InfoHub Logo

Bilimge qushtar Meıirim men Mıras degen balalar bolypty. Olar qyzyqty kitap kórse boldy, talasyp oqıdy eken. Kúnderdiń bir kúninde ekeýi jolda kele jatyp taldyń túbinen kúndeı jarqyraǵan bir ǵajaıyp kitapty kóredi. Ekeýi ań-tań bolyp, kitapty almaqshy bolady. Sonda álgi kitap sóıleı jóneledi:

— Men jaı kitap emespin. Aqyldy kitap pyn. Meniń senderge beretin aqylym kóp edi. Biraq bir sotqar bala bir betimdi jyrtyp, kóp asyl sózimnen aıyrylyp qaldym, — deıdi.

Balalardyń kitapqa jany ashıdy.

— Ol qandaı bala? Biz ony izdep, seniń jyrtylǵan betińdi taýyp bereıik, — deıdi ekeýi.

— Senderge kezdeskenim qandaı jaqsy boldy, — deıdi kitap qýanyp.

Meıirim men Mıras ta jańa dos tap qanyna qýanady. Olar kitap ishindegi «Ermek» degen jazýdan onyń kitap ıesi ekenin biledi. Sóıtip, ekeýi Ermekti izdep jolǵa shyǵady.

Birde olar aýyldyń shetinde taýyqtarǵa tas laqtyryp júrgen balany kóredi. Ermek osy shyǵar dep oılaıdy olar.

— Myna kitaptyń ıesi sensiń be? — dep oǵan beti jyrtylǵan kitapty kórsetedi.

— Iá. Biraq ol endi maǵan kerek emes. Kerek bolsa, ózderiń ala berińder, — deıdi beıtanys bala.

— Jaraıdy. Saǵan kerek bolmasa, biz alaıyq. Sen kitaptyń myna bir betin jyrtypsyń. Ony qaıda tastadyń? — deıdi balalar.

— Men odan qaıyq jasap, bulaqqa aǵyzyp jibergenmin, —  deıdi Ermek.

Balalar bulaqqa keledi.

— Bulaq, bulaq, sen qaǵazdan jasalǵan qaıyq kórdiń be? — deıdi oǵan.

— Meniń kózim durys kórmeı tur. Jan-jaǵymdy shópten tazalap, taspen qalap qoıyńdarshy, — deıdi bulaq.

Balalar bulaqtyń kózin ashady. Qaıyrymdy balalardy jaqsy kórgen bulaq:

— Qaǵaz qaıyqty úlken alma aǵashtan surańdar. Ol solaı qaraı júzip ketken, — deıdi.

Meıirim men Mıras alma aǵashqa keledi.

— Alma aǵash, alma aǵash, sen qaǵazdan jasalǵan qaıyq kórdiń be? — deıdi oǵan.

— Balalar, men qatty shóldep turmyn, sý ákep berińdershi, — deıdi aǵash. Balalar onyń aıtqanyn isteıdi. Ózderi tazalaǵan bulaqqa baryp, sý ákep beredi. Rıza bolǵan alma aǵash balalarǵa eki alma beredi.

— Qaǵaz qaıyq baǵana jaǵaǵa shyǵyp qalǵan. Kúnge qyzdyrynyp jatqan ony bir kirpi arqasyna salyp aldy da, úıine qaraı áketti, — deıdi artynan.

Eki dos kirpige keledi.

— Kirpi, kirpi, sen qaǵaz qaıyqty qaıda ákettiń? — deıdi oǵan.

— Meniń sendermen sóılesip turatyn ýaqytym joq. Balalarym ash. Tamaq taýyp berýim kerek, — deıdi kirpi.

— Bizde eki qyzyl alma bar. Ony sen balalaryńa aparyp ber, — deıdi eki dos.

Muny estip, kirpi qýanyp ketedi.

— Jaqsy boldy ǵoı, balalarymnyń qarny toıatyn boldy. Men qaǵaz qaıyqty arqalap kele jatqanda qatty jel soqty. Aspanǵa ushqan qaǵazdy bir qarlyǵashtyń tumsyǵymen tistep alǵanyn kórdim, — deıdi ol balalarǵa. «Qajet bolyp qalar» dep sońynan bir kendir jip syılaıdy. Balalar qarlyǵashtyń uıasyn izdep tabady.

— Qarlyǵash, qarlyǵash, sen qaǵaz qaıyqty qaıda ákettiń? — deıdi oǵan.

— Men uıa jasamaqshy bolyp júrgende bir paraq qaǵaz taýyp aldym. Ony alyp ushyp edim, qatty jel soqty. Jartasqa soǵylyp, bir qanatymdy jaraqattap aldym. Sóıtip, balapandaryma tamaq tası almaı qaldym, — deıdi qarlyǵash.

— Biz seniń qanatyńdy tańyp bereıik, — deıdi eki dos.

Qarlyǵash qýanyp ketedi. Balalar qarly ǵashtyń qanatyn baılap, jaraqatyn jazyp beredi. Qarlyǵash kishkentaı balalardyń qam qorlyǵyna súısinedi. Aq paraqty taýyp, ákelip beredi. Balalar jyrtylǵan paraqty kitapqa jelimdeıdi. Aqyldy kitap qatty qýanady.

— Alaqaı, biz endi kitaptyń barlyq betin oqı alatyn boldyq, — deıdi Meıirim men Mıras shattanyp. Kitaptyń jyrtylǵan paraǵynda «Bireýge jaqsylyq jasasań, ózińe qaıyrymy bolady» degen jazý bar eken. Sóıtip, balalar aqyldy kitappen áli kúnge deıin dos bolyp júr eken.

---