InfoHub Logo

Bakterıalyq vagınoz — sońǵy onjyldyqta jıilep ketken gınekologıalyq aýrýlardyń bir túri.

Kez kelgen qynap qabyný úderisi belgili bir ýaqytqa deıin kandıdoz, soz sekildi jynystyq qatynas arqyly juǵatyn aýrýlarmen baılanysty emes, telimsiz vagınızmge jatady.

Bakterıalyq vagınoz — patogendik qozdyrǵyshtar tabylmaǵan jaǵdaıda, týyt jasyndaǵy áıelderde qynap bólindileriniń kóp bolýyna jıi sebep bolatyn telimsiz úderis. Bul qynap júıesiniń dısbıozy, ol laktobasılalardan emes, Mobilincus, mıkoplazma, garnell asosıasıalarynan turatyn aýrýdyń túri. Qozdyrǵysh — Gardnerella Vaginalis — qynapta kóp shoǵyrlanatyn, qozǵalmaıtyn usaq kóp túrli bakterıalar.

Deni saý týyt jasyndaǵy áıelderdiń qynabyndaǵy mıkrosenozda laktobakterıalar basty oryn alady, olar áıeldiń ımýndyq júıesin shıryqtyrady, qynap epıtelıı jasýshalaryna jabysý úshin basqa mıkroorganızmdermen básekeles bola alady, qynap ishinde sút qyshqylynyń joǵary shoǵyrlanǵan túriniń qyshqyl ortasyn kurady, sýtegi asqyntotyǵyn túzý qasıetterine ıe.

İshektegi bıosenozdyń buzylýy, ımmýnologıalyq reaktıvtiliktiń tómendeýi, gormondyq jaǵdaıdyń ózgerýi bakterıalyq vagınozdyń damýyna áser etýi múmkin. Ekzogendik faktorlardyń ishinde ımmýnodepresanttar nemese gormondyq dármekter, nesep-jynys joly aýrýlaryn emdeýde qoldanylǵan bakterıaǵa qarsy em erekshe oryn alady. Bakterıalyq vagınoz damýynyń qaýip faktorlaryna jynystyq serikti jıi aýystyrý, jatyrishilik kontraseptıvterdi paıdalaný, nesep-jynys qabyný aýrýlary, ishek dısbıosenozy jatady.

Bakterıalyq vagınoz kezinde aıqyn faktorlardyń áserinen laktobakterıalar deńgeıi kúrt tómendeýi nemese tolyǵymen joǵalyp ketýi de múmkin. Sonymen qatar qynap ishinde joǵary shoǵyrlanǵan Gardnerella Vaginalis pen laktobakterıalardyń oryndary almasady. Gardneralar anaerobtardyń jappaı kóbeıýine yqpal etip, olar óz kezeginde amın qyshkyldaryn bólip, qynap sektorynda amınderdiń shoǵyrlanýyn kúsheıtedi. Osy amınder qynap bólindilerine jaǵymsyz ıis («balyqtyń» ıisi) beredi.

Bakterıalyq vagınozy bar naýqastar etekkir kezinde, jynystyq qatynastan keıin jaǵymsyz «balyq» ıisiniń shyǵýyna, jynys joldarynan aq nemese sur tústi kóp bólindilerdiń bólinýine jıi shaǵymdanady. Bul birneshe jylǵa sozylýy múmkin. Aýrý údegende bólindiler sarǵylt-jasyl túske enip, qoıýlanady, kóbiktenedi, sozylmaly jáne jabysqaq bolyp, qynaptyń qabyrǵalary boıyna birqalypty taraıdy. Aǵyndylardyń mólsheri qalypty jaǵdaıdan asýy múmkin. Qyshyma, dezýrıalyq buzylýlar, jynystyq qatynas kezindegi aýyrsynýlar jıi kezdesedi, alaıda bul belgiler múlde bolmaýy nemese mezgil-mezgil paıda bolýy múmkin.

Bakterıalyq vagınoz kezinde túsik tastaǵannan keıingi jáne bosanǵannan keıingi endometrıt damý kaýpi 3,4-7 retke artatyndyǵy, sonymen qatar jatyr qosalqylarynyń qabyný úderisi jáne gısterektomıadan keıin jatyr tuqyly qabynýynyń úsh esege ósetindigi týraly naqty dálelder bar. Bakterıalyq vagınoz ózdiginen túsik tastaý, horıoamnıonıt, uryq mańy sýynyń merziminen buryn aǵyp ketýi, ýaqytynan buryn bosaný sekildi akýsherlik patologıanyń damýynyń qaýip faktory bolyp tabylady.

Bakterıalyq vagınoz kishi jambas músheleri qabyný aýrýlarynyń damýyna jáne jatyr tútigi, jatyrdyń shyryshty qabaty juqpaly aýrýlarynyń kúsheıýine áser etedi.

Qazirgi ýaqytta bakterıalyq vagınozdy emdeý úshin metronıdazol jáne klındamısın paıdalanylady. Bul dáriler anaerobqa qarsy spektrli áserge ıe. Bakterıalyq vagınozdy emdeýge arnalǵan dári-dármekterdiń kóptigine qaramastan, bul aýrýdan 55-83,3% jaǵdaılarda ǵana tolyq jazylyp ketý múmkindigi bar. Nıtroımıdazol preparatynyń (qazirgi ýaqyttaǵy bakterıalyq vagınozdy emdeýge arnalǵan negizgi qural) áserin kúsheıtý maqsatynda terapıada jergilikti qoldanylatyn preparattardyń qosymsha túrleri qoldanylady.

Bakterıalyq vagınozda em áserin kúsheıtý maqsatynda qynapqa engizýge arnalǵan geksıkon sýppozıtorııleri beriledi. Geksıkon preparaty qoldanýǵa yńǵaıly, venerologıalyq aýrýlardyń  aldyn alýǵa tıimdi qural bolyp tabylady ári ol qynaptyń qalypty florasyna keri áser etpeıdi. Qynapqa jan-jaqty áreket etýshi quraldardyń bir túri — ıodoksıd, ol túnde 1 sýppozıtorııden 10  kúnge taǵaıyndalady.

Emdelýdiń ekinshi kezeńinde qynaptyń mıkrosenozyn qalypqa keltirý maqsatynda, sońǵy jyldary eýbıotıkter, sonyń ishinde aýrýdyń qaıtalaný qaýpin tómendetetin, qynaptyń óz laktoflorasynyń ósýine áser etetin asıalakt qoldanylady. Asıalakt túnde 1 sýppozıtorııden 10 kúnge taǵaıyndalady.

J. N. Syrǵabaeva

---