InfoHub Logo

Talaı túlektiń armanyna aınalǵan QazUÝ-da oqý múmkindigi buıyrdy. Allaǵa shúkir. Shynynda da, arman bolarlyqtaı atyna zaty saı ásem qalashyq meniń júregimdi birden jaýlap aldy. Óz bilimi men darynyna senetin kóńildi de izdenimpaz jastardyń ordasy ekeni kózge kórinip-aq tur, men ózimniń osy kúnnen bastap jańa ómirge aralasa bastaǵanymdy sezindim. Osylaısha meniń stýdenttik ómirim bastalyp ta ketti...

Stýdenttik shaq degen áldebir romannan nemese áldebir aýyzeki áńgimelerden estip júrgen qyzyqty da baıypty shaqqa enip, taǵy bir qadamymyzdy jasadyq. Almatydaı úlken qalaǵa kelip jalǵyzsyraý, bótensiný degen jaǵymsyz áser atymen joq. Siz bilseńiz, ondaı oı oqý ordasyna, kıeli shańyraqqa qadam basqan sátten bastap-aq joq bolady. Sebebi jańa tanys bolǵan úzeńgiles dostardyń, bilim dep azýyn aıǵa bilegen jalyndy jastardyń ortasynda tek qana jańa dem paıda bolǵandaı edi. QazUÝ bolashaqqa nyq qadam bastyrar sanaly ǵumyrdyń bir aıǵaǵy ispetti. Sezim men kóńildiń jetegimen ketýge de bolmas, aıtaıyn degenim, elimizdiń basty oqý orny meniń bilim alýǵa degen potensıalymdy órletkendeı boldy. Onyń sebebi de az emes. Sanap kóreıik...

Qara shańyraqtyń qolastyna jıylǵan jıyrma myńǵa jýyq izdenýshiniń talabyn taýǵa qaraı domalatar jaǵdaıdyń barlyǵy da jasalǵan. Árıne muny ǵajaıyp álem dese de bolar, eń bastysy talaı bala kyrannyń qanatyn ushtap, qıaǵa samǵatqan stýdentter saraıy, tarıhy terinde jatqan QazUÝ-dy bir sátke kóz aldyna elestetetin jeke murajaı, zaman talabyna saı jabdyqtalǵan úsh júz adamdyq ınternet ortalyǵy taǵysyn taǵylar, aıta berseń tolyp jatyr.

QazUÝ-ǵa kelgen ár stýdentti daryndy ári bilimdi dep aıta almaısyz. Jańa oqý jylyn jańa tanystarmen bastaǵanymmen, keıin kele kimniń kim ekeni aıqyndala bastady, tipti oqý úrdisine ilese almaı, shettep qalyp aýlyna qaıtyp jatqandar da boldy. Meni tolǵandyrǵan taǵy bir jáıt: ózimiz qazaq bóliminde oqyp júrsek te, kóptegen sabaq materıaldaryn tek orys tildi kitaptardan ǵana tabamyz, qazaqsha kitap qory jetispeıdi, bar bolsa da, ulttyq kitaphanada izdeýget týra keledi. Meniń basty úmitim mynaý salynyp jatqan mılıondaǵan kitap qory bar elektrondy kitaphana kóńilimizdi toq eter degen oıdamyn.

Qalaı desem de, QazUÝ-men maqtanamyn, tipti halyqqa tanymal bolyp júrgen azamattardy bizdiń túlegimz dep estigende, kóńilim kóterilip, bir marqaıyp qalatynym bar. Men sol tulǵalardyń otyrǵan aýdıtorıasynda otyryp, sol kisilerge sabaq bergen ustazdardan tálim alyp júrgenim maǵan jiger beredi. Álemdik dárejedegi bilim men sport saıystarynda top jaryp júrgen QazUÝ stýdentteri sol aǵa býynnyń jalǵasy shyǵar, men de sol úrdiske ilese alsam, jetilgenim jáne samǵap usha alatyndaı bolǵanym dep senemin.

---