyǵara qoımas!.. Halqymyzdyń «Ata turyp, ul sóılegennen bez,.» degen óreli sózi eskerýden qalyp bara ma ózi, qalaı ?.. Al meniń altyn qazyq baǵyt-baǵdarym: «Bolsa- daǵy qıyndyq alda nebir, «adam bolý» muratym qala berer!» Ár zaman óz oıshyldaryn týdyrady. Bar ǵulamanyń aıtar asqaq armany, izgi muraty - bilim jaýharlaryn terip, adamzatty ıgi isterge jumyldyrý.  Iasaýı hıkmetteri, Qashqarı ata sózdigi, Rabǵýzı qıssalarynan adamı murattardy kóksegen babalardyń arman- murattaryn tanyp bilgendeı boldym. Adamzat ataýly bar jerde «kisilik», «parasattylyq» óz mánin joǵaltpasy anyq! Óıtpese, ómirdiń ne máni qalar edi? Túıeniń qomyna, jylqynyń jalyna jarmasyp tynysh ómir keshpegen tekti halqym ejelden dúnıe jımaǵan,  baılyqty murat etpegen, qarapaıym da ańǵal, dalasy qandaı keń bolsa, peıili de sondaı aǵyl-tegil, aqkóńil de ardakóńil,óz adamı ustanymdaryna berik, dosqa kámil serik bolǵan. Nebir asyl da, asqaq ustanymdardyń ózi adamdyq sheńberinen shyqpaýdy maqsat etý arqyly ózimizden de ózgeden de kórgen kóz súısiner aıbyndy eldiń ulandary ekendigimizdi barsha álemge pash etetin attyly kún týdy. Sar dalanyń saıyn tósinde dúbirletip at tuıaǵymen ózindik órnek salǵan babalardyń basyp ótken iziniń taby bar, júzden astam ultqa qut meken jeruıyǵym men babalar salǵan sara jolymdy men maqtan tutpaǵanda, kim maqtan etsin!? Sensiz men bir kún, bir kún deımin- aý, bir saǵat ta, bir mınýtta tura almaspyn. Óıtkeni, bul jerde meniń, babalarymnyń, «kindik qany tamǵan» - óz elim men óz bolmys - bitimim jáne ózindik ustanymym bar. Barym da, narym da – sensiń ar – ojdanym! Bizdiń taǵdyrymyz- tamyrlas. Táýelsizdiktiń bal dámin tatý baqyty buıyrǵan bizder dúnıeniń qaı túkpirinde júrsek te, meıli shetelde, qaı ortada júrsek te , meıli óz elimizde árkez táýelsizdigimizge táý etip, armanda ketken babalar rýhyna bas ıip, ardan attamaı, qazaq eliniń abyroıyn arttyrar keleli qadamdar jasap, eldigimizdi, erligimizdi eńbek maıdanynda kórsete bilýimiz kerek. Qabyldanǵan durys sheshimderim - meniń ómirlik ustanymym, osal bolýǵa da esh qaqymyz joq!.. Mynaý turlaýy joq pánıden adam bop  qalý ǵanıbet!.. Oıymdy Ǵabıden Mustafınniń sózimen aıshyqtasam: «Teńizdeı tereń halyq ishinde almastaı oılar jatyr» nemese «Osal deme kómirdi, burqyldatar temirdi» pikirleri meniń búgingi jumysyma negiz bop turǵandaı. Ósip kelem, ósip kelem erjetip, Ýaqyt shirkin zymyraıdy tez ótip. Ustazdarym qadap bergen kókeıge, adamdyqtyń ar-qazyǵyn tý etip,- men bar jerde, meniń júregim lúpildep turǵan sátte meniń ustanymym ózgerýi esh múmkin emes, - dep oıymdy túıindeımin.

 

---