InfoHub Logo

Óz jolyna túsip alyp súrleý soqpaǵymen kip-kishkentaı Qumyrsqa kele jatyr edi, kenet aldynan pende shyǵa keldi. Pende Qumyrsqany bir-aq myjyp óltire salsam ba eken dep oılady. Sol oımen pendeniń dáp-dáý báteńke kıgen aıaǵy kóterilip kele jatyr edi, osy kezde Qumyrsqa:

- Eı, pende, tura tur! Aıtatynym bar, - dedi.

- Ne aıtaıyn dep ediń? - dedi pende Qumyrsqaǵa saıqymazaq daýyspen. Sóıtti de, ózi júresinen otyra qaldy: - Al aıt, aıtatynyńdy! Áıtpese, myjı salam!

- Jaqsylyq jasa, - dedi Qumyrsqa.

Pende Qumyrsqanyń sózine kúıip-pisti:

- Sol ma aıtaıyn degeniń?! Sol da jańalyǵy bar sóz be?!

- Jaqsylyq jasasań, ózińe paıdasy tıedi, - dedi Qumyrsqa.

- Saýaby tıedi deseıshi, - dedi pende myrs etip. - Sony men bilmeıdi dep oılaısyń ba?!

- Ony aıtyp turǵan joqpyn, - dedi Qumyrsqa. - Jaqsylyq jasasań, ámıanyńnań bir túıir altyn teńge taýyp alasyń.

Pende Qumyrsqanyń sózine ishek-silesi qatyp kúldi:

- Kip-kishkentaı bolyp alyp sen de meni aldaǵyń keledi, ıá? Senimen sóılesip otyrǵan men de aqymaq. Men sen túgili, ózim sıaqty pendeden aldanbaımyn ǵoı.

- Senbeseń, synap kór, - dedi Qumyrsqa. - Biraq sol bir túıir altyn teńgeni qanaǵat et.

Sóıtti de, Qumyrsqa pendeni aınalyp ótip, óziniń jolyna túsip júre berdi.

Pende sol kúni jaqsylyq jasady. Biraq úıine kele jatyp: "Qaıdaǵy bir Qumyrsqanyń sózine senip, altyn ýaqytymdy bosqa ketirgenimdi aıtsaıshy. Odan da sol ýaqytymdy ózime paıdasyn tıgizer bir iske jumsasam netti?" - dep ókinip kele jatty.

Pende keshkisin ámıanyn ashyp qalyp edi, ishinde jarqyrap jatqan bir túıir altyn teńgeni kórip qýanyp ketti. "Altyn teńge taýyp aldym! - dep aıǵaı saldy pende. - Bul endi meniki! Meniń aqsham!

Sonan soń pendeniń kóńil-kúıi túsip ketti. Baǵanaǵy Qumyrsqanyń "sony da qanaǵat tut" degen sózin tars esinen shyǵaryp: "Nege altyn teńge bireý-aq? Men búgin eki adamǵa jaqsylyq jasap edim ǵoı", - dep tomsyraıyp ókpelep otyrdy.

---