InfoHub Logo

«Rýhanı jańǵyrý» baǵdarlamasy aıasynda Qazaq ulttyq qyzdar pedagogıkalyq ýnıversıtetinde «Aýlaǵa asyǵyńyz!» atty áleýmettik joba bastaý aldy.

Oqý ornynyń rektory Gaýhar Aldambergenovanyń bastamasymen qolǵa alynǵan jobanyń maqsaty – urpaqtar sabaqtastyǵyn dáripteý, ulttyq oıyndardy ulyqtaý. Almaty qalasynyń aýlalary men oıyn alańdarynda júzege asyrylatyn is-shara jetkinshekterdiń zamanaýı gadjetter men kompúterlerge degen táýeldiliginen aryltýǵa úles qosýdy da kózdeıdi.

Bir bul ǵana emes. Joba «Rýhanı jańǵyrý» baǵdarlamasy sheńberinde paıdalanýǵa berilgen ońtústik astanadaǵy sport pen aýla alańdaryn tıimdi paıdalanýǵa óz septigin tıgizbek.

Almaly aýdanynyń ákimdiginiń qoldaýymen uıymdastyrylǵan sharanyń alǵashqy kúni belgili óner maıtalmany Sáken Maıǵazıev jetekshilik jasaıtyn «Smart» óner mektebiniń oqýshylary, tanymal blogerler men Qyzdar ýnıversıtetiniń ujymy mektep jasyndaǵy jetkinshekterge asyq atýdy, láńgi tebýdi úıretti. Ózge de umyt bola bastaǵan oıyndarmen tanystyrdy.

Uıymdastyrýshylar ulttyq oıyndardy ulyqtaý – qazaqty álemge tanytýdyń bir úlgisi dep paıymdaıdy.

– Qazirgi kúnde asyq oınaǵan, láńgi tepken nemese osy taqilettes deneniń shynyǵýyna paıdasy mol oıyndardy oınap júrgen balalardy únemi kóremiz dep aıta alamyz ba? Álde ǵalamtordan bas almaı, telefonǵa telmirgenderge kóp kózińiz túse me? Árıne sońǵysynyń bási basym bolyp tur. Ókinishti jaıt. Osy oraıda aıta ketken lázim, ár ulttyń ózindik tól tarıhy, dili men dini, tili men salt-dástúrimen qatar ulttyq oıyndary da bolady. Kıiz týyrlyqty qazaq halqynyń da birqatar ulttyq oıyndary bar. Babadan balaǵa mura bolyp jetken oıyndardyń basym bóligi balanyń densaýlyǵy úshin tıgizetin paıdasy aıtarlyqtaı zor. Sonymen qatar onyń urpaq tárbıesinde atqaratyn róli de úlken. Bizdiń bul áleýmettik jobany qolǵa alǵandaǵy maqsatymyz da osy. Umyt bola bastaǵan ulttyq qundylyqtarymyzdy qaıta jańǵyrtý arqyly óskeleń urpaqtyń parasat-paıymyn arttyrý, olardyń salaýatty ómir saltyn ustanýǵa shaqyrý, – deıdi Qazaq ulttyq qyzdar pedagogıkalyq ýnıversıtetiniń Áleýmettik damý jónindegi prorektory Jańagúl Sultanova.

Onyń aıtýynsha, áleýmettik joba bir rettik ǵana shara emes. Ol aldaǵy ýaqytta da Almaty qalasynyń ár aımaǵynda jalǵasyn tappaq.

---