Almatyda eń adal ustazdyń esimi belgili boldy
Almatyda «Adal ustaz» qalalyq baıqaýy máresine jetti. Bul baıqaý bıyl ekinshi ret ótkizilip otyr.
Adal ustaz ataný úshin qala mektepteriniń 12 ustazy baq synady.
«Bul baıqaý bıyl ekinshi ret ótkizilip otyr. Byltyr óte jaqsy nátıje baıqadyq. Óte paıdaly usynystar aıtyldy. Baıqaý sybaılas jemqorlyqqa qarsy saıasat formatynda ótip jatyr. Bizdiń ustazdar, muǵalimder ózderiniń oqýshylaryna bergen tárbıesi arqyly sybaılas jemqorlyq degen zulymdyq ekenin jetkizýi tıis. Osy baıqaý sybaılas jemqorlyqpen birige otyryp kúresýge bolatyndyǵyn kórsetýi tıis», - dedi QR Memlekettik qyzmet isteri jáne sybaılas jemkorlyqqa qarsy is-qımyl agenttiginiń Almaty qalasy boıynsha departamenti basshysynyń orynbasary Genadıı Danıarov.
2 saǵatqa sozylǵan saıys qorytyndysy boıynsha qazylar alqasy bas júldege №173 lıseıdiń muǵalimi Janar Kópbaevany laıyq dep tapty.
1 oryn №148 mektep-gımnazıasynyń muǵalimi Jetkinshek Meńdiǵalıevke buıyrdy.
2-orynǵa №53 mektep gımnazıasynyń muǵalimi Erkejan Makeshova men №60 mektep-gımnazıasynyń muǵalimi Nadejda Fendrıkova turaqtady.
3-oryndy №33 mektep-gımnazıasynyń muǵalimi Áıgerim Shaımerdenova, №178 mektep-gımnazıasynyń muǵalimi Ǵalymjan Shynasyl, №198 jalpy bilim berý mektebiniń muǵalimi Bereke Keńesova bólisti.
Laýreattarǵa baǵaly syılyqtar men sertıfıkattar tabystaldy.
«Bul saıystyń «Adal ustaz» dep atalýy tegin emes. Búkil adamzattyń ekinshi ustazy Ál-farabı atamyzdyń «Tárbıeden tys berilgen bilim asa qaýipti» degen sózi qazirgi tańda ustazdardyń kásibı ustanymyna aınaldy. Sondyqtan ár ustaz tápbıe máselesine erekshe kóńil bólýy kerek. Ásirese, ustaz boıynda negizgi qasıetteri - ustazdyń adaldyǵy, maqsat-múddesine adaldyǵy, óz kásibine adaldyǵy, oqýshylaryna adaldyǵy asa mańyzdy», - dedi qalalyq Bilim basqarmasynyń ádistemelik kabınetiniń bólim basshysy Ákimjan Saılybaev.
QazAqparat
You Might Also Like
