InfoHub Logo

Oǵan kóp jyl boldy.

Ybyraı qyzyn uzataıyn dep jatyr degen soń toıyna bardyq. Aıymkúl ózi teńdes qyzdardyń ishindegi kórikti, aqyldy, salmaqtysy edi. Eldegi boz balalardyń ishinde Aıymkúlge kóńili ketkender kóp bolǵan. Biraq Ybyraı bir urt kisi: "Qyzymdy oryndy jerge beremin" dep talaıdyń atynyń basyn qaıyryp, aqyrynda Býrabaı degen baıdyń qatyny ólgen balasyna bergen.

Aıymkúl buǵan rıza emes, baı balasy Raqymdy "jasy 40-tan asyp ketti, kári" deıdi, "ózimniń súıgenime tıemin" dep aıtady degen laqap sońǵy kezde el arasyna shashylyp júrgen. Sondyqtan bul toıǵa barýǵa kim bolsa da qumartyp edi. Buryn-sońdy kúıeýge berilgen qazaq qyzdary áke-sheshesiniń degeninen shyǵyp kete almaıtyn bolsa da, Aıymkúlde ózgeshe bir kúsh bar, Aıymkúl kónbeıtin sekildenýshi edi...

Jaltyr kóldiń basy qoralaı qonǵan qalyń aýyl. Bir-eki kúnnen beri Ybyraıdyń toıy bolyp, eldiń boz balasy, qatyn-qalashy sol úıdiń mańaıynda toptanýmen júr... Toı tartys ótken. Búgin merekeniń aqyrǵy kúni. Endi birer saǵatta Aıymkúl Raqym myrzanyń nekeli qatyny bolmaqshy. Biraq jurt aýzynda bir sýyq sóz bar. "Aıymkúl barmaımyn dep jylap jatyr eken... áke-sheshesi ursypty. Aǵasy urarmanǵa kelipti..." degendi aıtyp, jurttyń kóbi jaǵasyn ustap júr.

Ybyraıdyń otaýy shań-shuń daýys. Jurttyń bári otaýdy qamap alǵan. Jas balalar otaýdyń esigin syǵalasyp, bermeıdi.

— "Senderdiki adamshylyq pa? Satatyn men mal ma edim?..." degen jińishke daýys jylaý arasynan qulaqqa tıedi. Kempir-shaldar "tobalap" jaǵalaryn ustap júr... Taýǵan aqsaqal mańyzdap soǵyp, jón aıtyp jatyr.

Bolmady... Rızalyqty tilegen jan joq, neke qıyldy. Quda-kúıeýler atyn jegip júretin boldy... Eki kelinshek Aıymkúldi qoltyqtap dalaǵa alyp shyqty. Ol kisi óltirgen adamsha qan joq, sup-sur... Eshkimmen kórispedi... Arbaǵa minip otyrǵan soń, artyna qarady. Eki kóziniń janary tolǵan jas edi. "Hosh" dedi.

Odan beri kóp jyldar ótken...

Bir kúni gúbernelik qalanyń kóshesinde kele jatsam, qyzyl shyraıly bir áıel ketip bara jatyr. Qashan bolsa da, qaıda bolsa da bir kórgen adamym sekildi... Qaıda kórdim eken?! Eske túse qaldy.

Aıymkúl eken. Tanydy. Burylyp kelip amandasty. Taza ǵana kıingen. İs basyndaǵy adamdar sekildenip, qoltyǵyna pápke qysyp júr. Men qyzyqsyndym. Budan birneshe jyl buryn áke-shesheniń satýynan qutyla almaı ketken bir áıeldi myna túrde kórgen soń ne dep oılaýǵa da bilmedim. Jónin aıtty. Baıynan qalaı qutylǵanyn, oqýǵa qalaı kirgenin, qaı jerde kyzmet qylatynyn bildirdi.

— Bostandyq arqasynda erikti adam boldyq!.. — dedi. Shyny da solaı. Qyryq jetige satylyp ketken Aıymkúldiń búgin kelip keńse qyzmetkeri bolyp otyrǵandyǵy uly Bostandyqtyń jemisi edi.

---