InfoHub Logo

Qalyń toǵaıdy qaq jara aǵyp jatqan Qaratal ózeniniń tabıǵaty ásem-aq. Ózendi jaǵalaı ósken mıýaly aǵash, oqaly tondy kómkergen qundyzdaı qulpyrady. Jynys toǵaıdyń ár jerinen qoı tasty beldeýler kórinedi. Aq kóbik ata aǵyp jatqan ózen kún nuryna shaǵylysyp, aınadaı jarqyraıdy.

Osy óńirge «Qara túlki» aýyly ornalasqan. Aq shaǵaladaı tizilgen úıler. Boı túzep, kósheni kóriktendirgen terekter men aq qaıyńdar. Bul jerde terisi baǵaly qara túlki ósiriledi. Bul mekenniń «Qara túlki» ataýlynyń da syry osy. Jazǵy kanıkýl kúnderin osyndaǵy Ázimbek atamnyń úıinde ótkizdim. Atam ár nárseni surap, kóp otyrdy.

— Maǵan kómekshi bolasyń. Shóp shabamyz, ony jınap alýǵa da bir kisi kerek.

Aýlaǵa shyǵyp edim. Ózen jaǵasynda bir top bala júr. Kishkentaılardyń qasyna keldim.

— Bizben dos bolasyń ba? — dep jatyr jarysa sóılep.

— Aldymen tanysyp alaıyq, — dedim syr tartyp.          

— Meniń atym Sabyr, — deıdi kekili kózine túsken qara bala. — Mynanyń aty Qasym. — Boıshań kelgen, kúnge kúıgendikten bolar qara kúreńdenip totyǵyp ketipti. Tanysyp, endi qarmaq salaıyq degenshe, Qasymdy sheshesi shaqyrdy...

sylaısha kúnder ótip jatty. Ózenniń aǵyny baıaý, jaıpaq jerinde bireý otyr. Sabyr eken.

— Sen kelgenshe qansha ustadym, — dep jipke tizilgen sazandardy kórsetti. Áńgimelesip otyrmyz.

— Maǵan hat jazyp tur, — dedim Sabyrǵa.

— Jazý bilmeımin, úırengende jazamyn, — dep qoıady ol.

Aýylǵa qaıtatyn kún de taıandy. Sabyr men Qasym ózennen qaıyqpen ótkizip saldy. Mashınaǵa minip, artyma qaradym. Qoldarynda qarmaǵy bar kishkentaı eki dosym kópke dein tapjylmaı turyp, qoldaryn bulǵady...

Alǵashqy sabaq ótip jatty. Qyzyqty da áserli. Sabyr da mektepke bardy ǵoı. Qandaı tamasha!..

Qýanyshty kúnder... Sabaqtan kelsem:

— Saǵan hat kedi, — dedi kókem. Jalma-jan ashyp oqı bastadym. «Jomart aǵa, men mektepke bardym. Qazir áripterdi jazýdy úırendim. Endi jıi hat jazyp turamyn», — dep úlken áriptermen dápter betin toltyrypty.

Qýanǵanym sonsha, hatty qolyma alyp aıǵaılap jiberdim. Bul alǵashqy hattyń qýanyshy. Iá. Sabyr árip jaza biledi, endi kitap oqıtyn bolady. Maǵan hat jazyp turady. Men de ózimniń kishkentaı dosyma hat jazýǵa otyrdym...

---