InfoHub Logo

Ekinshi synypty kileń bestikke bitirgen Aýdanbektiń bilmeıtini kóp eken. Dóńgelengen dúnıe. Aspan álemi. Jarqyraǵan juldyzdar. Jan-janýarlar. Almasyp kelip jatkan kún men tún...

— Barlyǵyn jaratqan — jalǵyz Alla, — deıdi atasy.

— Qalaısha? — deıdi Aýdanbek tań-tamasha qalyp.

— Oǵan adam balasynyń aqyly jetpeıdi! Alaıda ǵylym men tehnıka ǵaryshtap damyǵan saıyn Allahtyń barlyǵyn, aqıqat ekendigin bile túsemiz.

— Aıtyp berińizshi, qazir-aq.

— Áli erjetesiń, úlken azamat bolasyń. Sonda bárin túsinesiń, — deıdi atasy.

— Ol úshin ne isteýim kerek?  

— Jalyqpaı kóp-kóp oqyp, jaqsy bilim alýyń kerek.

— Maqul ata, — deıdi Aýdanbek. — Aıtyńyzshy, ata, máselen, sizdiń arnaıy oqyǵan mamandyǵyńyz bolmasa da, qoldary men aıaqtary synǵan, shyqqan syrqat adamdardy emdeısiz. Bul da Allanyń bergen qasıeti me?

— Dál solaı, botaqanym. Men biraq sebepshi ǵanamyn. Aýrý-syrqaýdy jazatyn, shıpasyn jiberetin bir Allah!

— Ony qalaısha bilýge bolady?

— Aqylmen, oımen...

— Buǵan deıin sizdiń synyqshylyq qasıetińizdi durys baıqamaǵan ekenmin. Endi zerdelep, kóńil qoıaıynshy...

Arada eki-úsh kún ótken. Tańerteńgi shaıyn ishkennen atasynyń mazasy kete bastady. Qolyn ýqalap otyr.

— Qolymnyń qaqsap otyrǵanyn qarashy.

Aqsary uldyń atasyna jany ashydy.

— Aýyra ma sonda?

— Alystan mertikken bireý izdep kele jatyr-aý deımin... Sezip otyrmyn...

Arada kóp ýaqyt ótken joq. Qyzyl qaqpaly úıdiń aldyna «Mersedes» mashınasy toqtady. Kabınadan jastaý jigit shyǵyp, artqy esikten elýler shamasyndaǵy áıeldi qoltyǵynan demep úıge bettedi.

Sonaý Óskemen qalasynyń arǵy jaǵyndaǵy Lenınogordan kelipti. Áıel adamnyń oń qoly kótertpeıdi. Dákemen orap, moınyna tańyp alypty. Úlken-úlken qalalardaǵy dárigerlerdiń bárine kórsetse de, em-domdary qonbapty. Rentgenge de túsirgen. Synyq, eshteńe joq. Syrqat syryn asha almaǵan.

Aýdanbektiń atasy áıeldiń bilegin jalańashtady da:

— Sińiri janshylǵan eken, — dedi. — Álbette, ol rentgenge kórinbeıdi. Jaraıdy, oqasy joq. Allah sátin salsa, saýyǵasyz.

Qabdyrahman qarıa janshylǵan sińirdi aqyryn-aqyryn ýqalap otyrdy da, bir zamatta:

— Qolyńyzdy kóterińizshi, — dedi. Áıel kisi qolyn birden kóterdi. — Siz óıtip jyldam kótermeńiz. Jaılap, aqyryndap qana kóterińiz. Qoryqpańyz!

Áıel synyqshynyń aıtqanyn jasady.

— Boldy ma? — dedi áıel senerin de, senbesin de bilmeı.

— Boldy, — dedi Aýdanbektiń atasy. — Jazylasyz... Endi, kádimgi túıeniń shýdasyna qara tuz qosyp, qolyńyzdy tańyp tastańyz. Eshqandaı dári-dármek jaǵyp, áýre bolmańyz... Men bar bolǵany janshylǵan sińirińizdi qalpyna keltirdim.

Syrqat áıel synyqshy qarıaǵa jaýdyrta alǵys aıtty.

---