InfoHub Logo

Nartaılar endi ońǵa qaraı buryldy. Ol jaqta da el top-top bop jınalyp alypty. Bul joly ústinen túskeni «arqan tartý» eken.

Shetke kelip turǵandary sol saıys aldyndaǵy basqa bir tartystyń kýási boldy. Ózderinen sál ǵana úlken bozbalalar ekige bólinip, saıysta jeńilip qalǵandardyń ózderiniń «aıyptaryn» qalaı jýyp-shaıatyndaryna kelise almaı, qyzylkeńirdek bolyp jatypty.

— Kókpar bersin! — dedi bir bala jigit aldymen usynys tastap. — Sirá, ózi laq tartqandy jaqsy kóredi.

— Joq, bolmaıdy, — dedi taǵy bir bala jigit aldyǵa shyǵyp.

— Kókpar degen qýanyshqa, jaqsylyqqa beriletin nárse, jeńilip qalǵanǵa qalaı beredi? Basqa nársege keliseıik.

— Oǵan talasyp qaıtesińder? Jeńip shyqqandardyń júldesi onsyz da bar emes pe? — dep sóz qosty shette turǵan bir bala.

— Joq, áńgime jeńgender týraly emes. Onsyz da júlde bar ǵoı, biraq, jeńilgender sonymen jeńil qutylyp ketse bolmaıdy. Birdeńe isteý kerek… — dedi ózderiniń jeńip shyǵatynyna asa senimdi alǵashqy bala.

— Ózderiń jeńilip qalsańdar, qaıtesińder? — dedi taǵy bir bala ony muqatpaq bolyp.

— Kelisken shartty oryndaımyz, — dedi álgi jigit birden kesip.

— Jaqsy. Onda keliseıik. Keshke bárimizdi qonaq qylsyn… qalaı qaraısyńdar?

— Joq, keshke emes. Kúndiz bolsyn, taýǵa shyǵaıyq…

— Keshke úıińnen shyǵa almaıtyn boldyń ǵoı, á? — dep kúldi bir bala.

Turǵandar qosyla dý kúldi.

— Kúlkini qoıa turyńdar. Ýaqyt ketip barady, tez keliseıik, — dedi alǵash sóz bastaǵan bala.

— Sol… taýǵa shyqqan durys qoı deımin, — dedi taǵy bir bala.

— Sen de túnde úıden shyǵa almaıtyn bireý boldyń ǵoı… solaı-aq bolsyn, — dedi taǵy bir bala kúlip.

— Qoldaýǵa turatyn usynys, — dedi bir bala qolyn kóterip.

Qalǵandar da kóterdi qoldaryn. Keıbiri qalys qalyp jatty. Sońǵy esepte kelisim jasaldy.

— Kelisip boldyńdar ma? — dedi dál osy kezde ortaǵa kirgen ádilqazy.

Jigitterdiń jaýap berýin kútken joq, óz sharýasyna kirisip ketti.

— Oıyn erejesin ózderiń jaqsy bilesińder, — dedi ol jan-jaǵyna qarap. — Solaı bola tura, mindet bolǵan soń, taǵy bir ret aıtyp ótken artyq bolmas. Arqan mynaý, — dep, jerde jatqan jýan kendir arqandy nusqady ıegimen. — Osy arqandy tartamyz. Eki jaqtaǵy adamdar sany teń, on-onnan. Dál ortada baılanǵan qyzyl jipti qaı jaq syzyqtan ótkizip, ózderine qaraı tartyp alsa, jeńis solarda. Daıyn bolsańdar, jarysty bastaımyz.

— Daıynbyz! — dep shý ete qaldy saıyskerler.

— Onda bastadyq!

Ortadaǵy ashyq jerge baryp turǵan ádilqazy arqandy qolyna alyp, qaq jarylǵan balalardyń myqtap ustap alýyn kútti.

— Men ysqyrmaı turyp bastaýǵa bolmaıdy, — dedi sosyn eki

jaqqa kezek qarap. Eki jaq arqannan myqtap ustap, aıaqtaryn jerge tirep tura qaldy.

Eki qadam keıin shegingen ádilqazy qolyn kóterip, ysqyryp qaldy.

Saqadaı saı eki jaq shirene keri tartty. Birin-biri ala almaı teń túsip, biraz turdy. Jaqsy daıyndalǵandary kórinip tur. Mundaı toptyq sportta birlik asa mańyzdy ekenin jaqsy biletin sıaqty. Shashaý shyqpaı qatar qımyldap, teń tartyp jatyr. Biraq, «kúsh ákesin tanymas» degen. Kóp ótpeı sol jaqta turǵandardyń qaıraty basym ekeni baıqaldy. Arada kóp ótpedi, ortadaǵy qyzyl jip sol jaqqa aýyp kete bardy.

Sony baıqaǵan ádilqazy ysqyryǵyn ysqyryp, tartysty toqtatty. Jeńgen jaqtyń jankúıerleri shý etip qoldaryn soqty.

---