InfoHub Logo

Qazan bappen qaınap jatyr. Óz ornyn óz isin biletin sabyrly adam tárizdi. Az ǵana bý shyǵaryp, birqalypty búlkildeıdi..

— Qalyń qalaı?, — dep suradym ájemnen, — Ne istep júrsiń, aqshań bar ma?

— Jaqsy, jaqsy.

Basyn qaıta-qaıta ızegen ol oshaq astyna taǵy eki-úsh aǵash tastady.

— Aqshań jetip júr me?

— Aqshany ne qylady deısiń. Un bolsa boldy ǵoı. Bar, qonaqtarǵa barsańshy.

Aýlada ázirlengen dastarqan basyna keldim. Saqal-murty appaq shal soǵysta kórgenin áńgimelep otyr. Tisteri joq bolǵandyqtan ba daýysy dańǵyrlap sózderi túsiniksiz shyǵady. Ara-tura bir-birine til qatqany bolmasa, qalǵan jurt únsiz. Dastarhan shetine otyrdym. Aq oramal salǵan kishkentaı qara kempir jaltaqtap qarap, kózimiz kezdeskende kúlimsireıdi. Kasyndaǵy kók kóz, sary bala bolsa, esi shyǵyp úrke qadalyp qalǵan. Jymıdym. Esh ózgeris joq. Ernimdi tistep, tómen qaradym. Aq saqaldy atanyń birde baıaý, birde qatty shyǵatyn úni, qazan-oshaq basyndaǵy áıelder daýysy, údeı bastaǵan jel. Kózimdi jumǵym keldi de qarsy aldymdaǵy kempirden kysylyp basymdy kóterdim. Qarap otyr.

— Qazir tamaq ákeledi.

Basyn ızep kúlimsiredi.

— Qashan keldiń?

— Baǵana.

— Oqýyń qashan bitedi?

— Kelesi jyly.

Únsiz qaldy. Sodan soń:

— Ákeńdi bilemin ǵoı, tıttaıynan biletinmin. Sen týra aýzynan túskendeısiń.

— M-m-m...

Ornymnan turyp ájeme bardym.

— Áje, ana kempir ákemdi bilemin deıdi.

— Qaısy? Bıbi me? Bilmegende endi osy aýyldyń adamy ǵoı.

— Tamaq qashan daıyn bolady? Kómekteseıin be?

— Qyzdar bar ǵoı. Sen qonaqtardyń qasyna barsańshy. Ákeń tiri bolsa, sol otyrar edi ǵoı arasynda. Qaıteıin endi.

Stol basyna qaıta keldim. Aq oramal salǵan áje jaltaqtaıdy. Qonaqtar soǵys kórgen atanyń áńgimesin tyńdaıdy. Al men basymdy tómen salamyn. Azdan soń jańbyr jaýady.

---