InfoHub Logo

Kún kenet sýytyp ketti. Japalaqtap terbelgen qarǵa máz-maıram bolǵan adamdar qýanysh artynan keler aıaz jaıly múlde oılamaǵan. Endi suryqsyz aspanǵa qosylyp bári tunjyrap júr. Jańa jylǵa bir kún qalǵan. Men atamnyń úıine bardym. Aýadan kári, ári jalǵyz kisilerdiń úılerine tán ıis seziledi. Jınalyp qalǵan ydystardy jýyp, bólmelerdi sypyrdym. "Syrtqa shyǵyp júrip keleıin" dedi ol. Esikti jaýyp aldym. Kitaptar. Marks, Lenın shyǵarmalary, Stalın sýretteri. Tom-tom kitap. Eń joǵarǵy sóreden ájemniń sýretin alyp shańyn súrttim.

Bul úıde eńse basyp kóńilsizdendiretin áldene bar. Sondyqtan eshkim kele bermeıdi. Sondyqtan men de sırek kelemin. Tósegin qaǵýǵa kiristim. Bas jaǵyna jınalǵan qabat-qabat gazetterdi rettep, as úıge aparyp qoıdym. Tórt jastyq, olardyń astynda shapan, eski palto, kúrteshe, plash... Baıaǵyda laqtyryp tastaıtyn dúnıeler. Shań. Dálizden tyqyr estildi. Úsh alma, tátti nan alyp kelipti.

— Shaı bar ma? — dedi sheshinip jatyp. Únsiz otyryp shaı ishtik.

Qarańǵy túse bastaǵan. Syrtqa shyqtym. Aıaz dereý betimdi tońazytty, sodan soń qolǵapsyz saýsaqtarym dombyqqan.

Sol joly aıaldamaǵa kele jatyp, jaqynda kóktem shyǵady dep ózimdi qansha sendirgim kelse de ılana almadym.

---