InfoHub Logo

Ol dúkenniń aldyna qaıta keldi. İshinen shetel áýeni estiledi. Satýshy qyz dúnıeden túńilgen keıippen dalaǵa qarap otyr. Kenet kózi balaǵa tústi de, judyryǵyn túıip qabaǵyn shytty. Bir saǵattan astam ýaqyt dúken mańyn tóńirektep júrgen ol sezikti kórinse kerek.

Bala burylyp kóp qabatty úı jaqqa bettedi. Janary jasaýrap, dúnıe tumandanyp ketken. Aqyryn baıqatpaı mańdaıyn súrtken bolyp kózin sıpap aldy. Esil-derti aıaǵynyń astynda. Aqsha izdep kele jatyr. Eger jıyrma teńge taýyp alsa, ápkesine telefon shalatynyn, eger júz teńge tapsa, eshkimniń kómeginsiz aýylǵa jetetinin biletin. Sondyqtan jeńgesiniń kózin ala bere kóshege shyǵyp aqsha izdeıdi. Árıne, aqsha bar dúnıede ony joǵaltatyn adamdar da bolady. Al áldekimniń joǵaltqan nársesin bireý taýyp alyp jatpaı ma. Balany aqsha izdeýge shyǵarǵan osy oı. Biraq arnaıy izdegen zat tabyla qoıýshy ma edi.

Ol ekinshi qabatqa kóterilip, qońyraýdy baspastan buryn tyń tyńdady. Tynysh tárizdi. Marjannyń da, jeńgesiniń de daýysy shyqpaıdy. Uıyqtap jatyr ma eken. Ol qyzyl túımeni basýǵa oqtalǵan saýsaǵyn tarta qoıdy. "Uıyqtap jatsa shataq bolady" dep oılady ol. Qalqıǵan kulaǵyn esikke japsyryp taǵy tyń tyńdady. Urysqanda jer-jebirińe jetetin jeńgesinen qatty qorqatyn. Aǵasyna aýylǵa aparyp tastashy deýge de batyly barmaıdy. Bótendigin, ákesiniń basqalyǵyn kórsetip jatyr dep ókpeleıtindeı kórinedi. Ol aýyldy qatty saǵynǵan, shomylǵannan keıin birneshe kún balyq sasytatyn kólin de, jartastan sekirýge batpaıtyn dosy Serikti de, ásirese kómbege nan pisirip, bir shókim bolyp otyratyn mamasyn saǵynǵan. "Ózim kinálimin, — dep kúbirledi ol, — Qaıdan ǵana Almatydaǵy aǵama baramyn dep baıbalam shyǵardym deseńshi". Kúnde qulaq etin jeı bergen soń mamasy avtobýsqa salyp ákelip tastady. Baıqus mamasyn jeńgesi bir kún de qondyrmaı, kelgen kúni qaıtarǵan. "Oryn joq. Onsyz da aýa tar. Marjanǵa zıan" dedi jeńgesi. Al aǵasy "Onda keshki avtobýsqa úlgerip ket" degen. Mamasy qaıtyp ketti. Jol boıy armandaǵan sýyna da túsken joq, týǵan kezinde bir kórip jete almaı júrgen Marjandy da maýqyn basyp kótermedi. Balanyń kózine jas úıirilgen. Aýylǵa jetsem endi qaıtip eshqaıda ketpeımin dep sheshti ol. Bar armany aǵasynyń qasynda júrip mashına jóndegendi úırený edi. Kelgeli jumysyna bir barǵan joq. Al mamasy "esil-derti temir, reti kelse qasyńa alyp júrip kórsetersiń" degen keterinde. Aǵasy yrjıyp, basyn ızegen. Sodan keıin umytyp ketti me, únsiz. Esine salýǵa taǵy yńǵaısyzdanady, "Ákemiz bólek bolǵan soń meniń qyzymdy baqqysy joq" dep ókpeleı me dep qorqady. Al ol Marjandy janyndaı jaqsy kóredi.

Aǵasyn, joq, alldymen ápkesin, sodan soń Marjandy jaqsy kóredi. Al mamam she dep oılaıdy ol. Mamasy esine túskende kózi qaıta jasaýrap, ıegi kemseńdegen. Bireý-mireý kórip qalmasyn dep alaqanymen jasyn súrtip, murnyn tartty. Baǵanaly beri súıenip turǵan tas qabyrǵadan denesi titirkenip ketti. Biraq ádeıilep jabysa tústi de syrǵyp baryp otyrdy. Úıdiń ishinen dybys shyqpaıdy. Bir jaqqa ketip qaldy ma eken? "Marjan jylasyn" dep oılady ol. Sodan soń kiremin.

Álde taǵy aqsha izdep kelsem be eken dep bir oılady. Oqtala berip qaıta otyrdy. Qarny shurqyrap ashyp barady. Onyń ústine kózi de qyzaryp ketken shyǵar. Ol demin ishine tartyp tyń tyndady. Tym-tyrys. Úlken úıdiń ishinen qybyr etken dybys shyqpaıdy. Kózine qaıta jas tyǵyldy. Manaǵy dúkenshi qyz tústi esine.

— Telefonyńyzben ápkeme zvondap alsam bola ma, qatty kerek bolyp tur edi, — dese she.

Kóz aldyna qabaǵyn qars túıgen sary qyz elestedi.

— Jıyrma teńgeń bar ma, bala?

Ol ornynan súıretilip turyp dalaǵa bettegen. Aqsha izdeý kerek. Jıyrma teńgesiz eshkim telefonmen sóılestirmeıdi.

Al dalada shildeniń aptap ystyǵy bolatyn.

---