InfoHub Logo

Nartaı men atasy jaılaýda biraz kún turdy. Oǵan sebep qonaqqa shaqyrǵan kisilerdiń qolqasy boldy. «Qymyz iship ketińizder» dedi qıylyp. Asyǵys jumys bolmaǵan soń, usynysty teris kórmedi.

Bul jaǵdaıǵa bárinen buryn Nartaı qatty qýandy. Kelgen sátten-aq qulpyryp ketken jaılaýǵa qumartyp qalyp edi, biraz kún qalatyndaryn estigende, shattyǵy eselene tústi. Taǵy bir jaǵynan onyń ótkeli turǵan «Qymyzmuryndyqty» kórgisi kelgen-di.

Sol kúni qonaq bop barǵan úılerine adam kóp jınaldy. Kóbi úlkender. Jaıaýlatyp kelgen aq jaýlyqty ájeler de boldy. Balalar da aǵyldy.
Solarǵa erip Nartaı oıynnyń týyn tikti deısiń. Túske taıaǵan bir kezde abyr-sabyr basylyp, jurt úlken úıdiń aldyna qaraı jınaldy. Nartaı sonda baryp úıge kirdi. Atasynyń qasynan oryn aldy.

Keshikpeı aldyǵa dastarqan jaıylyp, tabaq tartyldy. Nartaıdyń atasy bata berdi. Sóz arasynda «óris shúıgin bolsyn», «qymyz mol bolsyn» degen tilekter aıtyldy. Osy tilekterden Nartaı «Qymyzmuryndyqtyń» áldeqashan bastalyp ketkenin bildi.

Bet sıpalyp, tabaqtar jınalǵan soń, tegene toly qymyz keldi aldyǵa. Birinshi tostaǵandy qolyna alǵan jigit aǵasy búgingi basqosýdyń maǵynasyn túsindire kelip, munyń bıylǵy alǵashqy qymyz ekenin jetkizip, úlkenderden qaıtara bata surady.

Keshikpeı sálem berip ishke kirgen aqyn jigit dombyrasyn alyp, tógilte óleń bastady. Ol áýeli bıyl erekshe túrlenip ketken jaılaýdyń kórkin aıtty. Sonan soń eldiń bereke-birligin jyrǵa qosty. Osyǵan muryndyq bolǵan aqsaqaldardyń kóregindigin madaqtap ótti. Sońynda, búgingi merekeni uıymdastyryp otyrǵan úıge kóp tilek tilep, alǵys jaýdyrdy. Óleń shýmaqtaryn ár qaıyrǵan saıyn ázil aıtyp jurtty kúlkige qaryq qyldy. Otyrǵandar jas aqynnyń tapqyrlyǵyna súıinip, rızashylyqtaryn bildirdi.

— Áı, bárekeldi! Shyn sóz! Bul úı — aýylymyzdyń berekesi ǵoı! — dep, úı ıesi týraly tolǵaǵan tusta qol soǵa qolpashtady.

Nartaı tańǵala tyńdady. Barlyq sózin túsindi. Arasynda qurmetti qonaq retinde atasynyń esimin de erekshe aýyzǵa alyp, «aıaǵy qutty bolsyn» dedi.

Óleń birazǵa sozylyp baryp, izgi tilekpen támamdaldy. El yqylasyna leń bólengen jigit ıilip taǵzym jasap, shyǵyp ketken soń, súıinishti sózder talaıǵa deıin tolastamady.

Nartaı da rıza edi. Munda qalyp, az kún aıal bolǵanyna kóńili qosh bolatyn. İshteı jaılaýdan kórgen-bilgen jaılardy oıdaǵy dostaryna túk qaldyrmaı aıtyp berýdi oılap otyrdy.

---