InfoHub Logo

Aýyr qaza ústinde sóz aıtý qıyn. Bul bir semányń, bolmasa bir ǵana óner salasyndaǵy qaýymnyń azasy emes — kóptiń azasy. Muhańnyń alyp shyǵarmalaryn, halqynyń sińirgen azamattyq zor eńbekterin de aıtyp jatpaımyz. Ol týraly sap zertteýler bolady alda.

Qazaqtyń jazba ádebıeti jas qoı. Osy ádebıetti bastaýshylardyń biri Muhań edi. Oılap qarasań, bir adamyń etken eńbegine, jetken bıigine qaıran bolasyń. Osy kisi birneshe urpaqtyń isteıtin isin atqaryp ketken sıaqty. Dúnıe júzilik ádebıettiń altyn qoryna sol kisiniń qolymen «Abaı jolyn» qosqan joq pa edik.

Osyndaı ustazymyz baryn zor maqtanysh etýshi edik. Ol shyn maǵynasyndaǵy maqtanysh. Keıingi shyqqan jastardyń shyǵarmalary sátti bolsa — ol ustazdan aýysqan qasıet, alyp talanttyń shapaǵaty bolatyn.

Qazaq halqynyń úlken bir murasy — til ǵoı. Sol baı tildiń bar asyl qazynasyn aqtaryp, qulpyrtyp berip edi. Kóbimizdiń-aq tilimizdegi nárimiz sol kisiden be dep oılaımyz. Barshamyz da kóp-kóp boryshtymyz sol kisiniń aldynda.

Jańa bir ázirde tustas dosym qyrǵyz jazýshysy Shyńǵys Aıtmatov Frýnze qalasynan telefon soqty.

Halqymyzǵa kóńil aıtyp, qaıǵyǵa ortaq boldy; ol da Muhańnyń súıikti shákirtiniń, úmit kútken inisiniń biri. Peıili keń, sharapaty mol Muhań óz tóńiregine ǵana emes týystas ádebıetterge de, sol ádebıette ósip kele jatqan jastarǵa da ustaz bolatyn. Azerbaıjannyń Mehtı Gýseın bastaǵan birsypyra jazýshylary Muhańa kitabyn ákelip, aqyl-kádesin tyńdaǵan shaqtaryna kýá bolyp edik. Búgin solar da bizben birge úlken qazany azalaıdy.

Muhańdy uzaq saparǵa attandyrǵaly otyrmyz. Aldymyzda úlken aǵamyz bar edi, ol birsypyra salmaqty ózi arqalap kele jatyr edi. Endi sol salmaq bárimizdiń arqamyzǵa bólinip túspek. Ádebıetimizdi Muhań kótergen bıik dárejeden tómendetip almaı, sol kisiniń bıigin aldymyzǵa qatal tarazy qyp ustap, asa kórnekti jazýshynyń izin sýytpaı qyzmet etý, shybyn jandy azapqa salyp, boıdaǵy bar kúshimizben, jan kúshimizben halyqqa qyzmet etý sol bolady da aýyr kúngi aıtar sózimiz.

1961

---