InfoHub Logo

Pir saılaý jumysyna kiriskende Tóle bı óziniń ǵulamasy Maǵzamandy, Qazybek bı Er Seıtpembetti, Áıteke Músálini (keıingi laqap aty — Supyázi) ózderimen birge májiliske ala keledi. Pir saılaý májilisine bulardan basqa moldalar men ıshandar, aıbyndy batyrlar men bıler, sóz zergeri sheshender qatysyp otyrǵan. Pir saılaýynda adam kóptiń aldynda óziniń keremetin kórsetýi kerek. Keremeti basym adam ulyq pir bolyp saılana alatyn bolǵan.

Tártip boıynsha úsh bıdiń ǵulamasynyń keremeti synalyp bolǵannan keıin, eń myqty degenin ǵana pir saılaýyna jaramdy dep sheshiledi. Bul ár bıdiń ózderiniń ǵulamasyn qur beker maqtap, usyna bermesin degen oıdan týsa kerek. Keremet kórsetý jónindegi usynys Áıteke bıden shyqqan bolatyn. Onyń bul usynysy kóptiń ishinen qoldaý tabady da, Áıteke halyq aldyna bir býaz sıyr ákeldiredi. Sosyn ǵulamalarǵa qarap:

— Sıyrdyń ishindegi buzaýdyń túrin, túsin, jynysyn jáne qandaı kúıde jatyr sony kópke buljytpaı aıtyp beresińder! Sıyrdy soıyp, buzaýdy alǵanda qaısysynyń sózine buzaýdyń túr-túsi dál kelse, sol úsh júzge ulyq pir bolyp saılanady, — deıdi. Buǵan úsh bı kelisedi.

Alǵashqy bolyp Tóle bıdiń ǵulamasy shaqyrylyp:

— Mynaý sıyrdyń ishinde qandaı buzaý jatyr? Onyń túri, túsi jáne jynysy qandaı? Sony myna kópke aıtyp ber, — deıdi úsh bı.

Maǵzaman sıyrǵa qarap turyp:

— Bul sıyrdyń ishinde: qara, urǵashy, aqtóbel buzaý jatyr, — dep toqtady.

Qazybektiń ǵulamasy Er Seıitpambet sıyrǵa qarap turyp:

— Myna sıyrdyń ishinde urǵashy, qara buzaý jatyr dep kidiredi.

Budan soń úshinshi bolyp Áıtekeniń ǵulamasy Músiráli sıyrdy kózimen bir ret súzip ótti de kópke qarap:

— Bul sıyrdyń ishinde urǵashy, qara, aq quıryq buzaý jatyr, — deıdi.

Úsh ǵulama kóre kózge úsh túrli sóz aıtqanda otyrǵan kópshilik kýáger bolady. Osydan soń sıyrdyń ishin jaryp buzaýdy alyp qarasa, buzaý — urǵashy, qara, aq quıryq. Bul Músiráliniń aıtqany edi. Sondyqtan halyq bir aýyzdan ulyq pirge Músirálini saılady. Músiráli óziniń ozyq
kórgendigimen úsh júzge Pir bolady.

Endi osy Pirdi elge alyp ketýge de úlken talas bolady. «Úsh júzge ortaq bolǵandyqtan, ulyq pir orta júzde otyrýy qajet», — dep otyryp alady Qazybek. Tóle bı muny qýattaıdy. Áıteke Músirálini qalaıda ózimen birge alyp ketý úshin olarǵa taǵy da usynys qoıady.

— Erteń úsh júz árqaısysy óziniń eline qaraı qosynyn kóshirsin. Biz Músirálimen tórteýimiz tóbeniń basynda turaıyq. Kóshtiń qarasy úzilip ketkesin Músiráliniń atyn bos jibereıik. At qaı júzdiń kóshiniń artynan erip ketse, Músiráli de sol júzge kete bersin, — deıdi ol. Qazybek pen Tóle bı buǵan qosylady. Erteńine dál osylaı jasaǵanda Aqsha at Kishi júzdiń kóshiniń artynan quıyndatyp shaýyp ketedi. Muny kórgen Áıteke:

— O, sadaǵań keteıin, áýlıem! — dep Músirálini qushaqtap taǵzym etedi.

Turyp qalýǵa uıalyp, ana eki bı de Músirálige qol berip eńkeıedi. Sóıtip, úsh bı tatýlyqpen tarqasyp, Áıteke Músirálini qasıetti qara shańyraǵyna ákelip qondyrǵan eken.

---