InfoHub Logo

Nartaılar «Teńge ilýdi» kórip bolyp, kelesi topqa bet aldy. Munda da jarys qyzyp jatypty. Kórermender qataryna kelip tura qaldy.

Basynda ne bolyp jatqanyn Nartaı bilgen joq. Baqylap sál turǵan soń, bári belgili boldy.

Alǵashynda ol eki-ekiden juptasyp arǵy shette qatar turǵan atty jigitterdi kórdi. Áldenege ázirlengendeı tastúıin bekinip alypty. Attary da tyqyrshyp, ózderi de eleńdep tur.

— Munda aýdaryspaq bolyp jatyr eken ǵoı, — dedi qasynda turǵan bala.

Nartaı mundaı saıystyń bar ekenin estigenmen, naqty qalaı ótetinin bilmeıtin. Sondyqtan jaqsylap kórip alǵysy keldi.

Arnaıy kıim kıgen atty kisi ortaǵa shyǵyp, qatty daýystap oıyn erejesin baıandap ótti. Sosyn qolyndaǵy qaǵazǵa qarap, eki adamnyń atyn atady. Aýdaryspaqqa túsetinder osylar eken. Qos jigit attaryn tebinip, jele jortyp ortaǵa shyqty.

Olarǵa jaqyndaǵan ádilqazy aınala júrip, muqıat tekserdi. Asa mán berip qaraǵany belderine baılaǵan belbeýi boldy. Ustap turyp shirene tartty. Nartaı túsinbeı:

— Ne istep jatyr? — dep surady.

Qasynda turǵan bala:

— Belbeýlerin tekserip jatyr. Bul aýdaryspaq saıysynda óte mańyzdy. Belbeý bolmasa, basqa jerden ustap, attan aýdarý qıyn. Ne kıim jyrtylady, ne sytylyp shyǵyp kete beredi. Keıbireýler belbeýdi bos baılap qoıyp, qatty tartqanda, aǵytylyp ketedi. Sondyqtan, qatal tekserý kerek, — dep, táptishteı túsindirdi.

Nartaı basyn ızedi. Artynan:

— Belbeý degen beldik pe? — dep surady bárin anyq bilip alaıyn dep.

— Joq, beldik emes, — dedi ana bala. — Bes-alty metr matany uzynynan shıyrshyqtap kıimniń syrtynan belge oraıdy.  Onyń bir ushyn oralǵan mataǵa jaqsylap bekitedi. Sonda ol  bosamaıdy. Bastysy, aýdarysqanda ustaýǵa qolaıly. Belbeý degen sol. Qara, bastaldy!…

Nartaı aldyǵa umsyna qarap edi, eki jigit sart-surt ustasyp qalǵan eken.

Ekeýi de tas qylyp bir-biriniń belbeýinen ustapty. Jigitter qarýly eken. Ońaılyqpen beriser túri joq. Ekeýin eki jaqqa tartyp ketýge shamalary jetpegen attar, sheńber jasap aınalyp júr. Bir kezde jigittiń bireýi attyń basynan asyp baryp jerge qulady. Onyń artynan atynyń ertoqymy da sypyrylyp tústi.

— Qap! — dedi qasynda turǵan dosy sanyn soǵyp. — Tartpa úzilip ketti. Obal boldy.

Ne bolǵanyn sonda baryp áreń ańdaǵan Nartaı:

— Endi olar qaıta aýdarysa ma? — dep surady.

— Ony ádilqazy sheshedi. Joq, mynaý qaıta aýdarystyrmaıtyn boldy. Kisi kóp qoı óıtkeni…

İshteı sál ókinip qalǵan Nartaı:

— Bul ádiletsizdik qoı. Tartpanyń úzilýi jeńilistiń sebebi bolmaýy kerek qoı, — dedi.

— Naqty qalaı sheshkenin bilmedim. Biraq, tartpanyń álsizdigine ıesi ǵana kináli, bul basy ashyq nárse, — dedi óte kóp biletin qasyndaǵy dosy.

Nartaı qısynǵa jyǵylyp, úndemeı qaldy.

---