InfoHub Logo

Astanada synyp jetekshisi birinshi synypqa jańadan barǵan oqýshyny shashynda aq bantıgi joq bolǵandyqtan, alǵashqy qońyraý rásimindegi qatardan ketýin talap etken.

Bilim kúni bolǵan yńǵaısyz jaǵdaı týraly oqýshynyń anasy Qarlyǵash Ońǵarova óziniń Facebook jelisindegi paraqshasynda jazdy, dep habarlaıdy Stan.kz.

«Oqýshylardyń barlyǵy mektep aldyndaǵy alańǵa qatarmen turǵyzyldy. Ata-analarǵa ol jerden árirek turý kerektigi aıtyldy. Birkezde qasyma qyzym jylap keldi. «Ne boldy?» degen suraǵyma «qatardan ári tur» dep aıtty muǵalim deıdi. Synyp jetekshiden jaǵdaıdy surasam «Bizdi arnalar túsirip jatyr, qyzyńyzdyń basynda bantıgi joq. Lıneıkada kórinbeı-aq qoıǵany durys» dep jaýap berdi. Muǵalim óz ulynyń toıyn uıymdastyrǵandaı kimniń qandaı kıimde, qaıda turatynyn sheshedi me? Qyzym sol mektep bekitken kıimde. Al qaı jerde qyzdardyń shashynda aq bantık bolýy kerek degen talap bar? Synyp jetekshisi jańadan mektepke barǵan qyzdy birinshi kúni-aq jylatty. Arnalar mekteptegi alǵashqy qońyraýdy túsirip jatqan bolsa ne bolypty?

Qyzym tańmen 7-de turdy. Mektep kıimin kıip alyp árli-birli úıdiń ishin kezdi. Oǵan bantık baılamaǵan men. Sebebi, maǵan bantık unamaıdy, qyzyma jaraspaıdy. Onyń ústine birinshi kúni balalardy bir-birimen, ustazymen tanystyrý ǵana bolady.

Ne sebepti mereke kúni qyzymdy bir saǵat boıy jubatyp, sońynda mektepke onymen birge kire almaımyn. Aqyry kimniń sońynan eretinin bilmeı bala adasyp júredi.

Muǵalimi jylatqannan keıin balanyń mektepke de barǵysy kelmeı qaldy. Kútken merekesi oıyndaǵydaı bolmaı shyqty», - dep ashýlandy oqýshynyń anasy.

Astana turǵyny osy oqıǵadan keıin qyzyn basqa synypqa aýystyrýǵa sheshim qabyldapty.

---