InfoHub Logo

Álı búgin erte turdy. Ondaǵy maqsaty keshe úıdiń artyndaǵy tamnyń túbinen kezdestirgen ulýdy qaıta kórý bolatyn. Momaqan jándikke qatty qyzyqty, biraq, sońyna deıin baqylaı almady.

Alǵash kórgende qatty tań qaldy. Dál qasynan ótip bara jatyp, barmaq basyndaı ıir qabyrshaqty baıqap, toqtaı qaldy. Dereý tizerlep otyra qap, eńkeıip kóp úńildi.

Qandaı qyzyq? Tas sıaqty qap-qatty bop kórinip, ıirilip turǵan qabyqtyń ishinen birdeńe jybyrlap shyǵyp keledi. Ózi jap-jumsaq sıaqty. Ustap kórgen joq, biraq sondaı ekenin ap-anyq bildi. Ne boldy eken ol?

Kóz almaı shamaly turdy. Álgi nárse anyq kórine bastady. Azdan keıin sozylyp, uzara tústi. Sonda baıqady, óziniń uzyn murty bar eken. Onysy jybyr-jybyr etedi.

Alǵashynda ıir qabyrshaq ishine kirip ketken basqa qurt pa dep oılaǵan. Uzaryp shyqqan soń qurt emes ekenin bildi. Qurt bolsa, qabyrshaqqa qamalmaı, tez-tez alystap keter edi. Mynaý asyǵatyn emes. Jybyrlap shyǵyp jatyr, shyǵyp jatyr. Qurt emes ekenine taǵy bir dálel — onyń denesiniń jýandyǵy myna qabyrshaqtyń úlken aýzymen birdeı eken. Ondaı úlken qurt bolmaıdy ǵoı. Bolsa da syımaıdy. Jáne mynanyń syrtynda túk joq, qyzylshaqa.

Sálden soń murtty jándik baıaý syrǵyp júre bastady. Jumsaq, dymqyl topyraqqa bolmashy iz qaldyryp alǵa jyljydy.

Jup-jumsaq báleniń murty ǵana emes, kóretin kózi de bar sekildi, basyn jan-jaǵyna buryp, tumsyǵymen aldyn túrtip qoıady. Júrýge qolaıly jol izdese kerek.

Eńkeıe túsken Álı onyń aýzy da bar ekenin ańdady. Tynymsyz ashyly-jabylyp turady eken. Soǵan qaraǵanda, kezdesken nárselerdiń arasynan azyq taýyp jeıtin bolsa kerek.

Kózin almaǵan Álı onyń jyljı-jyljı joldan alystap, tam túbine jetkenin kórdi. Sonymen ǵana tynbaı ol tamǵa jabysyp, joǵary órleı bastady. Bir qyzyǵy, uıasynan shyqpaı, art jaǵyndaǵy dáý súıretpesin súırep barady. Kúshti eken ózi.

Álı ary qaraı qadaǵalaı almady. Dál osy kezde alǵa ozyp ketken aǵasy qaıtyp kelip, «júr-júrdiń» astyna aldy da,  súıreı jóneldi.

— Álı, ol kádimgi ulý ǵoı, oǵan nege sonsha qadalyp qaldyń. Ondaı ulýlar tolyp jatyr, — dedi aǵasy.

Álı túnde talaıǵa deıin uıyqtaı almady. Esine álgi ulý túse berdi. Aıaǵy bar bar sıaqty, bolmasa tik qabyrǵaǵa qalaı órmeleıdi? Osy suraq mazalady. «Erteń baryp bárin anyqtap kórý kerek» dedi balbyrap uıyqtap bara jatyp.

Sodan, mine, entigip jetken beti. Ulý tur ornynda. Órlep kelip, keshegi ornynan sál joǵarylap toqtapty. Biraq ishindegi álgi murtty bále joq. Qolyna alyp qarap, eshteńe taba almady. Álde qabyrshaǵyn tastap, basqa jaqqa ketip qaldy ma eken?

Taıaý mańnan kórinbeıdi.

Dál osy kezde artynan aǵasy jetti.

— Neǵyp júrsiń munda? — dedi tamǵa úńilip.

— Ulý… keshegi ulýdy kóreıin dep kelgem. Kelsem joq. Qabyǵy ǵana qalypty.

Aǵasy kúldi.

— Sony da bilmeısiń be? — dedi sosyn Álıge qarap myrs etip. — Ulý degen jańbyr jaýǵanda ǵana shyǵady. Basqa kezde qabyǵynyń ishine kirip alady.

Álı taǵy da tań qaldy. «Aǵam qandaı kóp biledi! Al men munyń eshbirin bilmeımin!» dep oılady ishinen.

Álı ulýdy jerge qoıyp, keri buryldy. Aǵasy anandaı jerge uzap ketken eken. Odan «ulýdyń aıaǵy bar ma?» dep surap alǵysy kelip, aǵasynyń artynan  júgire jóneldi.

---