InfoHub Logo

Bir otyrysta júz teńgelik Tıyn men on myńdyq Teńge sózge kelip qaldy. Otyrysty júrgizip otyrǵan Tıynnyń: «Teńge tıynnan quralady», — dep sóz bastaýy Teńgege jaqpaı qaldy.

— Áı, balaqaı! — dedi ashýǵa býlyqqan Teńge. Myna sózdi menen basqa eshkim estimeıtin bolsyn. Dúkenderdiń satýshylary aldymda quraq ushady. Tipti, Banktiń ózi meni qurmetteıdi. Sonda sen ózińdi kimmin dep bilesiń.

Tıyn da birbetkeı edi.

— Aǵataı-aý! Tıyn bolmasa, siz eki aıaǵyńyz aspannan salbyrap tústińiz be? — dep edi, Teńge tipti qutyrynyp ketti.

— Men baspahana boıaýy áli keýip úlgermegen Teńgemin. Sýdaı jap-jańamyn. Men baılardyń janqaltasynda júremin. Sen bolsań, qaıyrshynyń dorbasynda júresiń.

Tıyn ne kúlerin, ne jylaryn bilmedi.

— Menen ataǵyńyz basym bolsa da, qunyńyz kóp bolsa da, Siz eýro men dollardan asa almaısyz ǵoı, — dep edi.

— Já, til men jaǵyńa súıenbe. Qazir meniń dáýrenim. Al seniń qolyńnan shyldyrlaǵannan basqa ne keledi. Kóp bolsa dúkennen shyrpy nemese saǵyz alýǵa ǵana shamań keler, — dedi Teńge.

— Usaq iri bolmaıdy dep oılama. Alyptar maıdalanbaıdy dep oılama, sizdiń túbińiz qaǵaz, meniń túbim qalaıy, — dedi Tıyn. Teńge aýzyn asha almaı qaldy. Tıyn bolsa:

— Tıyn aýyr ma? Teńge aýyr ma? Teńgeni tıynǵa aınaldyrý op-ońaı. Tıynnan teńge jasaý qıyn. Usaqtalý  ońaı. İrilený qıyn. Usaq-túıekti usaq aqshaǵa da satyp alýǵa bolady. Tıyndy jaqtyrmasań, teńgeń kóbeımeıdi. Tıynnan teńge quralady. Teńge tıyn bolmasa sýalady, — dep bastyrmalatyp baryp toqtady.

Talas sońy ne boldy deısiz be? Teńge de tozdy. Aqyry jyrtyldy. Tıyn bolsa ozdy. Jyldar ótkende murajaıdan oryn aldy.

---