InfoHub Logo

- Saıynovanyń shákirti ne boldy?

Dırektordyń bólmesinde otyrǵan Baıanbaevanyń osynda kirgendegi kóńili pás tartty. Álginde ǵana qalalyq jarystan ozyp shyqqan shákirti Aıananyń tabysy dırektor hanymdy asa qýanta qoıǵan joq. Baıanbaevanyń alaburtqan kóńili osyǵan sap basyldy.

Dırektor suraǵyn taǵy da qaıtalady:

- Saıynovanyń shákirti ne boldy?

- Saıynova... - Baıanbaeva dırektor hanymnyń kóńiline qarap kibirtiktep qaldy. - Saıynovanyń shákirti qalalyq jarystan óte almady.

Sol-aq eken, dırektordyń qabaǵy qars túıilip ketti.

- Óte almaǵan eken ǵoı!.. - Baıanbaeva dırektordyń daýsynan áldebir kúıinishti lepti sezdi.

"Adamdy nege alalaıdy? - dep oılady Baıanbaeva. - Men de osy mekteptiń muǵalımasy emespin be? Meniń shákirtim Aıana da osy mekteptiń oqýshysy ǵoı".

Ras, Saıynovanyń kórsetken kórsetkishteri joǵary edi. Saıynova deńgeıi joǵary pedagog bolyp esepteletin. Biraq Saıynovanyń qalalyq jarystan shákirtin qulatyp alǵandyǵyna Baıanbaeva kináli emes qoı.

Baıanbaevanyń eki shekesi solqyldady. Denesi qyzynyp, býsanyp ketkendeı boldy.

- Saıynovanyń shákirti qulaǵan eken ǵoı...

Baıanbaevanyń qulaǵyna dırektordyń daýsy qańǵyr-kúńgir etip estildi. Dırektordyń ne aıtyp otyrǵandyǵyn Baıanbaeva sosyn ǵana baryp túsindi. Biraq dırektor bul kezde Baıanbaevaǵa qarap sóılep otyrǵan joq edi.

Baıanbaeva dırektordyń bólmesinen kóńilsiz shyqty. Álginde ǵana shákirti Aıana ekeýiniń qalalyq jarystan shyqqannan keıin máz-meıram bolyp kele jatqandaǵy sátterin áldene kómeskilendirip tastaǵandaı boldy. Sonda Baıanbaeva shákirti Aıanany baýyryna qysyp turyp: "Aınalaıyn-aı!" degen edi jaqsy kórip.

Baıanbaevanyń qulaǵyna kenet "Apaı!" degen názik daýys estilgende, ózin tosyp turǵan shákirti Aıanany kórdi. Aıana ustazynyń janyna júgirip keldi.

- Apaı! Tapsyrmalarǵa daıyndala bereıin be?!

Baıanbaeva kenet serpilip ketti:

- Daıyndal! Áli oblystyq kezeńnen de top jaratyn bolamyz!

Baıanbaevanyń aýzyna sol joly qudaı saldy ma eken, búgin shákirt pen ustaz oblystyq kezeńneń de oljaly shyqty. Ózderiniń tabystaryna qýanǵan shákirt pen ustazy taǵy da shadyman shattyqta kele jatty. Qalada qar jaýyp tur edi. "Biz tabysqa jetken kúni qar jaýyp turdy-aý, - dep oılady Baıanbaeva. - Bizdiń tabysymyzǵa tabıǵat ananyń ózi de qýanyp turǵan sekildi". Appaq ulpa qar túıirshikteri ustaz ben shákirttiń ıyǵyna kelip qonaqtaıdy. Osy kezde Baıanbaeva shákirtine: "Aıana! Seniń mamańa baramyz! Mamańnan baryp súıinshi suraımyz!" - dedi. Súıikti anasynyń atyn ustazynyń aýzynan estigende Aıana qýanyp ketti.

Aıananyń ákesi Aıananyń kishkentaı kúninde dúnıeden ozyp ketken edi. Ózin únemi kóterip, erkeletip júretin súıikti ákesiniń júzi Aıananyń kóz aldynda emis-emis qana saqtalyp qalypty. Aıananyń ákesi qaıtys bolǵannan keıin, "jyǵylǵan ústine judyryq" degendeı, Aıananyń mamasy avtomobıl apatyna ushyrap, bir aıaǵyn tizeden kestirip, protezdyń kómegine súıenip qalǵan edi. Biraq qaısar áıel moıyǵan joq. Súıikti qyzy Aıanany jetkizý úshin baryn saldy. Bertin kele kásipkerlikke den qoıyp, ózine shaǵyn dúken ashyp alyp, sonda jumys isteıtin.

- Búgin Raýshan joq shyǵar, - dedi Aıana ustazyna álginde ǵana bolǵan qýanyshtan áli de júzi bal-bul jana qarap. - Raýshan jumystary bolyp suranyp ketken bolýy kerek. Dúkende mamamnyń ózi turǵan shyǵar.

Aıananyń Raýshan dep otyrǵany - osy qaladan arnaýly orta bilimdi zańger mamandyǵy boıynsha kolej bitirgen, aýyldan kelgen jas qyz edi. Ázirge jumys tabylmaı, bilimimdi keıin jalǵastyramyn dep júrgen Raýshandy Aıananyń mamasy óziniń dúkenine birge jumys isteýge shaqyrǵan. Dúkende kóbine Raýshan turatyn. Ári Raýshan Aıanalarmen birge turady. Raýshan men Aıana týra bir ápkeli-sińlili jandardaı bolyp ketken.

Ustaz ben shákirt Aıananyń mamasynyń dúkenine jaqyndap kele jatty. "Aıana" dúkeni. Aıana árdaıym mańdaıshadaǵy osy bir jazýdy oqyǵan saıyn, óziniń esimin mańdaıshaǵa jazyp qoıǵan anasyna myń alǵys aıtatyn.

Ustaz ben shákirt dúken ishine qol ustasyp kirip kelgende, dúken ishinde satyp alýshylar joq kezi edi. Ózderine Aıananyń mamasy nazaryn salyp qaraı bergende, ustaz ben shákirt qosarlana: "Biz jeńdik!" dedi. Áıel jeńiske jetken qyzyn qushaqtap súımekke sóreni aınalyp ótpek bolyp, umsyna bergende, Aıana:

- Mama!.. Men ózim!.. - dedi de, júgire basyp baryp, sóreni aınalyp ótip, anasyn qushaqtady. Ana men qyzynyń qýanyshyna Baıanbaevanyń júregi eljiredi. "Shirkin, adamdardyń bári osylaı qýansa ǵoı!" dep oılady Baıanbaeva.

Ana men qyz shúıirkelesip jatqanda, Baıanbaeva dúken ishindegi sórede turǵan zattarǵa bir sát nazaryn aýdarǵan edi. Bir kezde artyna burylyp qaraǵanda mamasynyń janynda kishkentaı balasha erkelep shokolad jep turǵan Aıanany kórdi. Mynaý álginde ǵana myqty degen mektepterdiń myqty degen shákirtterin artqa tastaǵan Aıana ma? Baıanbaeva shákirtine qarap kúlimsiredi. Kóńili bosady. Biraq Baıanbaevanyń dál qazir bosansýǵa qaqysy joq edi. Óıtkeni súıikti shákirtiniń ózine degen úmiti men senimine qosa, alda olardy taǵy da bir úlken asý kútip tur edi.

---