InfoHub Logo

Ańlamas qusbegi, ańshylyq, balyqshylyǵymen ataǵy Syr boıy men Qyr óńirine keńinen taraǵan. Birde Qyr eliniń bir ataqty baıy Ańlamastyń ataǵyn esitip, ony synamaqqa qasyna birneshe qosshylary men sheshen-bılerin ertip Syr boıyna kelipti deıdi. Ol kezde Syrdarıa ózeniniń eki beti jaıylǵan sý, qalyń ný qamys, toǵaıy tolǵan ań bolǵan kórinedi. Qazirgi Tereńózek aýdanynyń «Tereńózek», «Shirkeıli» jáne «Ilıch» atyndaǵy sovhozdaryna arnalǵan óńir tutasqan kól — «Dalakól», «Kúmiskól» t.s.s. bolypty.

Baı kelgende Ańlamas bir top týystarymen sol kólder jaǵasyn jaılap otyrǵan eken. Baı:

— Ańlamas, seniń balyqshylyq ataǵyń Syrdan asyp Qyrǵa jetti. Qaı balyq qaı jerde jaıylatynyn dál biledi deıdi. Seniń osy isińniń rastyǵyna kóz jetkize keldik. Bizge bir shabaq ustap ber, — depti.

Baı Ańlamas ustap bergen shabaqqa qolyndaǵy altyn júzigin kıgizip, qolynan kólge jiberip:

— Ańlamas, keler jyly osy ýaqytta kelemiz, sonda osy balyqty ustap beresiń, — dep júrip ketedi.

Aıtqanyndaı, baı kelesi jyly osyndaı ýaqytta kelip:

— Ýádeli ýaqytta kelip turmyz, bizdiń byltyrǵy balyǵymyzdy taýyp ber, — depti.

Ańlamas salǵa minip, qolyna balyq ustaıtyn quraldaryn alyp kólge túsip, biraz ýaqyttan keıin uzyndyǵy metrge jýyq bir balyqty ustap ákelip:

— Baıeke, mynaý sizdiń byltyrǵy shabaǵyńyz, — dep aldyna tastapty.

Baı ótken jylǵy qarysqa tolar-tolmas shabaqtyń osynshalyqty óskenine jáne sol shabaqtyń ózi ekenine senimsizdik jasap, qaltasynan  pyshaǵyn alyp balyqty soıyp kórse, baıaǵy altyn júzik ishinen shyǵypty. Baı Ańlamastyń isine rıza bolyp, kóp syı-sıapat berip, qonaq bolyp eline qaıtypty.

---