InfoHub Logo

Bókenniń bir minezi kimniń janyna jaqyn júrsem, abyroıdy kóbirek jınaımyn, kimniń janynda kóbirek sóılesip tursam, abyroıly kórinip turamyn, kimmen baılanys ornatsam, abyroıym asqaqtaı túsedi dep júrýshi edi. Keıde osy adam balasyn alalaǵandaı bolǵanym nesi dep Bóken óz-ózine ishteı renjise de, bala kezden qalyptasyp ketken osy ádetin qoıa almady.

Bóken dál qazir klýbqa konsertke kelip tur. Biraq konsertke kirmesten buryn klýbtyń esiginen syǵalap, kimniń janynda otyrsam, abyroıdy kóbirek jınaımyn dep oılanyp tur. Kópshilik jınala bastasa da, konsert áli bastala qoımaǵan kez. Bóken sondyqtan asyqpaı oılanyp tur. Kózi aldymen aldyńǵy oryndyqta otyrǵan Núkeńe tústi. Núkeń - el aǵasy bolyp júrgen azamat. Núkeńniń janynda otyrǵannan abyroısyz bola qoımas edi. Biraq Núkeńniń ózi "áı, Bóken, beri kel, meniń janyma otyr" dep shaqyryp jatpaǵasyn, Núkeńdeı adamdardyń janyna baryp, áı joq, sháı joq, jaıǵasa ketkeni abyroı bola qoıar ma eken? Mundaıda Núkeń ne oılaıdy, qarap otyrǵan syrt jurt ne oılaıdy? Joq, otyra almas. Núkeńdeı kisilerge jaqyndaý júrýdiń de bir yńǵaıy keler. Bóken osylaı oılanyp turyp, kózimen balýan jigit Seıtekti de, dáriger jigit Qapardy da, satýshy kerbez kelinshek Aqbilekti de, kishilerge únemi tálim aıtyp júretin qurmetti demalystaǵy zeınetker Salıha apaıdy da, muǵalim jigit Zeıneldi de, ózimen qurdas esepshi Halıdollany da bir-bir sholyp ótti. Báriniń de janynda otyrǵannan abyroısyz bola qoımas edi.

Bókenniń kózi kenet Alýaǵa túse ketti. Alýa dese, Alýa. Alýa - súp-súıkimdi áp-ádemi qyz. Alýanyń janynda otyrǵannan abyroısyz bolmas edi. Bóken endi osy konsertten keıin Alýamen kóshe boılap qydyryp bara jatqan sátin kóz aldyna elestetti. Ekeýi bir shoq taldyń túbine aıaldapty. Bóken qıalymen Alýanyń bileginen ustap ózine qaraı ıkemdeı bergeni sol edi, osy kezde bireý Bókendi quıryǵynan tizesimen yńq etkizip bir tepkeni. Ańdaýsyz turǵan Bóken etpetinen jyǵyla jazdady. Artyna jalt burylyp qaraǵanda jurt "jyndy Jumahan" dep atap ketken jigitti kórdi.

- Ne istep tursyń?! - dedi Jumahan Bókenge túsin sýyta qarap. - Taǵy da sol kimniń janynda otyrsam, abyroıdy kóbirek jınaımyn dep ishki esebińdi quryp tursyń ba?!

Jumahan Bókendi sheńgeldeı tústi.

- Qoı deımin, Juma! Qoı! Kóılegimdi jyrtasyń, Juma!

Jumahan oǵan qaraǵan joq.

- Júr! Búgin konsertte meniń janyma otyrasyń! - dedi Jumahan.

Sóıtti de, Bókendi ishke qaraı dyryldatyp súıreı jóneldi.

- Qoıa ber deımin, Juma! Abyroıymdy tógesiń!

- Seniń búıtip árkimge kózińdi satyp júrip jınaǵan abyroıyńdy urǵanym! - dedi Jumahan.

Bókenge endi tek jurttyń kózinshe Jumahanmen ázildesip kele jatqandaı kórinip, Jumahannyń betine qarap yrjalaqtaı berýden basqa sharasy qalmady. Biraq eki aıaǵy dedektep kele jatty.

Jumahan sol kúıi klýbtyń artqy oryndyǵyna bettedi. Áýeli oryndyqqa ózi jaıǵasty da, janyna Bókendi bir-aq tartyp sylq etkizdi.

Bóken sol kúni Jumahannyń janynda otyryp konsert kórip shyqty. Óz-ózine bir túrli kóńili tolyńqyramaı otyrdy.

---