InfoHub Logo

Bızneste erejeler kóp. Adamdar tabysqa jetý úshin ne isteý kerek ekenin aıtqandy jaqsy kóredi. Biraq bıznesti durys jasaý óte qıyn bolǵanymen, tabysqa kepildik beretin eki ereje nemese eki fılosofıalyq ıdeıa bar, — dep belgili kásipker jáne marketolog Den Valdshmıdt esepteıdi.  

Sizdiń ne satatynyńyz, qandaı qyzmet jasaıtynyńyz mańyzdy emes. Qaı jerde, qaı salada jumys isteıtinińiz de mańyzdy emes.

Mańyzdysy tómendegi eki ereje. Naǵyz jetistik osy eki erejege baılanysty.

1. Sizben jumys isteý óte ońaı bolýy kerek

Eksklúzıvti bolýdan góri qol jetimidi bolý mańyzdyraq. Sondaı-aq kómek qolyn soza alý  ózine nazar aýdartýdyń jáne ózi týraly oılatýǵa májbúr etýdiń jaqsy ádisi. 

Qoldanbalarǵa (app) baǵyttalǵan búgingi saýda ekonomıkasynda áleýetti tutynýshyny súzgiden ótkizý ońaı. Tutynýshy aqparattardy toltyryp, veb-saıtqa 10-20 ret kirip, málimet júktep, taǵysyn-taǵy jasap jatqanda sizdiń tehnologıańyz ony baǵalap, tutynýshy jaıly sizge habar jınaıdy.

Eger siz osylaı áreket etip jatqan bolsańyz, onda jańa tutynýshylardyń paıda bolmaǵanyna tań qalýdyń qajeti joq. Demek sizdiń áreketterińiz, qyzmetińiz jetkilikti dárejede yńǵaıly, laıyqty emes jáne adamdar kóptep meken etetin jerlerinde olardy kezdestirýge daıyn emessiz.

Eshkim sizben is jasaı otyryp, ózin aqymaq sezinýin qalamaıdy. Eshkim sizge óz aqshasyn berý úshin qandaı da bir kúsh jumsaǵysy kelmeıdi.
 
Adamdar ózderin qoldap, kómek kórsetilgenin, sondaı-aq durys jol nusqap, baǵyt berilgenin qalaıdy. Al sizben jumys isteý qıynǵa soǵatyn bolsa, bul tek jaǵdaıdy ýshyqtyrady. Bul onsyz da qıyn jaǵdaılaryn odan ári kúrdelendire túseri anyq.

Sondyqtan baılanys aqparatyn saıttyń tereń tuńǵıyǵyna jasyrýdy doǵaryńyz. Adamdarǵa sizdiń qyzmetińiz nemese usynǵan ónimińiz unamaǵan jaǵdaıda ońaı bas tarta alatyndaı jaǵdaı jasańyz. Kez kelgen kúrdeli jáne shıeleniske toly kelisimsharttardan bas tartyńyz.

Bolashaq klıentter sizdi ońaı taba alatyndaı barlyq jerde bolyńyz. Sonymen qatar sol jerlerde bola tura, adamdardy komersıalyq usynystar men yńǵaısyz marketıńpen emes, jyly júzben qarsy alyp, barlyq suraqtaryna sapaly jaýap berip, tıimdi kómek jasaýǵa daıyn bolyńyz.

2. İsińizdiń sapasyna qaıran qalyp adamdar sizge qaıta oralǵysy kelip turý kerek

Tutynýshylardy qýantý jáne tań qaldyrý sizdiń eń basty maqsatyńyzǵa aınalý kerek.

İsińizdegi ózińizge jaqpaıtyn nárseler týraly, sondaı-aq onyń ishinen neni túzete alatynyńyzdy oılanyńyz da túzetińiz — tipti ol usaq nárse bolsa da.

Mazańyz bolmaı, sharshap tursańyz da adamdarǵa jyly júzben qyzmet kórsetińiz. Sizde «barlyq ýádeni oryndaımyn» degen jospar bolý kerek.

Ónimdilikti arttyrý úshin qarapaıym soft, nemese jaı ǵana qoıyn dápter — munyń bári kesteden qalyp qoımaýǵa jáne basqalardan júıeli túrde jaqsy jumys isteýge kómektesedi.

Sózińizben isińiz úılesimdi bolý kerek, aıtqan sózińizdi oryndaýyńyz qajet. Tutynýshylaryńyz úshin bul sizdiń ózgelerden úlken aıyrmashylyǵyńyz.

Kásibińizdiń ósýine osynyń úlken áseri bolatyny sózsiz. Tutynýshylarda sizge degen senim oıana bastaıdy. Tipti olardyń kóńilinen shyqpaǵan jaǵdaıda, olar sizge taǵy da bir múmkindik berýi múmkin.

Qajet bolǵany — talpyný, odan keıin taǵy da qosymsha talpyný. Bir nárse durys bolmaǵan jaǵdaıda, mindetti túrde qateńizdi túsinip keshirim surańyz. Sosyn barlyǵyn qaıta durys jasaýǵa tyrysyńyz.

Sonymen, sizdiń kásibińizdi keremet etetin eki-aq ereje bar.

Saýdany avtomattandyrý men túrli marketıńtik qýlyqtardan kelgen ásermen bul eki erejege súıenip kelgen áserdi salystyrýǵa da kelmeıdi.

Keremet ónim — kezdeısoqtyq emes. Onyń artynda úlken eńbek jatyr. Álemdi kezdeısoqtyqpen ózgertý múmkin emes.

Ol úshin ár túıinge, egjeı-tegjeıine mán berý kerek. Erekshe erejeler boıynsha oınaý kerek.

Endi bul erejelerdi siz de bilesiz.

---