Armysyń, Kavkazdyń kógildir taýy!
Armysyń, Kavkazdyń kógildir taýy! Sen meni sábıimde áldılediń; sen meni jalǵyzsyraǵan quzar shyńyńa shyǵaryp, bulttan torqa japtyń, zeńgir kókke úıir ettiń. Sodan beri sen, seniń aspanyń kóńilimnen shyqpaı qoıdy. Iyǵynan naızaǵaıly bult ushyrǵan tabıǵat tájisiń, sen. Taýyńnyń basynda turyp jaratqanǵa jalbarynǵan jan ómirge nasattansa da, artynsha sol ómirdi mensinbeıdi.
* * *
Tańerteń shyǵyp kele jatqan kún sáýlesinde qalyń qar, shalǵaıdaǵy quzdyń muzy jarqyrap, kóz jaýqaryn alýshy edi. Sary sáýlege oranǵan olar yldıdaǵy kúńgirttik áli arylmaı turǵan shaqta jolaýshyǵa tańdy tanytýshy edi. Sol sary sáýle sýǵa shomylǵan kezinde erkekti kórip, aq kóılegin tósine basa salǵan qyzdyń uıalshaq dıdaryna uqsas edi.
Seniń daýylyńdy súıýshi edim, Kavkaz! Daýylyń qatty soqqanda zańǵarlar daýystasqan túngi qaraýyldaı jańǵyryǵyp ketýshi edi!.. Taqyr shoqyda jel qaǵyp, jańbyr mújip ımıgen jalǵyz aǵash, ańǵarda sýsyl qaqqan júzimdik, qurdym ústinen ótetin belgisiz jol, qaptalda kóbik shasha aqqan belgisiz ózen; jaýyz jaýdyń nemese jaı ańshynyń atqany belgisiz gúrs etken myltyq, odan týǵan úreı... bári-barshasy bul ólkede tamasha.
* * *
(Bul ólkede aýa degenińiz sábıdiń lebizindeı taza, qustaı erkin adamdary beıǵam ómir súredi; olardyń qanyna sińgeni soǵys; qara-qońyr dıdarynan jan syry kórinip turady. Shymmen nemese qur sámbimen tóbesin japqan tútindi tamda áıelderi men qyzdary ońashalanyp, myltyq tazalaıdy, kúmisten zer salady; taǵdyrdyń buǵaýyn tanymaǵan olar ońashada saǵynyshtan sarǵaıyp, ishten semedi.)
You Might Also Like
